რუსეთის პრეზიდენტის, ვლადიმირ პუტინის განცხადებით, მოსკოვი ევროკავშირში უკრაინის პოტენციური წევრობის წინააღმდეგი არასდროს ყოფილა. მისივე განმარტებით, უკრაინისა და რუსეთის უსაფრთხოებაზე კონსენსუსის მიღწევა შესაძლებელია.
„ევროკავშირში უკრაინის გაწევრების წინააღმდეგი არასდროს ვყოფილვართ. NATO-ს შემთხვევაში საკითხი სხვაგვარადაა. ჩვენი პოზიცია ამ საკითხზე ყველასთვის ცნობილია: ჩვენ ამას მიუღებლად მივიჩნევთ“, – განაცხადა პუტინმა ჩინეთში სლოვაკეთის პრემიერ-მინისტრ ფიცოსთან საუბრისას.
უკრაინის ხელისუფლება მიიჩნევს, რომ რუსეთის გადასაწყვეტი არ არის, რას შეუერთდება ან არ შეუერთდება უკრაინა. NATO-ს ხელმძღვანელობამ კი რამდენჯერმე განაცხადა, რომ რუსეთს ალიანსის წევრობაზე ვეტოს უფლება არა აქვს. მიუხედავად ამისა, როგორც ჩანს, დასავლურ ქვეყნებს, უკრაინის უსაფრთხოების გარანტიებზე საუბრისას, NATO-ს წევრობასთან დაკავშირებით რუსეთის პოზიციის გათვალისწინება მაინც მოუწევთ.
შეგახსენებთ, ალასკაზე ტრამპსა და პუტინს შორის გამართული შეხვედრის შემდეგ, აშშ-ის პრეზიდენტმა განაცხადა, რომ, მისი აზრით, უკრაინაში ომისგან პუტინი დაიღალა, თუმცა მშვიდობის მიღწევის საკითხი ჯერ კიდევ კითხვის ნიშნის ქვეშ რჩებოდა.
ევროპული სახელმწიფოების ლიდერების ნაწილი მიიჩნევს, რომ პუტინი უკრაინაში მშვიდობის მიღწევით სერიოზულად დაინტერესებული არ არის და ფიქრობენ, რომ უკრაინაში გამარჯვების შემთხვევაში პუტინი თავს დანარჩენ ევროპას დაესხმება.
თავად პუტინმა ჩინეთში გამართულ სამიტზე ევროპელი ლიდერების ამ მოსაზრებას არაკომპეტენტური ხალხის მიერ მოყოლილი „საშიში ისტორიები“ და „ისტერია“ უწოდა, რომლის მიზანიც რუსეთის მტრად შერაცხვაა. პუტინის განმარტებით, დასავლეთის მცდელობამ, დახმარებოდა NATO-ს, სრულად მოეცვა პოსტსაბჭოთა სივრცე, რუსეთი აიძულა, უკრაინაში ემოქმედა.
