ლონდონში გამართული ორდღიანი სავაჭრო მოლაპარაკებებისას, ამერიკის შეერთებული შტატებისა და ჩინეთის მაღალი რანგის წარმომადგენლები სავაჭრო ზავის აღდგენისა და ექსპორტზე კონტროლის შემსუბუქების ჩარჩოზე შეთანხმდნენ. აშშ-ის ვაჭრობის მდივან ჰოვარდ ლუტნიკის განცხადებით, ოფიციალურმა პირებმა წინადადება დასამტკიცებლად ახლა უკვე თავიანთ ლიდერებს უნდა წარუდგინონ.
„თუ ეს დამტკიცდება, ჩვენ ჩარჩოს ამოქმედებას შევძლებთ“, – განაცხადა ლუტნიკმა ჟურნალისტებთან დამოუკიდებლად გამართულ ბრიფინგზე. მიუხედავად იმისა, რომ მოლაპარაკებების არცერთ მხარეს შეთანხმების დეტალები არ გაუსაჯაროებია, ლუტნიკმა გაამხილა, რომ აშშ-ისა და ჩინეთის წარმომადგენლები შეთანხმდნენ იმ საქონლისა და ტექნოლოგიების კონტროლის გაუქმებაზე, რომლებიც ქვეყნებისთვის სასიცოცხლოდ მნიშვნელოვანია.
Reuters-ის ცნობით, ლუტნიკმა ჩინეთის მიერ აშშ-ისთვის იშვიათი მიწა-მინერალების ექსპორტზე დაწესებული შეზღუდვები, მიღწეული ჩარჩო-შეთანხმების „ფუნდამენტურ“ ნაწილად მოიხსენია. მისი განცხადებით, ჩინეთის მხრიდან შეზღუდვების დაწესებას მთელი რიგი ზომები მოჰყვა, რომლებიც, სავარაუდოდ, შემსუბუქდება, როგორც პრეზიდენტმა ტრამპმა თქვა: „დაბალანსებული გზით“.
შეგახსენებთ, რომ აშშ-სა და ჩინეთს შორის ლონდონში მოლაპარაკებების დანიშვნამდე, სი ძინპინსა და დონალდ ტრამპს შორის სატელეფონო საუბარი შედგა. საუბარი, რომელიც ძირითადად სავაჭრო ურთიერთობებს შეეხო, პრეზიდენტმა ტრამპმა დადებითად შეაფასა.
ჩინეთისა და აშშ-ის წარმომადგენლობა ერთმანეთს მაისში, ჟენევაშიც შეხვდა. მოლაპარაკებებს, რომელსაც ტრამპმა „სრული გადატვირთვა“ უწოდა, ტარიფების დაწევა და 90-დღიანი ზავი მოჰყვა. ამჟამად, აშშ-ს ჩინურ პროდუქციაზე 30%-იანი ტარიფები, ხოლო პეკინს აშშ-ის იმპორტზე 10%-იანი გადასახადები აქვს დაწესებული.
