S&P 500-ის კომპანიებმა, 2020 წლის 16 მარტის შემდეგ, Wall Street-ზე კომბინირებულად ერთ დღეში რეკორდული, $2.4 ტრილიონის საბაზრო ღირებულება დაკარგეს. ვარდნა აშშ-ის პრეზიდენტ დონალდ ტრამპის მიერ საპასუხო ტარიფების გამოცხადებას მოჰყვა, რის შემდეგაც S&P 500-ის ინდექსი 5%-ით დაეცა.
ტრამპის მიერ ოთხშაბათს, ჯამში 180 ქვეყნისთვის საპასუხო ტარიფების დაწესებას, ყოვლისმომცველი სავაჭრო ომისა და გლობალური ეკონომიკური რეცესიის შესახებ შეშფოთებები მოჰყვა. გარდა ამისა, თეთრი სახლის ადმინისტრაციის ინფორმაციით, იმ ქვეყნებსაც კი, რომლებიც სიაში არ მოხვდნენ, საბაზისო 10%-იანი ტარიფი დაუწესდებათ.
ტარიფების გამოცხადების შედეგად, 2020 წლის ივნისის შემდეგ რეკორდული, 3.98%-ით დაეცა Dow Jones Industrial Average, ხოლო Nasdaq Composite-ის ვარდნამ, 2020 წლის მარტის შემდეგ ერთდღიან მაქსიმუმს, 5.97%-ს მიაღწია. რაც შეეხება ტექნოლოგიურად დატვირთულ S&P 500-ს, ტრამპის გადაწყვეტილების შემდეგ, ინდექსის 400-ზე მეტმა კომპანიამ განიცადა ზარალი.
გლობალურ ინდექსებზე დაფიქსირებულ შედეგებს ხუთშაბათს პრეზიდენტი დონალდ ტრამპი გამოეხმაურა და სიტუაცია „პაციენტისთვის ოპერაციის ჩატარებას“ შეადარა: „ჩვენი ბაზრები აყვავდება, აქციები აყვავდება, ქვეყანა აყვავდება. დანარჩენ სამყაროს კი სურს, ნახოს, არის თუ არა რაიმე გზა ჩვენთან გარიგების დასადებად“.
