აშშ-ის სურსათისა და მედიკამენტების ხარისხის კონტროლის სააგენტომ (FDA) კომპანია Precision Neuroscience-ს ტვინის იმპლანტის ძირითადი კომპონენტის გამოყენების ნებართვა მისცა. ამის შესახებ ინფორმაცია Precision-მა პრესრელიზით გაავრცელა.
გავრცელებული ინფორმაციის თანახმად, FDA-მ დაუშვა იმპლანტის კომპონენტის – Layer 7 Cortical Interface – გამოყენება, რომელიც ტვინის ზედაპირზე ელექტრული აქტივობის ჩაწერას, მონიტორინგსა და სტიმულირებას უზრუნველყოფს. ილონ მასკის Neuralink-ის თანადამფუძნებლის მიერ შექმნილი კომპანიის ცნობით, მისი იმპლანტი მძიმე ფორმის დამბლის მქონე პაციენტებისთვის არის განკუთვნილი.
შედეგად, FDA-ს ნებართვით, Precision Neuroscience-ი შეძლებს 30 დღემდე ვადით პაციენტებში Layer 7-ის იმპლანტირებას და მის გაყიდვას კლინიკური მიზნებისთვის — მათ შორის ტვინის სიგნალების რუკის შედგენის პროცედურებში გამოსაყენებლად.
Precision-ში აცხადებენ, რომ მანამდე ტექნოლოგიის გამოყენება მხოლოდ რამდენიმე საათით იყო ნებადართული, ხოლო ახლა მონაცემების შეგროვება რამდენიმე კვირის განმავლობაში იქნება შესაძლებელი, რაც მათ იმპლანტის სწრაფად დახვეწასა და გაუმჯობესებაში დაეხმარება. აღსანიშნავია, რომ კომპანია უკვე ატარებდა ტესტირებებს 37 პაციენტზე, FDA-ს ახალი გადაწყვეტილების შემდეგ კი კლინიკური კვლევების პროგრამის გაფართოებას გეგმავს.
Precision-მა ამერიკულ Forbes-ს განუცხადა, რომ კომპანია მოწყობილობის გაყიდვის დაწყებას 2026 წლიდან გეგმავს.
ცნობისთვის, Precision Neuroscience-ი ბენჯამინ რაპოპორტმა 2021 წელს დააარსა — ოთხი წლის შემდეგ, რაც Neuralink-ის თანადაფუძნებაში მიიღო მონაწილეობა. ამჟამად Precision-ი ილონ მასკის კომპანიის ერთ-ერთი კონკურენტია. რაც შეეხება Neuralink-ს, მან ტვინის იმპლანტი პარალიზებულ პაციენტს პირველად შარშან ჩაუნერგა და მას შემდეგ, იანვრის მდგომარეობით, ის კიდევ ორპაციენტზე გამოცადა. მასკის განცხადებით, 2025 წელს კომპანია ტექნოლოგიის გამოცდას კიდევ 20-დან 30-მდე პაციენტზე გეგმავს.
იხილეთ ასევე: მასკის Neuralink-მა ტვინის იმპლანტი ადამიანს პირველად გადაუნერგა
