“უსაფრთხო და პასუხისმგებლიანი მოგზაურობა კვლავ შესაძლებელია”, – ნათქვამია Forbes-ის უფროსი კონტრიბუტორის, კენეტ რაპოზას სტატიაში, რომელიც საქართველოში მსოფლიო ტურიზმის ორგანიზაციის (UNWTO) აღმასრულებელი საბჭოს მიერ გამართულ შეხვედრას, ასევე ქვეყნის ბიზნესგარემოსა და ტურიზმის შესაძლებლობებს ეხება.
“საქართველოსთვის ტურიზმი მთლიანი შიდა პროდუქტის 8.1%-ს ქმნის, შავი ზღვის სანაპიროზე არსებული ბათუმი კი უცხოური ინვესტიციების მიმზიდველობით საერთაშორისო ტურიზმის ერთ-ერთ წარმატებულ მაგალითად იქცა.
UNWTO-ს პრეზიდენტმა ზურაბ პოლოლიკაშვილმა საქართველოში გამართულ ფორუმზე განაცხადა, რომ პანდემიის მიუხედავად მსოფლიოს არაერთ კუთხეში “უსაფრთხო და პასუხისმგებლიანი მოგზაურობა კვლავ შესაძლებელია, რომ იმპერატიულ აუცილებობას წარმოადგენს მთავრობების მიერ კერძო სექტორთან ერთად სწორი გზების გამონახვა, რათა გლობალური ტურიზმი კვლავ ამოძრავდეს.
UNWTO-ს მონაცემების თანახმად, ივნისში საქართველოში საერთაშორისო ტურისტული ნაკადები 93%-ით იყო შემცირებული, რაც ამ სექტორზე პანდემიის უმძიმეს გავლენას ასახავდა.
ორგანიზაციის აღმასრულებელი საბჭოს 112-ე სხდომა დასრულდა და ჯერჯერობით ერთი სიტყვა არ თქმულა ავად გამხდარ დიპლომატსა თუ თარჯიმანზე, ეს კი არის კარგი მაგალითი იმისა, თუ როგორ არის შესაძლებელი საზოგადოებრივი ჯანმრთელობის კრიზისის დროს გონივრული უსაფრთხოების ზომების გათვალისწინებით საქმის კეთება”- ნათქვამია Forbes-ის სტატიაში.
დღესვე ცნობილი გახდა, რომ საქართველოს მთავრობა ზურაბ პოლოლიკაშვილის მიერ UNWTO-ს გენერალური მდივნის პოსტის ხელმეორედ დაკავებას უჭერს მხარს. საქართველომ პოლოლიკაშვილის კანდიდატურა უკვე ოფიციალურად წარადგინა.
მსოფლიო ტურიზმის ორგანიზაციის გენერალური მდივნის შემდგომი არჩევნები 2021 წლის 19 იანვარს, ესპანეთის დედაქალაქ მადრიდში გაიმართება. ქვეყნებს UNWTO-ს პრეზიდენტად მათი კანდიდატების წარდგენის უფლება 2020 წლის 18 ნოემბრის ჩათვლით აქვთ.
