საქართველოს ბანკი, როგორც ბიზნესის მხარდამჭერი ბანკი მიკრო, მცირე და საშუალო ბიზნესების გასაძლიერებლად ახალ პროექტს იწყებს. იმისთვის რომ ფინანსური ხელმისაწვდომობა კიდევ უფრო სწრაფი და მარტივი გახდეს ბიზნესებისთვის, ბანკი მათ აძლევს შესაძლებლობას, სწრაფად და მინიმალური დანახარჯებით გააციფრულონ და მოაწესრიგონ საბუღალტრო აღრიცხვის პროცესი. რაც მათ მისცემს მეტ შესაძლებლობას, ნაკლებ დროში, მარტივად დაიმტკიცონ ახალი ლიმიტი, დანარჩენი დრო კი საკუთარი ბიზნესის განვითარებას მოახმარონ.
სწორედ ამ მიზნით საქართველოს ბანკმა ბიზნესებისთვის შეიმუშავა ბუღალტერიის განვითარების პროგრამა, რომელიც მოიცავს 3 მიმართულებას − ბუღალტერიის გაციფრულებას, სრულ ბუღალტრულ სერვისსა და ფინანსური ინფორმაციის სწრაფ მიმოცვლას. პროექტი USAID-ის მხარდაჭერით ხორციელდება.
ბიზნესს შეუძლია მისი საჭიროებებიდან გამომდინარე ამ მიმართულებებიდან აირჩიოს ერთი ან რამდენიმე და ისარგებლოს მის ბიზნესზე მორგებული უპირატესობებით. კერძოდ: ბიზნესებს, რომლებსაც არ აქვთ გაციფრულებული ბუღალტრული ოპერაციები, შეუძლიათ ისარგებლონ ჩვენი პარტნიორი კომპანიების საბუღალტრო პროგრამებით როგორიცაა: Balance და OneSoft.
მიკრო, მცირე და საშუალო ზომის კომპანიებს, ვისაც სურს საბუღალტრო ოპერაციების გამარტივება, საქართველოს ბანკის პარტნიორი კომპანიები Nexia TA, Grant Thornton, AGIC, Ants, MOORE abc დაეხმარებიან. კერძოდ, ისინი ბიზნესებს სპეციალური, 20%-იდან 50% მდე ფასდაკლებით მოემსახურებიან.
ასევე, დაფინანსებაზე მეტი ხელმისაწვდომობისთვის ბიზნესებს ვთავაზობთ API სერვისს, რაც ინფორმაციის სწრაფად მიმოცვლას ღილაკზე ერთი თითის დაჭერით უზრუნველყოფს.
უფრო კონკრეტულად, ბუღალტერიის განვითარების პროგრამა ბიზნესს შემდეგ ბენეფიტებს სთავაზობს:
- სესხის მოთხოვნის სწრაფად დამუშავება,
- ლიმიტების წინასწარ დამტკიცება და მათი მარტივი მართვა;
- კომპანიაზე მორგებული პროდუქტის შეთავაზება.
„საქართველოს ბანკი, როგორც ბიზნესის მხარდაჭერაზე ორიენტირებული ბანკი, ცდილობს მუდმივად იკვლიოს ბიზნესის საჭიროებები. სწორედ ასეთი კვლევის შედეგად დავინახეთ, რომ ჩვენი პარტნიორი ბიზნესებისთვის პრობლემას წარმოადგენდა მოუწესრიგებელი საბუღალტრო ანგარიშგება. ეს მათთვის მნიშვნელოვანი დაბრკოლება იყო ფინანსური რესურსების მოძიების პროცესში. მოუწესრიგებელი დოკუმენტაცია არასწორ წარმოდგენას ქმნის კომპანიის შესაძლებლობებზე და ზღუდავს ფინანსურ ხელმისაწვდომობას. სწორედ იმიტომ, რომ კომპანიებს ეს პროცესი მაქსიმალურად გავუმარტივოთ და შევუქმნათ ახალი შესაძლებლობები, მათ ვთავაზობთ ჩვენს პარტნიორი კომპანიების მხარდაჭერას, რაც გულისხმობს საბუღალტრო რეპორტინგის მოწესრიგებასა და პროცესის მაქსიმალურ გაციფრულებას. გარდა ამისა, ჩვენ შევქმენით სპეციალური API სერვისი, რაც ბანკსა და კომპანიას შორის ინფორმაციის მარტივ მიმოცვლასა და პროცესის გაციფრულებას ისახავს მიზნად. გვჯერა რომ რაც უფრო მეტად მოვუსმენთ ჩვენს მომხმარებელს, მით მეტად შევძლებთ მათი ინტერესების დაკმაყოფილებას. ჩვენ არ ვჩერდებით და ვაგრძელებთ ბიზნესისთვის მათ საჭიროებებზე მორგებული პროდუქტებისა თუ სერვისების შეთავაზებას“,- განაცხადა საქართველოს ბანკის მცირე და საშუალო ბიზნესის მიმართულების ხელმძღვანელმა, ზურაბ მასურაშვილმა.
