გასული წელი დატვირთული აღმოჩნდა როგორც პოლიტიკური, ისე სპორტული თუ გასართობი სფეროს სიახლეებით. პლატფორმა Visual Capitalist-მა 2024 წელი შეაჯამა და ის ძირითადი საკითხები თუ კონკრეტული პირები გამოავლინა, რომელთაც წლის განმავლობაში საძიებო ქსელ Google-ის გლობალური მომხმარებელი ყველაზე ხშირად „გუგლავდა“.
ქვემოთ წარმოდგენილი რეიტინგი Google Trends Year in Search 2024-ის მიმოხილვას ეფუძნება და 2024 წლის პირველი იანვრიდან 23 ნოემბრამდე მონაკვეთს მოიცავს და იმ პერიოდსაც წარმოგვიდგენს, როდესაც ძიების ინტერესი პიკს აღწევს თითოეული თემისთვის. როგორც ირკვევა, 2024 წელს ყურადღების ცენტრში საერთაშორისო სპორტული მოვლენები მოექცა. მათ შორის იყო სამხრეთ ამერიკისა და ევროპის საფეხბურთო ჩემპიონატები, კრიკეტი და ინგლის-ინდოეთის დაპირისპირებების სერია.
განსაკუთრებული პოპულარობა კრიკეტმა 2024 წლის ICC მამაკაცთა T20 ჩემპიონატის პერიოდში მოიპოვა, რომელიც 1-29 ივნისს გაიმართა. ეს იყო პირველი დიდი ICC ტურნირი, რომელსაც ამერიკის შეერთებულმა შტატებმა უმასპინძლა. ამ შემთხვევაში ინგლისისა და ინდოეთის კრიკეტის გუნდები ერთმანეთს ნახევარფინალში დაუპირისპირდნენ, რომელიც ინდოეთის გამარჯვებით დასრულდა.
ივნისსა და ივლისში საერთაშორისო ყურადღებამ ძირითადად ევროპისა და სამხრეთ ამერიკის საფეხბურთო ჩემპიონატებისაკენ გადაინაცვლა, რომლებიც, შესაბამისად, გერმანიასა და ამერიკის შეერთებულ შტატებში ჩატარდა. საფეხბურთო ჩემპიონატებს მოჰყვა პარიზში გამართული ოლიმპიური თამაშები.
სპორტული საკითხების მიღმა, საზოგადოების მაღალი ინტერესი დაიმსახურა უელსის პრინცესა ქეით მიდლტონის ჯანმრთელობის მდგომარეობამ, რომელსაც მარტში სიმსივნის დიაგნოზი დაუსვეს. ოქტომბერში მთავარი თემა One Direction-ის ყოფილი წევრის ლიამ პეინის გარდაცვალება იყო, ნოემბერში კი ყურადღების ცენტრში აშშ-ის საპრეზიდენტო არჩევნები და დონალდ ტრამპის გამარჯვება მოექცა.
ტრამპის მიმართ ინტერესი განსაკუთრებით 13 ივლისს, პენსილვანიაში წინასაარჩევნო კამპანიისას მასზე განხორციელებული თავდასხმის შემდეგ გაიზარდა. ცნობისთვის, ტრამპთან ერთად, ყველაზე ხშირად დაძებნადი ადამიანების ხუთეულში მოხვდნენ აშშ-ის პრეზიდენტი ჯო ბაიდენი და დემოკრატების საპრეზიდენტო კანდიდატი კამალა ჰარისი. რაც შეეხება ახალ ამბებს, ამ კატეგორიაში, თემატურად, პირველ ადგილზე აშშ-ის საპრეზიდენტო არჩევნებია, რომელსაც რეკორდული სიცხეები და ოლიმპიადა მოჰყვება.
| საკითხი | ძიების პიკი | |
|---|---|---|
| 1 | კოპა ამერიკა | ივნისი 30 – ივლისი 6 |
| 2 | UEFA-ს ევროპის საფეხბურთო ჩემპიონატი | ივნისი 23 – 29 |
| 3 | ICC კაცთა T20 მსოფლიო თასი | მაისი 26 – ივნისი 1 |
| 4 | ინდოეთი vs ინგლისი | თებერვალი 18 – 24 |
| 5 | ლაიამ პეინი | ოქტომბერი 13 – 19 |
| 6 | დონალდ ტრამპი | ნოემბერი |
| 7 | ინდოეთი vs ბანგლადეში | სექტემბერი 15 – 21 |
| 8 | iPhone 16 | სექტემბერი 8 – 14 |
| 9 | ოლიმპიადა | აგვისტო 4 – 10 |
| 10 | უელსის პრინცესა, ქეით მიდლტონი | მარტი 17 – 23 |
