მსოფლიო მასშტაბით 80 სახელმწიფო, მათ შორის ამერიკის შეერთებული შტატები და ჩინეთი, აქტიურადაა ჩართული ცენტრალური ბანკის ციფრული ვალუტის განვითარების პროცესში. შეგახსენებთ, რომ ეს არის რეგულირებადი ფულის ერთ-ერთი ფორმა, რომელიც მხოლოდ ონლაინსივრცეში არსებობს.
აღსანიშნავია, რომ ციფრული ვალუტის განვითარების მხრივ ჩინეთი აშშ-ს საგრძნობლად უსწრებს. ჩინეთის რესპუბლიკის მილიონზე მეტი მოქალაქე უკვე იყენებს ციფრულ იუანს, მაშინ როდესაც აშშ ჯერ კიდევ კვლევის პროცესშია.
ამერიკელი სპეციალისტების განცხადებით, ისინი შეისწავლიან იუანის წარმოშობას, რადგან აშშ-ისა და ჩინეთის პოლიტიკა ერთმანეთისგან ძალიან განსხვავდება. შესაბამისად, მათთვის, ციფრული ფულის შექმნის პროცესში, უმთავრესი კონფიდენციალურობის უფლების სრულყოფა და დაცვაა. აშშ-ში ციფრული ფულის შექმნაზე ბოსტონის ფედერალური სარეზერვო ბანკი და მასაჩუსეტსის ინსტიტუტის “ციფრული ვალუტის ინიციატივა“ მუშაობს.
კონფიდენციალურობასთან ერთად, ამერიკელი სპეციალისტები ციფრული ფულის ხელმისაწვდომობის მნიშვნელობას უსვამენ ხაზს. კვლევების მიხედვით, აშშ-ში მცხოვრებლების დაახლოებით 7% ინტერნეტს არ იყენებს, შავკანიანი მოსახლეობის შემთხვევაში ეს მაჩვენებელი 9%-მდე, ხოლო 65 წელს გადაცილებულებში 25%-მდე აღწევს.
აღსანიშნავია, რომ ციფრული იუანის განვითარებასთან ერთად ამერიკელები იმ საფრთხეებზეც ალაპარაკდნენ, რომელთა წინაშეც ჩინეთის მხრიდან დასავლეთი მომავალ ოცდაათ ან ორმოც წელიწადში შეიძლება დადგეს. აშშ-ში აცხადებენ, რომ შესაძლოა ციფრული იუანის გამოყენებამ დასავლეთში ჩინეთის „ციფრული ავტორიტარიზმის“ გავრცელებასაც შეუწყოს ხელი.
შეგახსენებთ, რომ ციფრული დოლარის შემოღების შემთხვევაშიც, ის მიმოქცევაში ფიზიკურად არსებულ ფულთან ერთად იქნება. შესაბამისად, აშშ-ის მოქალაქეებს ორივე სახის ფულთან ექნებათ წვდომა. ამას გარდა, ამერიკელი სპეციალისტები იმედს გამოთქვამენ, რომ ცენტრალური ბანკის ციფრული ვალუტის შემოღებით, დოლარის, როგორც მსოფლიო ეკონომიკაში მონეტარული ლიდერის, როლს საფრთხე მომავალშიც არ დაემუქრება.
