ინფლაცია მთავრობას ბიუჯეტის შევსებაში ეხმარება

2015 წლის სახელმწიფო ბიუჯეტის შემოსულობების გეგმა 105.7%-ით შესრულდა. გეგმის გადაჭარბებით შესრულებას ლარის გაუფასურებამ და ინფლაციის დონის ამაღლებამ შეუწყო ხელი. 2015 წლის სახელმწიფო ბიუჯეტი ლარის 1.80 კურსზე დაიგეგმა, გასულ ექვს თვეში კი ლარის კურსი საშუალოდ 2.20 იყო. კურსის გაუფასურებამ დოლარში მოზიდული საგარეო გრანტების და კრედიტების ლარში გამოსახული მოცულობა გაზარდა. ამასთან, ლარის გაუფასურებამ ინფლაციის ტემპი აამაღლა. საქსტატის ინფორმაციით, ივნისის ბოლოსთვის წლიურმა ინფლაციამ 4.5% შეადგინა. ვინაიდან ბიუჯეტის საგადასახადო შემოსავლები ნომინალური მშპ-ის ზრდის (ნომინალური ზრდა ნიშნავს რეალური ეკონომიკური ზრდისა და ინფლაციის მაჩვენებლის ჯამს) მიხედვით არის დაგეგმილი, საქონელსა და მომსახურებაზე ფასების მატება ბიუჯეტის საგადასახადო შემოსავლებს ზრდის.

არაფინანსური აქტივების რეალიზაციიდან (პრივატიზაციიდან) მიღებული შემოსავლების გეგმაზე 5-ჯერ მეტობა დაუგეგმავი შემოსავლის მიღებამ გამოიწვია. პირველი ორი კვარტლის გეგმაში საერთოდ არ იყო გათვალისწინებული რადიოსიხშირის სპექტრით სარგებლობის ლიცენზიის გაყიდვიდან მისაღები შემოსავალი, რომელმაც 90.4 მლნ ლარი შეადგინა.

მნიშვნელოვანი ჩამორჩენაა საინვესტიციო შეღავათიანი კრედირეტების მოზიდვაში, რომლის გეგმაც 79.6%-ით შესრულდა.