ელექტრომობილების ამერიკული მწარმოებლის, Tesla-ს შემოსავლები მიმდინარე წლის მეორე კვარტალში ათწლეულის განმავლობაში ყველაზე მეტად, 12%-ით შემცირდა. Tesla-ს Q2-ის შემოსავლებმა $22.5 მილიარდი შეადგინა. კომპანია აღნიშნულ კლებას მეორე კვარტალში ავტომობილების მიწოდებაში 13%-იან კლებას უკავშირებს. რაც შეეხება წმინდა შემოსავალს, წინა წლის იმავე პერიოდთან შედარებით, Tesla-ს წმინდა შემოსავალი 16%-ით შემცირდა და $1.17 მილიარდი შეადგინა.
Tesla-ს მიერ მარეგულირებლებისაგან მიღებული სუბსიდიების მოცულობა მეორე კვარტალში $439 მილიონით განისაზღვრა, რაც პირველ კვარტალთან შედარებით თითქმის $600 მილიონით შემცირებული მაჩვენებელია. აღნიშნულის მიზეზი დონალდ ტრამპის მიერ წინა ადმინისტრაციის ელექტრომობილების პოლიტიკის ცვლილებაა, რის მიხედვითაც აშშ-ის საჯარო სამსახურებს ავტოპარკის ელექტრიფიცირების ვალდებულება მოეხსნათ.
მიუხედავად შემოსავლების შემცირებისა, ფინანსური ანალიტიკოსები Tesla-ს ზრდას კვლავ პროგნოზირებენ. კომპანიის ფინანსური ანგარიშის გამოქვეყნებას მძიმე ნეგატიური გავლენა არ მოუხდენია საფონდო ბირჟაზე აქციების ფასზეც. ფინანსისტების განმარტებით, ინვესტორებისთვის Tesla-ს AI-ინიციატივები დიდ ყურადღებას იმსახურებს, განსაკუთრებით იმის ფონზე, რომ რამდენიმე დღის წინ ილონ მასკმა საკუთარ ხელოვნური ინტელექტის კომპანია xAI-ში Tesla-ს მიერ ინვესტიციის განხორციელების პერსპექტივაზე ისაუბრა.
ცნობისთვის, Tesla-ს აქციათა ფასი საფონდო ბირჟაზე გასული თვეების განმავლობაში მნიშვნელოვნად გაიზარდა მას შემდეგ, რაც ილონ მასკმა ტრამპის მთავრობაში საკუთარი თანამდებობა დატოვა და პოლიტიკისგან დისტანცირება გადაწყვიტა.
