Forbes: მსოფლიოს 10 უმდიდრესი ადამიანი (2025 წლის იანვარი)

2025 წლის პირველი იანვრის მონაცემებით, Forbes-ის უმდიდრეს ადამიანთა რეიტინგს კვლავ Tesla-სა და SpaceX-ის აღმასრულებელი დირექტორი ილონ მასკი ლიდერობს. მასკი, სიის სხვა წევრებს შორის, ერთადერთიცაა, რომლის ქონებაც $400-მილიარდიან ნიშნულს აღემატება.

მიმდინარე წლის დასაწყისში, Forbes-ის შეფასებით, მასკის ქონება $421.2 მილიარდს უტოლდებოდა – ეს კი $91 მილიარდით მეტია პირველი დეკემბრის მონაცემებთან შედარებით. ამერიკელი ბიზნესმენის ქონების ზრდა SpaceX-ის მიერ ინსაიდერების აქციების გამოსყიდვაზე შეთანხმების მიღწევას მოჰყვა, რის შედეგადაც, კოსმოსური კომპანიის ღირებულება $210 მილიარდიდან $350 მილიარდამდე გაიზარდა. ცნობისთვის, მასკი, რომელმაც SpaceX-ი 2002 წელს დააარსა, კომპანიის 42%-იანი წილის მფლობელია.

მილიარდერის ქონების ზრდაზე დადებითად ამერიკის შეერთებული შტატების საპრეზიდენტო არჩევნების შედეგებმაც იმოქმედა. აშშ-ის არჩეულმა პრეზიდენტმა დონალდ ტრამპმა მასკი მთავრობის ეფექტიანობის დეპარტამენტის თანახელმძღვანელის პოზიციაზე წარადგინა. შედეგად, თუ მასკის ქონება 2024 წლის დასაწყისში $251 მილიარდს აღწევდა, ბოლო მონაცემებით ის $425 მილიარდამდე გაიზარდა.

2025 წლის მონაცემებით, Forbes-ის უმდიდრესი ადამიანების რეიტინგის მეორე პოზიციაზე Amazon-ის დამფუძნებელი ჯეფ ბეზოსია. ამერიკელი მილიარდერი, რომელიც ამავდროულად ფირმის თავმჯდომარე და 9%-იანი წილის მფლობელია, მხოლოდ ბოლო ერთ თვეში $10 მილიარდით გამდიდრდა. ბეზოსის ქონების ზრდა, ამავე პერიოდში, Amazon-ის აქციების ღირებულების 5%-იან მატებას მოჰყვა. ბოლო მონაცემებით, ბეზოსის ქონება $237 მილიარდს უტოლდება, რაც დაახლოებით $188 მილიარდით ჩამოუვარდება მასკის ქონების შეფასებას.

მიმდინარე წლის დასაწყისში სიის პირველ ათეულში მოხვდა Nvidia-ს თანადამფუძნებელი იენსენ ჰუანგიც. 2024 წლის განმავლობაში ჩიპების მწარმოებლის აქციების ღირებულების 171%-იანი ზრდის გავლენით, ჰუანგის ქონება $118 მილიარდამდე გაიზარდა. რაც შეეხება Nvidia-ს, კომპანია $3.5-ტრილიონიანი საბაზრო კაპიტალიზაციით, მსოფლიოში მეორე უმსხვილესია და მხოლოდ Apple-ს ($3.67 ტრილიონი) ჩამოუვარდება.

საერთო ჯამში, მსოფლიოს 10 უმდიდრესი ადამიანის ქონება 2024 წლის პირველი დეკემბრის $1.8 ტრილიონიდან, 2025 წლის პირველი იანვრისთვის, $1.9 ტრილიონამდეა გაზრდილი. მათგან შვიდი პირი იმაზე მდიდარია, ვიდრე ერთი თვით ადრე იყო. ამ პერიოდში ყველაზე მეტი – $17.2 მილიარდი Oracle-ის თავმჯდომარემ, ლარი ელისონმა დაკარგა, რომლის ქონებასაც Forbes-ი $210 მილიარდად აფასებს. შედეგად, ელისონმა რეიტინგის მეორე პოზიციიდან მესამეზე გადაინაცვლა.

საინტერესოა ის ფაქტი, რომ რეიტინგის პირველ ათეულში ცხრა მილიარდერი ამერიკის შეერთებული შტატებიდანაა. ერთადერთი არაამერიკელი მილიარდერი LVMH-ის დამფუძნებელი ფრანგი ბერნარ არნოა. ამასთან ერთად კი, ათეულში შემავალი ყველა პირი მამაკაცია და თითოეული მათგანის ქონება $110 მილიარდს აღემატება. ცნობისთვის, უმდიდრესი ქალი Walmart-ის მემკვიდრე ელის უოლტონია, რომელიც $100 მილიარდით, რეიტინგის მე-17 პოზიციაზეა.