ბანკების პირველი კვარტალის მოგების მაჩვენებლები

საქართველოს ეროვნულმა ბანკმა საქართველოში მოქმედი კომერციული ბანკების მიმდინარე წლის პირველი კვარტლის ფინანსური მაჩვენებლები გამოაქვეყნა. ბანკების მოგება-ზარალის უწყისებიდან ირკვევა, რომ პირველ კვარტალში ყველაზე მეტი წმინდა მოგება  – 98.6 მლნ ლარი „თიბისი ბანკს“ ჰქონდა. თუმცა, 2018 წლის პირველ კვარტალთან შედარებით „თიბისის“ მოგება 8%-ით არის შემცირებული. მეორე ადგილზე „საქართველოს ბანკია“ 73.4 მლნ ლარით, რაც 2%-ით ნაკლებია 2018 წლის პირველი კვარტლის მოგებაზე. მესამეზე „ტერაბანკია“ 6.2 მლნ ლარის მოგებით.

წმინდა მოგების ზრდის ტემპით პირველ ადგილზეა „კრედო ბანკი“, რომლის მოგებაც 6-ჯერ გაიზარდა და 5.7 მლნ ლარი შეადგინა. 5-ჯერ გაიზარდა „ბანკი ქართუს“ მოგება. 177%-ით შემცირდა „ხალიკ ბანკის“ მოგება და -2.6 მლნ ლარი შეადგინა. „ხალიკ ბანკის“ გარდა ზარალით სამმა ბანკმა დაასრულა პირველი კვარტალი.

პირველ კვარტალში ყველა ბანკმა ერთად 199 მლნ ლარის წმინდა მოგება ნახა, რომლის 87% ორ მსხვილ ბანკზე მოდის. 2018 წლის პირველ კვარტალთან შედარებით ბანკების ჯამური მოგება 15%-ით არის შემცირებული.

წყარო: საქართველოს ეროვნული ბანკი