First Citizens Bank-მა გაკოტრებული SVB-ის პორტფელის გამოსყიდვის გადაწყვეტილება მიიღო. გარიგება მოიცავს 72 მილიარდი დოლარის ღირებულების სადეპოზიტო და სასესხო პორტფელს, რომლის სანაცვლოდაც First Citizens-ს დაახლოებით 16.5 მილიარდი დოლარის გადახდა მოუწევს, რაც 77%-იანი ფასდაკლებაა.
აღსანიშნავია, რომ ეს გარიგება არ გულისხმობს Silicon Valley Bank-ის სრულ შესყიდვას, რადგან ცენტრალური მარეგულირებლის კონტროლ ქვეშ კიდევ რჩება დაახლოებით 90 მილიარდი დოლარის აქტივები, რომელიც, შესაძლოა, სხვა ბანკმა ან საინვესტიციო ფონდმა შეიძინოს.
SVB ბანკის კოლაფსი 2008 წელს Lehman Brothers-ის გაკოტრების შემდეგ მომხდარი ყველაზე მასშტაბური მოვლენა იყო, რომელიც სწორედ მიმდინარე თვეს მოხდა.
SVB-ის გაკოტრების მთავარი მიზეზი არასათანადო რისკ-მენეჯმენტი და აშშ-ის ფედერალური რეზერვის მიერ მკვეთრად გამკაცრებული მონეტარული პოლიტიკა იყო. ზემოხსენებული ბანკი ძირითადად ტექნოლოგიურ და სტარტაპ კომპანიებზე იყო ფოკუსირებული, მათგან მიღებულ დეპოზიტებს კი ის სესხად გასცემდა, თანხის დიდ ნაწილს კი აშშ-ის სახაზინო ობლიგაციებში აბანდებდა. 5%-მდე გაზრდილი რეფინანსირების განაკვეთის პირობებში, ობლიგაციების პროცენტული ამონაგები თითქმის გასამმაგდა, თუმცა მათი ღირებულება შემცირდა, რის გამოც SVB-ის მენეჯმენტს ფასიანი ქაღალდების გაყიდვა წაგებაში მოუწიათ.
ბანკის გადახდისუუნარობის რისკის ზრდის ფონზე კი, დეპოზიტარებმა რეკორდული მოცულობის თანხის განაღდება მოითხოვეს, რამაც ბანკის საბოლოოდ გაკოტრებამდე მიიყვანა.
