პრეზიდენტმა დონალდ ტრამპმა იმ ქვეყნების სია გამოაქვეყნა, რომლებსაც ამერიკის შეერთებულმა შტატებმა საპასუხო ტარიფები დაუწესა. ახალი გადასახადი, თითოეული სახელმწიფოსთვის, მათ მიერ აშშ-ისთვის დაწესებული სავაჭრო ბარიერის მთლიანი ხარჯისა და ტარიფების ჯამური ღირებულების გაანგარიშების საფუძველზე განისაზღვრა. ტრამპის განკარგულებით, ჩინეთისთვის იმპორტზე გადასახადის ზომა 54%-მდე, ხოლო ევროკავშირისთვის – 20%-მდე გაიზარდა.
ტრამპმა ქვეყნებისთვის დაწესებულ ინდივიდუალურ ტარიფებს „შეღავათიანი განაკვეთები“ უწოდა და განაცხადა, რომ ისინი „არაფულად ბარიერებსა და სიცრუეში შეყვანის სხვა ფორმებსაც“ ეფუძნება. მისივე თქმით, აშშ-ის მიერ განსაზღვრული საპასუხო გადასახადი დაახლოებით ნახევარია იმ ჯამური გადასახადის, რომელიც თითოეულმა ქვეყანამ აშშ-ს დაუწესა და ის „გულისხმიერ“ ქმედებადაც შეაფასა.
საპასუხო ტარიფების გავლენით, ყველაზე მეტად ჩინეთი დაზარალდება. ჩინეთისთვის აშშ-ში იმპორტზე დაწესებული გადასახადი 20%-დან 54%-მდე გაიზარდა. ვიეტნამიდან აშშ-ში შესული საქონელი 46%-ით დაიბეგრება, იაპონიიდან – 24%-ით, ხოლო ინდოეთიდან – 26%-ს. აღსანიშნავია, რომ ტრამპის მიერ განცხადების გაკეთებისას გასაჯაროებული სქემის მიხედვით, აშშ-ის ახალი ტარიფების ნაწილი მნიშვნელოვნად აღემატება საპრეზიდენტო კამპანიისას დაანონსებულ 20%-იან გადასახადს.
აშშ-ში ევროკავშირიდან იმპორტირებული საქონელი, ტრამპის გადაწყვეტილებით, ახლა 20%-ით დაიბეგრება. გარდა ამისა, თეთრი სახლის ადმინისტრაციის ინფორმაციით, იმ ქვეყნებსაც კი, რომლებიც სიაში არ მოხვდნენ, საბაზისო 10%-იანი ტარიფი დაუწესდებათ. მათ შორის მოხვდა საქართველოც.
ცნობისთვის, ტრამპის საბაზისო ტარიფებს არ დაექვემდებარებიან კანადა და მექსიკა, თუმცა მათთვის განსაზღვრული 25%-იანი გადასახადები მიმდინარე კვირაში ამოქმედდება. გარდა ამისა, აშშ-ის პრეზიდენტმა კიდევ ერთხელ დაადასტურა, რომ გუშინ საღამოსვე ქვეყანაში იმპორტირებულ ყველა ავტომობილზე ტარიფები ამოქმედდა.
აშშ-ის გადაწყვეტილებას უკვე გამოეხმაურნენ სიაში მოხვედრილი სახელმწიფოების წარმომადგენლები. ჩინეთის ვაჭრობის მინისტრმა აშშ-ს ტარიფების „დაუყოვნებლივ გაუქმებისკენ“ მოუწოდა და განაცხადა, რომ ტრამპის ქმედება „გლობალურ ეკონომიკურ განვითარებას საფრთხეში აგდებს“ და აშშ-ის ინტერესებსა და მიწოდების ჯაჭვს დააზიანებს. პეკინის განცხადებით, „სავაჭრო ომს გამარჯვებული არ ჰყავს“.
ტრამპის საპასუხო ტარიფებს „მსოფლიო ეკონომიკისთვის მძიმე დარტყმა“ უწოდა ევროკომისიის პრეზიდენტმა ურსულა ფონ დერ ლაიენმა. აშშ-ის გადაწყვეტილების შემდეგ, ბიზნესსექტორთან შეხვედრას გეგმავს საფრანგეთის პრეზიდენტი ემანუელ მაკრონი, ხოლო იტალიის პრემიერ ჯორჯა მელონის შეფასებით, ტრამპის ნაბიჯი „არასწორია“, თუმცა სავაჭრო ომის თავიდან ასარიდებლად ის მოლაპარაკებების გაგრძელებას გეგმავს.
იაპონიამ 24%-იან გადასახადებს „სამწუხარო“ უწოდა და დასძინა, რომ ამ გადაწყვეტილებამ შესაძლოა მსოფლიო სავაჭრო ორგანიზაცია და აშშ-იაპონიის შეთანხმება დააზიანოს. ისრაელის ადგილობრივი მედიის ინფორმაციით, 17%-იანი ტარიფები „მოულოდნელი“ აღმოჩნდა ოფიციალური თელ-ავივისთვის. „ჩვენ მიგვაჩნდა, რომ აშშ-დან იმპორტირებულ საქონელზე ტარიფების სრულად მოხსნა გადასახადებისგან დაგვიცავდა“, – განუცხადა ეკონომიკური სამინისტროს წარმომადგენელმა შიდა მედიას.
ტრამპის განცხადებას ცვლილებები მოჰყვა საფონდო ბირჟებზეც. S&P 500-ის ფიუჩერსები თითქმის 2%-ით, Nasdaq 100-ის 2.5%-ით, ხოლო Dow Jones Industrial Average ფიუჩერსები თითქმის 1%-ით დაეცა.
