სტატისტიკის ეროვნულმა სამსახურმა 2025 წლის II კვარტალის გამყვანი ტურიზმის სტატისტიკა გამოაქვეყნა. ანგარიშის თანახმად, აღნიშნულ პერიოდში საქართველოს ტერიტორიიდან საზღვარგარეთ საერთო ჯამში ქვეყნის რეზიდენტი* მოგზაურების 715.1 ათასი გასვლა დაფიქსირდა. ეს 2024 წლის II კვარტალთან შედარებით 2.5%-ით მეტია.
მათ შორის, საქართველოს რეზიდენტი ვიზიტორების** მიერ საზღვარგარეთ განხორციელებულმა ვიზიტებმა 564.3 ათასი შეადგინა, რაც გასული წლის ანალოგიური პერიოდის მაჩვენებელს 0.4%-ით აღემატება.
საქსტატის ანგარიშის თანახმად, 2025 წლის II კვარტალში საქართველოს რეზიდენტი ვიზიტორების მიერ საზღვარგარეთ 385.8 ათასი ტურისტული ტიპის ვიზიტი განხორციელდა. ეს წლიურ ჭრილში 7.1%-იანი ზრდაა.
ვიზიტების უმრავლესობა, 48.3%, საქართველოს რეზიდენტ 31-50 წლის ვიზიტორებზე მოდის. აქვე აღსანიშნავია, რომ გასულ კვარტალში საქართველოდან ვიზიტების უმრავლესობა თურქეთსა და რუსეთის ფედერაციაში განხორციელდა – შესაბამისად, 201.3 ათასი და 106.3 ათასი ვიზიტი.
რაც შეეხება ვიზიტებისას გაწეულ ხარჯებს, გასულ კვარტალში ეს მაჩვენებელი 582.8 მილიონ ლარს გაუტოლდა და წინა წლის ანალოგიურ მაჩვენებელს 1.9%-ით ჩამორჩა. ვიზიტზე საშუალო ხარჯი 2024 წლის II კვარტალთან შედარებით 2.3%-ით, 1 032.7
ლარამდე შემცირდა.
საანგარიშო პერიოდში ვიზიტებისას გაწეული ხარჯების დიდი ნაწილი საყიდლებზე, საკვებსა და სასმელზე, ასევე განთავსებაზე მოდის.
| ხარჯების კატეგორია | ხარჯი (მლნ ლარი) | წილი (%) | საშუალო ხარჯი ვიზიტზე (ლარი) |
|---|---|---|---|
| საყიდლები | 229.9 | 39.5 | 407.5 |
| საკვები და სასმელი | 155.5 | 26.7 | 275.5 |
| განთავსება | 78.6 | 13.5 | 139.4 |
| ადგილობრივი ტრანსპორტი | 63.5 | 10.9 | 112.5 |
| გასართობი, გამაჯანსაღებელი, კულტურული და სპორტული ღონისძიებები | 23.9 | 4.1 | 42.3 |
| სხვა | 31.3 | 5.4 | 55.5 |
| სულ | 582.8 | 100.0 | 1 032.7 |
წყარო: საქსტატი
*ტურიზმის მსოფლიო ორგანიზაციის მეთოდოლოგიის თანახმად, მოგზაური არის ნებისმიერი ასაკის პირი, რომელიც გადაადგილდება სხვადასხვა გეოგრაფიულ არეალს შორის ნებისმიერი ხანგრძლივობითა და მიზნით.
**ვიზიტორი არის 15 წლის ან უფროსი ასაკის საქართველოს რეზიდენტი მოგზაური, რომელმაც განახორციელა ვიზიტი საკუთარი ჩვეული გარემოდან სხვა ქვეყნის ტერიტორიაზე ერთ წელზე ნაკლები დროით (გარდა შემდეგი კატეგორიებისა: დასაქმების მიზნით წასულები, საზღვარგარეთ აკრედიტებული დიპლომატიური ან საკონსულო ოფიცრები, შეიარაღებული ძალების წევრები ან მათ კმაყოფაზე მყოფი პირები, აგრეთვე პირები, რომლებიც ხშირად კვეთენ საზღვარს).
