ხელოვნური ინტელექტისა და ავტომატიზაციის სწრაფი განვითარების ფონზე, გლობალური შრომითი ბაზარი დიდ ტრანსფორმაციას განიცდის. ციფრული ტრანსფორმაცია ორგანიზაციებს აიძულებს, საკუთარი სტრუქტურები ტექნოლოგიური ცოდნის მქონე კადრებით შეავსონ.
მსოფლიო ეკონომიკური ფორუმის (WEF) ანგარიშზე — Future of Jobs Report 2025 — დაყრდნობით, 2025 წლიდან 2030 წლამდე პერიოდში, პოტენციურად ყველაზე სწრაფად მზარდი პროფესიები თითქმის სრულად ტექნოლოგიურ სფეროსთან არის დაკავშირებული, მათ შორის დიდი მონაცემების (Big Data) მართვის, ხელოვნური ინტელექტისა და რობოტიკის მიმართულებით სამუშაოებთან.
მაშინ, როცა კომპანიები სულ უფრო მეტად ციფრულდება, მათთვის კიბერუსაფრთხოება გარდაუვალი პრიორიტეტი ხდება და ისინი ამ მიმართულებით ინვესტიციებსაც მნიშვნელოვნად ზრდიან. შესაბამისად, იზრდება მოთხოვნა კიბერუსაფრთხოების სპეციალისტებზე, მონაცემთა მეცნიერებისა და უსაფრთხოების ანალიტიკის მიმართულებით მომუშავე კადრებზე.
აღსანიშნავია, რომ მსოფლიო ეკონომიკური ფორუმის ანგარიშში მოყვანილი პირველი 15 პროფესიიდან თითქმის ყველა AI-სა და ტექნოლოგიებთან არის დაკავშირებული. მათ შორის WEF-ის პროგნოზით, 2030 წლისთვის ყველაზე სწრაფად მზარდი პროფესია დიდი მონაცემების სპეციალისტი იქნება — ზრდის პროგნოზი 110%-ს აღწევს.
95%-იანი ზრდის პროგნოზით მეორე პოზიციას ფინტექ-ინჟინრების პროფესია იკავებს, მესამე ადგილზე კი AI და მანქანური სწავლების სპეციალისტის პროფესიაა, ზრდის 85%-იანი პრOგნოზით.
| პროფესიის დასახელება | ზრდის პროგნოზი |
|---|---|
| დიდი მონაცემების (Big Data) სპეციალისტები | 110% |
| ფინტექ-ინჟინრები | 95% |
| AI-ისა და მანქანური სწავლების სპეციალისტები | 85% |
| პროგრამული უზრუნველყოფისა და აპლიკაციების დეველოპერები | 60% |
| უსაფრთხოების მართვის სპეციალისტები | 55% |
| მონაცემთა საცავების სპეციალისტები | 50% |
| ავტონომიური მანქანებისა და ელექტრომობილების სპეციალისტები | 45% |
| UI- და UX-დიზაინერები | 45% |
| მსუბუქი სატვირთოსა და საკურიერო მომსახურების მძღოლები | 45% |
| ინტერნეტ-მოწყობილობების (IoT) სპეციალისტები | 40% |
| მონაცემთა ანალიტიკოსები და მეცნიერები | 40% |
| გარემოსდაცვითი ინჟინრები | 40% |
| ინფორმაციული უსაფრთხოების ანალიტიკოსები | 40% |
| DevOps-ინჟინრები | 40% |
| განახლებადი ენერგიის ინჟინრები | 40% |
