Numbeo-ს ცხოვრების ხარისხის ინდექსი გვიჩვენებს, როგორ აღიქვამენ სხვადასხვა ქვეყნის მოქალაქეები საცხოვრებელ პირობებს საკუთარ ქვეყანაში. ინდექსი ეფუძნება მოსახლეობის მიერ შევსებულ მონაცემებს და მოიცავს ისეთ ფაქტორებს, როგორიცაა: მსყიდველუნარიანობა; დაბინძურება; საცხოვრებლების ფასებისა და შემოსავლის თანაფარდობა; ცხოვრების ღირებულება; უსაფრთხოება; ჯანდაცვა; საგზაო დატვირთულობა; კლიმატი.
აღსანიშნავია, რომ 2025 წლისთვის სურათი საგრძნობლად შეიცვალა 2015 წელთან შედარებით. 30 ქვეყნიდან, რომლებიც სიაში მოხვდნენ, ზოგიერთმა პოზიცია მნიშვნელოვნად გაიუმჯობესა, ზოგმა კი პირიქით – მკვეთრად გაიუარესა.
ცხოვრების ხარისხის მიხედვით ევროპის ქვეყნები კვლავაც ლიდერობენ. 2025 წელს პირველ ადგილზე ლუქსემბურგია, ხოლო ნიდერლანდები 12 პოზიციით დაწინაურდა და მეორე ადგილზე გადავიდა. ფინეთი, შვეიცარია, დანია და ნორვეგია კი კვლავაც რჩებიან მოწინავე პოზიციებზე.
თუმცა შვედეთმა, რომელიც 2015 წელს მე-3 ადგილზე იყო, 2025 წელს მე-13 პოზიციაზე გადაინაცვლა. ამ ცვლილების ერთ-ერთი მთავარი მიზეზი ქვეყანაში ორგანიზებული დანაშაულის მკვეთრი ზრდაა – Bloomsbury Intelligence and Security Institute-ის მონაცემებით, 2024 წლისთვის 62,000-მდე ადამიანი დაკავშირებული იყო კრიმინალურ ქსელებთან, რომლებიც ძირითადად ნარკოტიკებით ვაჭრობით, ადამიანთა ტრეფიკინგითა და ფულის გათეთრებით არიან დაკავებულნი.
სიაში ყველაზე საგრძნობლად კი ის ქვეყანა დაქვეითდა, რომელიც წლების განმავლობაში ცხოვრების ხარისხის სიმბოლოდ მიიჩნეოდა – კანადა. 2015 წელს ის მე-9 პოზიციაზე იყო, ხოლო 2025 წლისთვის 27-ე ადგილზე გადავიდა. რეიტინგში კანადის დაქვეითებაზე იმოქმედა იმან, რომ ქვეყანაში სახლების ფასები ბევრად უფრო სწრაფად იზრდება, ვიდრე მოსახლეობის შემოსავლები. 2024 წლის გამოკითხვამ აჩვენა, რომ კანადელთა 45% „ძალიან შეშფოთებულია“ საცხოვრებლის შეძენის გაუარესებული შესაძლებლობით.
მეორე მიზეზი ჯანდაცვის სფეროს უკავშირდება – პაციენტს სამედიცინო მკურნალობის მიღებამდე საშუალოდ 30 კვირა უწევს ლოდინი. შედარებისთვის, 1993 წელს ეს მაჩვენებელი მხოლოდ 9.3 კვირა იყო.
აღსანიშნავია, რომ Numbeo-ს ცხოვრების ხარისხის ინდექსში, გამოკვლეულ 89 ქვეყანას შორის, საქართველო 56-ე ადგილს იკავებს.
ტოპ-30 ქვეყანა ცხოვრების ხარისხის მიხედვით:
| ადგილი (2015) | ქვეყანა (2015) | ინდექსი | ადგილი (2025) | ქვეყანა (2025) | ინდექსი |
|---|---|---|---|---|---|
| 1 | შვეიცარია | 222.9 | 1 | ლუქსემბურგი | 218.2 |
| 2 | გერმანია | 195.9 | 2 | ნიდერლანდები | 216.5 |
| 3 | შვედეთი | 193.9 | 3 | დანია | 215.1 |
| 4 | აშშ | 192.5 | 4 | ომანი | 215.1 |
| 5 | ფინეთი | 190.2 | 5 | შვეიცარია | 210.9 |
| 6 | დანია | 190.2 | 6 | ფინეთი | 208.3 |
| 7 | ავსტრია | 182.6 | 7 | ნორვეგია | 199.2 |
| 8 | ავსტრალია | 180.8 | 8 | ისლანდია | 198.0 |
| 9 | კანადა | 177.6 | 9 | ავსტრია | 197.7 |
| 10 | ახალი ზელანდია | 175.5 | 10 | გერმანია | 195.2 |
| 11 | ნორვეგია | 175.1 | 11 | ავსტრალია | 195.1 |
| 12 | საუდის არაბეთი | 169.4 | 12 | ახალი ზელანდია | 194.7 |
| 13 | იაპონია | 168.3 | 13 | შვედეთი | 192.2 |
| 14 | ნიდერლანდები | 166.8 | 14 | აშშ | 192.1 |
| 15 | თურქმენეთი | 157.1 | 15 | ესტონეთი | 189.8 |
| 16 | დიდი ბრიტანეთი | 156.9 | 16 | კატარი | 189.4 |
| 17 | კვიპროსი | 154.9 | 17 | იაპონია | 188.8 |
| 18 | არაბთა გაერთ. საამიროები | 153.7 | 18 | ესპანეთი | 187.2 |
| 19 | ირლანდია | 148.9 | 19 | სლოვენია | 182.4 |
| 20 | კატარი | 144.9 | 20 | ხორვატია | 181.7 |
| 21 | ესტონეთი | 144.6 | 21 | ლიეტუვა | 178.8 |
| 22 | საფრანგეთი | 139.3 | 22 | დიდი ბრიტანეთი | 177.2 |
| 23 | ბელგია | 136.0 | 23 | ჩეხეთის რესპუბლიკა | 176.3 |
| 24 | ესპანეთი | 134.9 | 24 | არაბთა გაერთ. საამიროები | 174.2 |
| 25 | სლოვენია | 134.5 | 25 | საუდის არაბეთი | 173.7 |
| 26 | პორტუგალია | 129.2 | 26 | ბელგია | 173.7 |
| 27 | ჩეხეთი | 127.5 | 27 | კანადა | 170.5 |
| 28 | პუერტო-რიკო | 125.7 | 28 | ირლანდია | 169.6 |
| 29 | ქუვეითი | 123.4 | 29 | საფრანგეთი | 169.5 |
| 30 | ისრაელი | 120.4 | 30 | ისრაელი | 169.5 |
წყარო: Numbeo
