ფარმაცევტული კომპანია Moderna თავისი ვაქცინის თითქმის 95%-იან ეფექტურობაზე აცხადებს. ამის შესახებ ინფორმაციას BBC ავრცელებს.
კლინიკური შემოწმების პროცესში აშშ-ში კომპანიას 30 000 ადამიანი ჰყავდა ჩართული, მათ ნახევარს ორი დოზა ვაქცინა, ოთხი კვირის ინტერვალით გაუკეთეს. დანარჩენ მონაწილეებს კი ე.წ პლაცებო ინექცია გაუკეთეს. საბოლოო ჯამში მონაცემების ანალიზმა აჩვენა, რომ ვაქცინა 94.5%-ით ეფექტურია. კლინიკური ტესტირების ეტაპზე ასევე 11 შემთხვევაში კორონავირუსით დაინფიცირების მწვავე შემთხვევა გამოვლინდა, თუმცა, არცერთი მათგანისთვის ნამდვილი ვაქცინა არ ჰქონდათ გაკეთებული.
“საერთო ეფექტურობა აღსანიშნავია. ეს შესანიშნავი დღეა“, – განაცხადა Moderna-ს მთავარმა სამედიცინო ოფიცერმა ტალ ზაკსმა.
“არ ველოდი, არ ვფიქრობდი რომ ვაქცინა 94%-იანი ეფექტურობას აჩვენებდა“, – ამის შესახებ კი კომპანიის პრეზიდენტმა სტეფან ჰოჯმა განაცხადა.
ამასთან, კომპანიაში ამბობენ, ისინი მომდევნო კვირების განმავლობაში აშშ-ის მარეგულირებელ სამსახურს მიმართავენ ავტორიზაციისთვის. Moderna-ს განცხადებით, მათ ქვეყანაში 20 მლნ დოზა ვაქცინის უზრუნველყოფა შეუძლიათ. კომპანიასთან მოლაპარაკებებს აწარმოებს დიდი ბრიტანეთიც.
