მიმდინარე წლის თებერვალში საქართველოს სახელმწიფო ვალის მოცულობა 97 მლნ ლარით შემცირდა და 16.7 მილიარდი ლარი შეადგინა. დოლარში გამოსახული საგარეო სახელმწიფო ვალი 30 მლნ დოლარით შემცირდა, მაგრამ ლარის კურსის გამყარების გამო, ლარში გამოსახული საგარეო სახელმწიფო ვალი გაცილებით მეტად, 167 მლნ ლარით შემცირდა. თებერვალში საშინაო სახელმწიფო ვალი 70 მლნ ლარით გაიზარდა.
28 თებერვლის მდგომარეობით საგარეო სახელმწიფო ვალი 13.1 მილიარდი ლარი, ხოლო საშინაო სახელმწიფო ვალი 3.6 მილიარდი ლარია.
საქართველოს საგარეო სახელმწიფო ვალის 72% საერთაშორისო ორგანიზაციებზე მოდის. მათ შორის, საქართველოს ყველაზე მეტი ვალი – 4.7 მილიარდი ლარი მსოფლიო ბანკის მიმართ აქვს. ქვეყნების მიხედვით, საქართველოს ყველაზე მეტი ვალი – 731 მლნ ლარი გერმანიის მიმართ აქვს, შემდეგ მოდის იაპონია 547 მლნ ლარით.
საქართველოს სახელმწიფო ვალი მთლიანი შიდა პროდუქტის მიმართ დაახლოებით 44%-ია. 2016 წელს აღნიშნული მაჩვენებელი მშპ-ის 44.4%, ხოლო 2012 წლის ბოლოს 32.6% იყო.
