ამერიკულ საფონდო ბირჟებზე დაღმასვლის ძლიერი ტენდენცია გრძელდება – მხოლოდ სამ სავაჭრო დღეში უმსხვილესმა ტექნოლოგიურმა გიგანტებმა (Apple, Amazon, Microsoft, Google, Tesla, Meta, Nvidia) დაახლოებით 1 ტრილიონი აშშ დოლარის საბაზრო ღირებულება დაკარგეს.
გასულ 24 საათში აშშ-ის 500 უმსხვილესი კომპანიის აქციების ინდექსი (S&P 500) 3.2%-ით შემცირდა; Dow Jones-ის ღირებულება დაახლოებით 2%-ით დაეცა; ტექნოლოგიური კომპანიებით დატვირთული Nasdaq-ის ინდექსის ღირებულება კი 4.3%-ითაა შემცირებული.
მსოფლიოს უმსხვილესი კომპანიის, Apple-ის აქციების ფასი ერთთვიან ჭრილში 8.3%-ითაა შემცირებული, გასულ სამ სამუშაო დღეში კი მისი საბაზრო კაპიტალიზაცია დაახლოებით 220 მილიარდი აშშ დოლარით შემცირდა.
ერთ თვეში ელექტრომობილების მწარმოებელმა Tesla-მ ტრილიონიანი კომპანიის სტატუსი დაკარგა, რადგან მისი ღირებულება თითქმის 19.5%-ით, $815 მილიარდამდე შემცირდა.
Microsoft-მა ერთ თვეში ღირებულების 7.3% დაკარგა, მხოლოდ გასულ სამ დღეში კი – 189 მილიარდი აშშ დოლარი.
Google-ის მშობელმა კომპანია Alphabet-მა ერთ კვირაში $123 მილიარდი დაკარგა, ერთთვიან პერიოდში კი მისი საერთო საბაზრო კაპიტალიზაცია 12.7%-ითაა შემცირებული.
საფონდო ბირჟების ვარდნისა და არასახარბიელო კვარტალური შედეგების გასაჯაროების ფონზე, Amazon-ის აქციები 30 დღეში დაახლოებით 28%-ით დაეცა, მოკლევადიან პერიოდში კი მისი საბაზრო კაპიტალიზაცია 173 მილიარდი აშშ დოლარითაა შემცირებული.
იმედისმომცემი ფინანსური შედეგების მიუხედავად, დაღმასვლის ტენდენციას ვერ გადაურჩა Facebook-ისა და Instagram-ის მშობელი კომპანია Meta-ც, რომლის საბაზრო ღირებულება 70 მილიარდი აშშ დოლარითაა შემცირებული, ერთ თვეში მისი აქციები 9.4%-ით დაეცა.
ამერიკულ საფონდო ბირჟებზე აქციების მკვეთრად ვარდნის განმაპირობებელი მთავარი მიზეზი აშშ-ის ფედერალური რეზერვის მიერ მონეტარული პოლიტიკის გამკაცრება და რეფინანსირების განაკვეთის 0.5 პროცენტული პუნქტით გაზრდაა. საგულისხმოა, რომ გასულ კვირას FED-ის მიერ მიღებული გადაწყვეტილება თავდაპირველად ტრეიდერებმა და ინვესტორებმა დადებითად მიიღეს და ზოგადი ინდექსები საშუალოდ 3%-ით გაიზარდა, თუმცა მომდევნო დღის სავაჭრო სესია დაღმასვლის ძლიერი ტენდენციით დაიწყო, რომელიც დღემდე გრძელდება.
ინვესტორები შიშობენ, რომ ინფლაციის მოსათოკად ფედერალური რეზერვი კიდევ უფრო მეტად გაამკაცრებს მონეტარულ პოლიტიკას, რაც, საბოლოო ჯამში, ნეგატიურად იმოქმედებს კაპიტალის ბაზარზე, რადგან შედარებით სპეკულაციურ აქტივებზე მოთხოვნა შემცირდება, რისკის პრემია კი გაიზრდება. გარდა ამისა, FED-ს მოუწევს საკმაოდ რთული ბალანსის დაცვა, რათა ინფლაციის კონტროლის ფონზე ზედმეტად არ შეიზღუდოს ეკონომიკა და ქვეყანა სტაგნაციურ, ან კიდევ უფრო უარეს – სტაგფლაციურ მდგომარეობაში არ გადავიდეს.
გასათვალისწინებელი ფაქტორია რუსეთ-უკრაინის მიმდინარე ომი, ევროკავშირის მხრიდან რუსულ ნავთობზე ემბარგოს დაწესების შესაძლებლობა და ჩინეთში COVID-19-ის გავრცელების ფონზე ე.წ. ლოკდაუნების დაწესება. აღნიშნული ფაქტორები მნიშვნელოვნად ზრდის მიწოდების ჯაჭვების შეზღუდვისა და საქონლის გაძვირების რისკებს.
აღსანიშნავია, რომ სამშაბათის სავაჭრო სესია უოლ-სტრიტზე ჯერაც არ დაწყებულა, თუმცა ფიუჩერსულ კონტრაქტებში ზრდის ტენდენცია შეინიშნება: Nasdaq-ის სამომავლო კონტრაქტები 1.7%-ითაა გაზრდილი; 1.07%-ით მოიმატა S&P 500-ის ფიუჩერსების ღირებულებამ; Dow Jones-ის ფიუჩერსები კი 0.84%-ითაა გაზრდილი – აღნიშნული ფაქტი, შესაძლოა, იმაზე მიუთითებდეს, რომ პანიკური ვაჭრობით გამოწვეული მკვეთრი კორექცია გარკვეულ მოკლევადიან დასასრულს უახლოვდება, ბაზრის ზოგადი სენტიმენტი კი უაღრესად დათვისებურიდან ხარისებრისკენ ინაცვლებდეს.
