საქართველოს ყველაზე მაღალი შენობების რეიტინგი

საქართველოს უძრავი ქონების ბაზარზე ბოლო 5-7 წლის განმავლობაში მნიშვნელოვნად გაიზარდა საერთაშორისო ინვესტორთა და მყიდველთა ინტერესი. ყველაზე მეტად ეს ინტერესი მზარდია ბათუმის უძრავი ქონების ბაზრისადმი, სადაც არაერთი მაღალი კლასის საინვესტიციო პროექტი განხორციელდა. დღეს საქართველოს ყველაზე მაღალი შენობების მნიშვნელოვანი ნაწილი სწორედ ბათუმშია თავმოყრილი და მათ რამდენიმე წელიწადში კიდევ არაერთი 100 და 200 მეტრზე მაღალი ნაგებობაც შეემატება.

ამჟამად მშენებარე პროექტებს შორის ყველაზე მაღალია „ალიანს ცენტროპოლისის“ პროექტი, რომელიც 3 კოშკს, ბიზნესცენტრსა და სავაჭრო ცენტრს აერთიანებს. 57-სართულიანი პროექტის მთლიანი ფართობი 410,000 კვადრატული მეტრი უნდა იყოს, ხოლო მისი საინვესტიციო ღირებულება $300 მილიონზე მეტია.

რაც შეეხება უკვე დასრულებულ ნაგებობებს, მათ შორის ყველაზე მაღალია თბილისის სატელევიზიო ანძა, რომლის სიმაღლეც 275 მეტრია, თუმცა კონსტრუქციის დანიშნულება ჯერჯერობით მხოლოდ ტექნიკურია და მას მომავალში შესაძლოა კაფეები და რესტორნებიც დაემატოს. არსებულ ნაგებობებს შორის მეორე ადგილზეა ბათუმის „ლე მერიდიენი“, რომელიც 205 მეტრის სიმაღლისაა.

დასრულებას უახლოვდება ასევე ბათუმში მდებარე Azure Tower-ი, რომელიც 171 მეტრის სიმაღლისაა და 50 სართულისგან შედგება. ასევე თითქმის დასრულებულია „ალიანს ფრივილიჯის“ 182-მეტრიანი კოშკიც, რომელიც 53 სართულს აერთიანებს. პროექტის საინვესტიციო ღირებულება $80 მილიონი დოლარია.

თბილისის უძრავი ქონების ბაზარზე კი ყველაზე მაღალი ნაგებობა „აქსის თაუერსის“ ტყუპი კოშკებია, რომლებიც 37 სართულისგან შედგება და რომელთა სიმაღლე 149.6 მეტრია.

დაგეგმილ პროექტებს შორის ერთ-ერთი ყველაზე მაღალია „ბათუმი რივიერა“, რომელიც 5 100 მეტრზე მაღალ ნაგებობას გააერთიანებს, მათ შორის ყველაზე მაღალი 56-სართულიანი, 205 მეტრის სიმაღლის კოშკი იქნება.