ვაქცინის მწარმოებელი ბიოტექნოლოგიური კომპანია Novavax-ი აცხადებს, რომ მის მიერ შექმნილი კოვიდ-ვაქცინა 96%-იანი ეფექტიანობით გამოირჩევა, რაც იმას ნიშნავს, რომ ის Moderna-სა და Pfizer-BioNTech-ს ვაქცინებთან შედარებით მცირედით უფრო ეფექტიანია. როგორც კომპანიაში განმარტავენ, ვაქცინა ეფექტიანია კორონავირუსის საწყისი შტამისთვის, ხოლო ახალი შტამების წინააღმდეგ შედარებით ნაკლებად ეფექტიანია.
უფრო კონკრეტულად, Novavax-ი აცხადებს, რომ მისი ვაქცინა ბრიტანეთში დაფიქსირებულ B.1.1.7 ტიპის ვირუსის წინააღმდეგ 86%-ით ეფექტიანია, ხოლო სამხრეთ აფრიკაში აღმოჩენილი B1.351 შტამისთვის – 55%-ით ეფექტიანი.
კლინიკური შემოწმების ეტაპზე, არც ერთი შტამის შემთხვევაში, არც ერთი მონაწილე, რომელსაც Novavax-ის ვაქცინა ჰქონდა მიღებული, ვირუსის მწვავე გართულებებით საავადმყოფოში არ მოხვედრილა. არც გარდაცვალების შემთხვევები დაფიქსირებულა. შედეგად, ასკვნიან, რომ ვაქცინა მაღალი ეფექტიანობით გამოირჩევა.
ცნობისთვის, Novavax-ს ვაქცინის მიწოდებასთან დაკავშირებით შეთანხმებები კანადასთან, დიდ ბრიტანეთთან, ავსტრალიასა და ინდოეთთან უკვე აქვს გაფორმებული. კომპანია 2021 წლის შუა პერიოდისთვის 2 მლრდ დოზა ვაქცინის წარმოებას აპირებს.
Novavax-ი უახლოეს მომავალში აშშ-ის წამლისა და საკვების ადმინისტრაციას ავტორიზაციისთვის მიმართავს.
