ციფრული ტექნოლოგიების განვითარების პარალელურად ადამიანები საკუთარი ცხოვრების გაუმჯობესებასა და გამარტივებაზე ზრუნავენ. სწორედ ამ მიზანს ემსახურება „თიბისის“ ბიზნესის მობაილბანკის აპლიკაციის iOS დეველოპერის, ლევან კობერიძის იდეა, რომელიც მრავალჯერადი გამოყენების სავიზიტო ბარათის, PKey-ს შექმნას გულისხმობს. აღსანიშნავია, რომ მის დასკანირებას NFC-ით ან QR კოდით შეძლებთ. სტარტაპერის თქმით, შემოთავაზებული პროდუქტი მომავალში ქაღალდის სავიზიტო ბარათებს ჩაანაცვლებს და უფრო პრაქტიკული გამოსაყენებელი იქნება.
PKey-ს შექმნის იდეამ ყურადღება ძალიან მალე მიიპყრო. ამას ისიც ადასტურებს, რომ ცოტა ხნის წინ ლევანი „სტარტაპ დეკრეტი 2021-ის“ გამარჯვებული გახდა. ს „თიბისის“ ეს კონკურსი კომპანიის თანამშრომლებს ინოვაციური იდეების განხორციელებაში ეხმარება. PKey-ს სავიზიტო ბარათის უპირატესობებისა და ფუნქციების შესახებ, ასევე სხვა მნიშვნელოვან დეტალებზე ლევან კობერიძე გვესაუბრა.
ლევან, უფრო დეტალურად გვითხარით, რა არის PKey?
PKey მრავალჯერადი გამოყენების ჭკვიანი სავიზიტო ბარათია, რომელსაც ერთი შეხებით შეუძლია მობილურში ბარათის მფლობელის საკონტაქტო დეტალების გახსნა. აღსანიშნავია, რომ ის კონტაქტების ბაზას ლოკაციების მიხედვით შექმნის და მომხმარებლებს ბიზნესანალიტიკას შესთავაზებს. PKey-ს ინტეგრაციებით ზემოხსენებული ინფორმაციის დაკავშირება 3000-ზე მეტ ავტომატიზაციისა და CRM-სერვისთანაა შესაძლებელი. უნდა ითქვას, რომ ჭკვიანი სავიზიტო ბარათის მუშაობისთვის სპეციალური აპლიკაციის ქონა საჭირო არ არის.
როგორ გაჩნდა PKey-ს შექმნის იდეა? რით იქნება ის ჩვეულებრივი სავიზიტო ბარათებისგან განსხვავებული?
ტრადიციული ქაღალდის სავიზიტო ბარათები ერთჯერადი გამოყენებისაა. გარდა ამისა, უამრავი ასეთი ბარათის ერთად ტარება გიწევს, რომელთა დიდი ნაწილიც საბოლოოდ უსარგებლო აღმოჩნდება ხოლმე. ოფიციალური სტატისტიკის მიხედვით, მას შემდეგ, რაც საჭირო ინფორმაციასა და საკონტაქტო დეტალებს მობილურში ხელით გადაიტანენ, რაც საკმაოდ არაკომფორტულია, ადამიანების 88% მათ თავიდან იშორებს.
PKey-ს შექმნის იდეაც სწორედ ამ მიზეზით გაჩნდა. დროის მოკლე მონაკვეთში ბევრ ადამიანთან შეხვედრა მომიწია. ისინი როგორც კომპანიების, ასევე საკუთარი (personal) ბრენდის წარმომადგენლები იყვნენ და ყველამ თავისი სავიზიტო ბარათი გადმომცა. მათი ერთად ტარება ჩემთვის საკმაოდ არაკომფორტული იყო. გარდა ამისა, რამდენიმე საჭირო კონტაქტის მობილურში ხელით გადატანა მომიწია. საბოლოოდ, ამ ბარათების უმეტესობა ნაგავში აღმოჩნდა.
როგორ აპირებთ თქვენი პროდუქტით იმ მომხმარებლების დაინტერესებას, რომელთათვისაც თუნდაც ერთი სავიზიტო ბარათის ტარება დისკომფორტს წარმოადგენს?
ასეთი მომხმარებლები ალტერნატივად ციფრული სავიზიტო ბარათის გამოყენებას შეძლებენ. მათ PKey მობილურში ექნებათ ჩატვირთული და ნებისმიერ დროს შეძლებენ მასზე არსებული ინფორმაციის გაზიარებას.
ასევე მომავალში პროდუქტი შესაძლებელია, ბარათის გარდა სხვა ფორმითაც იყოს წარმოდგენილი, იქნება ეს სტიკერი, სამაჯური თუ ბეჭედი.
რა ტექნოლოგია იქნება გამოყენებული ჭკვიანი სავიზიტო ბარათების დასამზადებლად? დაახლოებით რა პერიოდში შეძლებთ იდეის ხორცშესხმას?
ჭკვიანი სავიზიტო ბარათების დამზადება ხდება სპეციალური პრინტერებით, რომლებიც როგორც NFC-ინფორმაციის დაპროგრამებას, ასევე PKey-ზე მომხმარებლის მიერ არჩეული დიზაინის გადატანის საშუალებას იძლევა.
ზუსტი ვადების დასახელებას ვერ შევძლებ, თუმცა, ვფიქრობ, იდეის რეალობად ქცევას რამდენიმე თვე დასჭირდება. ამისთვის ტექნიკური მხარდაჭერის უზრუნველყოფა იქნება საჭირო, რაც ვებპლატფორმის შექმნასა და შეკვეთების ავტომატიზაციის გამართვას გულისხმობს.
რა ფუნქციებით იქნება აღჭურვილი PKey? როგორ შეძლებენ ჭკვიანი სავიზიტო ბარათის გამოყენებას მისი მფლობელები?
PKey-ს ბარათზე მომხმარებელს შეეძლება, აირჩიოს და შემდეგ პლატფორმიდან მართოს საკონტაქტო ინფორმაციის გაცვლის სხვადასხვა რეჟიმი; შექმნას მასზე მორგებული საკონტაქტო პროფილი; იხილოს ანალიტიკა; დააექსპორტოს შეგროვებული კონტაქტები ან „დასინქოს“ ეს ინფორმაცია CRM და ავტომატიზაციის სერვისებთან.
აქვე დავამატებ, რომ იმ შემთხვევაში, თუ მობილურს არა აქვს NFC-მხარდაჭერა, ყველა PKey-ს ბარათზე დატანილი იქნება QR-კოდი, რომელიც იმავე ფუნქციას შეასრულებს.
იდეის განხორციელების შემდეგ რა გეგმები გაქვთ? ვისთვის აპირებთ პროდუქტის შეთავაზებას?
რადგან სტარტაპი ქართულია, ამიტომ ერთ-ერთი მთავარი მიზანი – ტრადიციული ბარათების PKey-ს ჭკვიანი ბარათებით ადგილობრივად ჩანაცვლებაა. ამის შემდეგ სამიზნე არეალი ეტაპობრივად გაიზრდება და თანდათან მეზობელ ქვეყნებს, ევროპასა და მსოფლიოს სხვადასხვა რეგიონს მოიცავს. MVP ფაზის დასრულების შემდეგ, პლატფორმა გლობალურად გაეშვება. Pkey-ს ბარათის შეკვეთა ნებისმიერი ადგილიდან უნდა იყოს შესაძლებელი.
გლობალურ ბაზარზე არსებული PKey-ს ანალოგების გამოცდილების გათვალისწინებით, როგორ ფიქრობთ, რამდენად მოთხოვნილი და მოგებიანი იქნება ამ პროდუქტის წარმოება?
დღეს გლობალურ ბაზარს მსგავს პროდუქტს რამდენიმე წარმატებული სტარტაპი სთავაზობს. ერთ-ერთი ასეთი Popl-ია, რომელმაც 700,000 ბარათის გაყიდვა შეძლო. მათი ჯამური ღირებულება 2.7 მილიონი აშშ დოლარს შეადგენს. კიდევ ერთი ასეთი სტარტაპი Linq-ია, რომელმაც მხოლოდ 2020 წლისთვის პროდუქტის გაყიდვებით დაახლოებით 281,000 აშშ დოლარის მოცულობის შემოსავალი მიიღო. ვფიქრობ, რომ, მიმდინარე სურათით, საერთაშორისო ბაზარზე PKey საკმაოდ კონკურენტუნარიანი იქნება.
