Forbes-მა ამერიკის შეერთებული შტატების 400 უმდიდრესი ადამიანის 2023 წლის რეიტინგი გამოაქვეყნა. მიმდინარე წლის სიაში მილიარდერებს შორის სიმდიდრის არათანაბარი გადანაწილება შეიმჩნევა. Forbes 400-ის კოლექტიური ქონების თითქმის 40% რეიტინგის მხოლოდ წამყვან ოცეულზე მოდის. გარდა ამისა, რეიტინგში შემავალი პირების კოლექტიური ქონება გასულ წელთან შედარებით $500 მილიარდითაა გაზრდილი, საიდანაც თითქმის $310 მილიარდი სწორედ სიის პირველ ოცეულზე მოდის.
2022 წელთან შედარებით, მიმდინარე წელს, Forbes-ის პირველი ოცეული 30%-ით უფრო მდიდარია, მაშინ როდესაც სიაში სიმდიდრის საშუალო ზრდა მხოლოდ 12%-ს უტოლდებოდა. გარდა ამისა, მიმდინარე წელს რეკორდულ $1.9 ტრილიონამდე გაიზარდა ამერიკის ოცი უმდიდრესი ადამიანის კოლექტიური ქონებაც. ერთ-ერთი ყველაზე კარგი წელი კი, სიმდიდრის ზრდის გათვალისწინებით, Nvidia-ს აღმასრულებელ დირექტორსა და თანადამფუძნებელს, ჯენსენ ჰუანგს ჰქონდა.
ხელოვნურ ინტელექტში მკვეთრად გაზრდილი ინვესტიციების წყალობით, ჰუანგი აშშ-ის უმდიდრეს ადამიანთა ოცეულში პირველად მოხვდა. Nvidia-ს აქციების 200%-იანი მატების შედეგად, ჰუანგი 2023 წლის Forbes 400-ის სიაში, გასულ წელთან შედარებით, ქონების ყველაზე დიდი, 216%-იანი ზრდით გამოირჩევა. $40.7 მილიარდით, ჰუანგი ამჟამად აშშ-ის უმდიდრეს ადამიანთა სიაში მე-17 პოზიციას იკავებს.
ჰუანგის მსგავსად, ქონების ზრდაში ხელოვნური ინტელექტი ტოპ-20-ის სხვა წევრებსაც დაეხმარა. ამ მხრივ დოლარში ყველაზე დიდი მოგებით ლარი ელისონი გამოირჩევა, რომლის ქონებაც, მისივე პროგრამული უზრუნველყოფის ფირმა Oracle-ის აქციების 69%-ით მატების შედეგად, $57 მილიარდით გაიზარდა. Meta-ს AI-ის და ხარჯების შემცირების წყალობით, ათეულში ადგილი დაიბრუნა მარკ ცუკერბერგმაც, რომელიც შარშან, 2014 წლის შემდეგ პირველად, მის მიღმა დარჩა.
მეხუთე და მეშვიდე პოზიციებს ინაწილებენ Google-ის თანადამფუძნებლები ლარი პეიჯი და სერგეი ბრინი. Google-ის მშობელი კომპანია Alphabet-ის აქციები მაისში, AI-ხელსაწყოს დაანონსების შემდეგ, 27%-ით გაიზარდა. ივნისში AI-ჩატბოტის სტარტაპ Inflection.ai-ში ინვესტიცია განახორციელა ბილ გეიტსმაც.
ჰუანგის ტოპ-20-ში შესვლასთან ერთად კი, პირველ ოცეულში პოზიცია დაკარგა მაქკენზი სკოტმა და 21-ე ადგილზე გადაინაცვლა. Amazon-ის აქციების 8%-ით ზრდის მიუხედავად, ბეზოსის ყოფილი ცოლის ქონება გასულ წელთან შედარებით $600 მილიონითაა შემცირებული, რაც ძირითადად მის გულუხვ საქველმოქმედო საქმიანობას უკავშირდება.
წამყვანი ოცეულიდან კი მხოლოდ ორი მილიარდერი ფლობს იმაზე ნაკლებს, ვიდრე ერთი წლის წინ ფლობდნენ. მათ შორისაა ჩარლზ კოხი, რომელმაც სამი პოზიცია დაკარგა და Nike-ის დამფუძნებელი ფილ ნაიტი, რომელიც სპორტული ტანსაცმლის კომპანიის აქციების ფასის 8%-ით ვარდნის შემდეგ, რეიტინგში ერთი პოზიციით დაქვეითდა.
ერთი რამ, რაც რეიტინგში არ შეცვლილა – მისი ლიდერი ილონ მასკია. მასკი ზედიზედ უკვე მეორე წელია, რაც ამერიკის უმდიდრესი ადამიანის წოდებას ინარჩუნებს, წელს კი მისი ქონება თითქმის ზუსტად იგივეა, რაც შარშან და $251 მილიარდს უტოლდება. მეორე ადგილზეა ჯეფ ბეზოსი, $161 მილიარდით.
ამერიკის შეერთებული შტატების ოცი უმდიდრესი ადამიანი:
- ილონ მასკი – $251 მილიარდი. სიმდიდრის წყარო: Tesla, SpaceX
- ჯეფ ბეზოსი – $161 მილიარდი. სიმდიდრის წყარო: Amazon
- ლარი ელისონი – $158 მილიარდი. სიმდიდრის წყარო: Oracle
- უორენ ბაფეტი – $121 მილიარდი. სიმდიდრის წყარო: Berkshire Hathaway
- ლარი პეიჯი – $114 მილიარდი. სიმდიდრის წყარო: Google
- ბილ გეიტსი – $111 მილიარდი. სიმდიდრის წყარო: Microsoft
- სერგეი ბრინი – $110 მილიარდი. სიმდიდრის წყარო: Google
- მარკ ცუკერბერგი – $106 მილიარდი. სიმდიდრის წყარო: Facebook
- სტივ ბალმერი – $101 მილიარდი. სიმდიდრის წყარო: Microsoft
- მაიკლ ბლუმბერგი – $96.3 მილიარდი. სიმდიდრის წყარო: Bloomberg LP
- მაიკლ დელი – $71.5 მილიარდი. სიმდიდრის წყარო: Dell Technologies
- ჯიმ უოლტონი – $68.2 მილიარდი. სიმდიდრის წყარო: Walmart
- რობ უოლტონი – $67.4 მილიარდი. სიმდიდრის წყარო: Walmart
- ელის უოლტონი – $66.5 მილიარდი. სიმდიდრის წყარო: Walmart
- ჯულია კოხი – $59.8 მილიარდი. სიმდიდრის წყარო: Koch Industries
- ჩარლზ კოხი – $54.5 მილიარდი. სიმდიდრის წყარო: Koch Industries
- ჯენსენ ჰუანგი – $40.7 მილიარდი. სიმდიდრის წყარო: ნახევარგამტარები
- ფილ ნაიტი – $39.5 მილიარდი. სიმდიდრის წყარო: Nike
- ჟაკლინ მარსი – $38.9 მილიარდი. სიმდიდრის წყარო: ტკბილეული, ცხოველთა საკვები
- ჯონ მასკი – $38.9 მილიარდი. სიმდიდრის წყარო: ტკბილეული, ცხოველთა საკვები
