ამერიკის შეერთებული შტატების პრეზიდენტის, დონალდ ტრამპის უმცროსი ვაჟი, ბარონ ტრამპი, განსაკუთრებით პოპულარული ფიგურა წინასაარჩევნო პერიოდისა და მამის წლევანდელი ინაუგურაციის შემდგომ გახდა. ამერიკული Forbes-ის შეფასებით, ბარონი, რომელიც ჯერ მხოლოდ 19 წლისაა, $150 მილიონზე მეტი ღირებულების ქონებას ფლობს, რომლის უმეტესი ნაწილიც კრიპტოვალუტაში ინვესტირებას უკავშირდება.
ბარონ ტრამპმა, მამასთან და უფროს ძმებთან ერთად, 2024 წელს კრიპტოვალუტის კომპანია World Liberty Financial-ი დააარსა. აშშ-ის საპრეზიდენტო არჩევნებში დონალდ ტრამპის გამარჯვების შემდეგ, World Liberty Financial-ში ინვესტიციები მნიშვნელოვნად გაიზარდა. Forbes-ის შეფასებით, კრიპტოკომპანიის ზრდამ ტრამპის ოჯახის ქონება $1.5 მილიარდით გაზარდა. ამ თანხის დაახლოებით 10% კი, შესაბამისად, $150 მილიონი, ბარონ ტრამპის საკუთრებაა.
World Liberty-ში ტრამპის ოჯახის წილს კომპანია DT Marks Defi LLC განკარგავს, რომელსაც 2024 წლის სექტემბერში 22.5 მილიარდი $WLFI ტოკენი გადაეცა. რეკლამირებისა და პროექტებისთვის ტრამპის სახელის გამოყენებისთვის კი კომპანიამ World Liberty-ის პირველი, $15-მილიონიანი შემოსავლიდან დამატებით 75%-იც მიიღო. პრეზიდენტის ფინანსური ინფორმაციის თანახმად, მიმდინარე წლის დასაწყისისთვის, ტრამპს DT Marks Defi LLC-ის 70% ეკუთვნოდა, ხოლო დარჩენილი 30% მის სამ ვაჟს შორის თანაბრად ნაწილდებოდა. ანგარიშში პრეზიდენტის სამივე ვაჟი კომპანიის თანადამფუძნებლადაა მოხსენიებული.
თუმცა ამერიკულმა Forbes-მა ბარონ ტრამპის მიერ მიღებული World Liberty-ის 2.25 მილიარდი ტოკენი, თავდაპირველად ნული ღირებულებით შეაფასა, რადგან მათი გაყიდვა ან გადაცემა შეუძლებელი იყო. აგვისტოში, ტოკენების მფლობელებმა $WLFI-ის მონეტების 20%-ის განბლოკვასაც მხარი დაუჭირეს, თუმცა ეს გამონაკლისი დამფუძნებლებს, მათ შორის ტრამპის ოჯახის წევრებს, არ შეხებიათ.
ამჟამად მიმოქცევაში არსებული შეზღუდული რაოდენობის ტოკენები დაახლოებით $0.20-ად ივაჭრება. თუმცა იმის გამო, რომ ტოკენების ნაწილი დაბლოკილია, ამერიკული Forbes-ი მათ ღირებულებას მნიშვნელოვნად ამცირებს. ამ შეზღუდვის გათვალისწინებით, Forbes-ის გათვლებით, ბარონის სავარაუდო 10%-იანი წილი ახლა დაახლოებით $45 მილიონის ღირებულებისაა.
უშუალოდ ტოკენების გარდა, ბარონის ქონებას Forbes-ი კომპანიის პარტნიორობებიდან მიღებულ თანხასაც ამატებს. კერძოდ, 2024 წლის არჩევნებში დონალდ ტრამპის გამარჯვების შემდეგ, კრიპტოინვესტორმა ჯასტინ სანმა პროექტში $75 მილიონი დააბანდა. ინვესტიციას კი ტოკენების გაყიდვების მკვეთრი ზრდა მოჰყვა. 2025 წლის აგვისტოსთვის World Liberty-მ დაახლოებით 675 მილიონი დოლარის ღირებულების ტოკენები გაყიდა, ხოლო ამ პარტნიორობაში ბარონის წილი, გადასახადების გამოკლებით, $38 მილიონად შეფასდა.
ამასთან ერთად კი მარტში, World Liberty-მ კიდევ ერთი პროდუქტი გაუშვა. სტეიბლკოინი, სახელწოდებით USD1, რომელიც აშშ დოლარზეა მიბმული. ვალუტის საბაზრო კაპიტალიზაცია დაახლოებით $2.6 მილიარდს შეადგენს, რაც ნიშნავს, რომ მის უკან მდგომი ბიზნესი დაახლოებით $880 მილიონის ღირებულებისაა. არსებული ცნობებით, ტრამპების ოჯახის ერთ-ერთი სუბიექტი, ამ საწარმოს 38%-ს ფლობს, ხოლო Forbes-ის გამოთვლით, ბარონის წილი შესაძლოა $34 მილიონს აღწევდეს.
დამატებით კი, World Liberty-ისა და ჯანდაცვის კომპანია Alt5 Sigma-ს პარტნიორობამ ბარონს $41 მილიონი მოუტანა. გარიგების პირობებით, Alt5-მა დაახლოებით 717 მილიონი აშშ დოლარი World Liberty Financial-ის ტოკენების პირდაპირ შესაძენად გამოიყენა. ამ თანხიდან $500 მილიონზე მეტი ტრამპების ოჯახის კომპანიას, ხოლო პირადად ბარონს $41 მილიონი გადაეცა.
