სამი მეგობრის კერძო საუბრებისას დაბადებული პროექტი, ოთხწლიანი წარმატებული კარიერის შემდეგ უკვე საერთაშორისო არტბაზრობებზე იმკვიდრებს ადგილს.
ჰობის დონეზე დაწყებული საქმე, დღეს 200 000-ლარიან მოგებაზე გადის.
ნათია ბუკია, სალომე ვახანია და ნათია ჩხარტიშვილი – Project ArtBeat-ის გუნდი, გოგონები, რომლებმაც საქართველოსა და კავკასიის რეგიონში მოღვაწე ხელოვანები საერთაშორისო აუდიტორიას გააცნეს.
Forbes Women-ს Project ArtBeat-ის თანადამფუძნებელი ნათია ბუკია ესაუბრა.
რატომ გადაწყდა ასეთი სივრცის შექმნა და ვისთვისაა განკუთვნილი ეს ონლაინპლატფორმა?
გლობალურ არტსისტემაში საქართველო და კავკასიის რეგიონი არ არის საკმარისად ჩართული, თუმცა ის საინტერესო, მრავალფეროვან ხელოვნებას სთავაზობს მსოფლიოს. რეგიონში მიმდინარე პროცესების, ადგილობრივი არტისტების შესახებ ინფორმაცია საკმაოდ იშვიათად და გაფანტულად მიეწოდება საერთაშორისო აუდიტორიას, ჩვენი მიზანი კი ქართველი ხელოვანების მსოფლიოსთვის გაცნობაა, ჩვენ ვხედავთ მათში პოტენციალს და გვჯერა მათი წარმატების, ამიტომ Project ArtBeat-ის გუნდი საერთაშორისო აუდიტორიას სთავაზობს პროფესიონალების მიერ შერჩეულ ქართველი არტისტების ნამუშევრებს. გვინდა, რომ ისინი გასცდნენ ლოკალურ დონეს და მოედონ საერთაშორისო ბაზრობებს. ონლაინსივრცე კი ამისთვის საუკეთესოდ ხელმისაწვდომი და გაცნობის კარგი საშუალებაა
თქვენი ერთ-ერთი პროექტია Moving Gallery როგორ გაჩნდა ამ სტილის გალერეის შექმნის იდეა?
Moving Gallery by Project ArtBeat-ის იდეამაშინ გაგვიჩნდა, როცა ონლაინგალერეაზე ვფიქრობდით… ფაქტობრივად, ამ ორი საქმის კეთების იდეა ერთდროულად დაიბადა. ეს არის კონტეინერი, რომელიც ჩვენი პროექტის ერთ-ერთი საგამოფენო სივრცეა. Moving Gallery წელიწადში რამდენჯერმე წარმოადგენს Project ArtBeat-ის თანამედროვე ხელოვნების პროექტებს. მოძრავი გალერეა-კონტეინერი განთავსდება სხვადასხვა ადგილას მთელი საქართველოს მასშტაბით. უკვე 10 -ზე მეტი გამოფენა გაკეთდა. ჩვენი მიზანი იყო, ქუჩაში მოსიარულე ადამიანები ხელოვნებას გვეზიარებინა.ეს გახლავთ მოძრავი გალერეის მთავარი არსი და დანიშნულება. ვფიქრობთ, გაამართლა, რადგან ინტერესი და ხელოვნების ახალი ნიმუშების გაცნობის სურვილი სულ არის, განსაკუთრებით – რეგიონებში.
მოლოდინი, ბიზნესის დაწყებისას რომ გქონდათ, გამართლდა?
დასაწყისში არ გვიფიქრია ასეთ სერიოზულ მასშტაბებზე გასვლა. ეს იყო ის სფერო, რომელიც უბრალოდ მოგვწონდა. შესაბამისად, არც ბიზნესგეგმა გვქონდა… მაგრამ დღეს იმდენად გაამართლა ჩვენმა დაწყებულმა საქმემ, უკვე წელიწადში რამდენჯერმე საერთაშორისო არტბაზრობებზე ვხვდებით და საკმაოდ წარმატებული შედეგებით ვბრუნდებით საქართველოში.
ამ ოთხი წლის მანძილზე ვისი ნამუშევარი გაგიყიდიათ ყველაზე ძვირად?
არსებობს ასეთი საკმაოდ მაღალი კლასის ბაზრობა, არტ დუბაი, სადაც მოხვედრა საკმაოდ რთულია, რადგან უყურებენ შენს რეპუტაციას, როგორ წინადადებას წარადგენ და ამის შემდეგ ხდება მიღება… გადავლახეთ ეს ბარიერი და პირველად შარშან მოვხვდით… სწორედ მანდ იყო, კონსტანტინე მინდაძის ნამუშევარი რომ გავყიდეთ 20 000 ამერიკულ დოლარად. ეს არის ყველაზე ძვირად შეფასებული ნამუშევარი, ჯერჯერობით რაც გაგვიყიდია… მარტში კიდევ ერთხელ უნდა გავიდეთ არტ დუბაის ბაზრობაზე და წელსაც კიდევ ერთხელ გავიტანთ კონსტანტინე მინდაძის ნამუშევრებს და ასევე ლადო ფოჩხუას ნამუშევრებს. ვნახოთ, რა შედეგით დავბრუნდებით.
რა არის თქვენი სამომავლო გეგმები?
ჩვენი გეგმები ჯერჯერობით მხოლოდ გამოფენებს ეხება… რა თქმა უნდა, განვაგრძობთ კონტეინერში გამოფენებსაც, ამას დიდ ყურადღებას ვაქცევთ… მარტში კიდევ ერთი არტბაზრობა გველოდება, იქ უნდა წავიდეთ, აქაც რამდენიმე გამოფენაა უკვე დაგეგმილი…მოკლედ, აქტიური წელი გველის.
