ბრიტანულ-ქართული აკადემიის კურსდამთავრებულები აკადემიის გარშემო განვითარებულ მოვლენებთან დაკავშირებით განცხადებას ავრცელებენ:
“ჩვენ, ბრიტანულ–ქართული აკადემიის კურსდამთავრებულები, ვგმობთ საეჭვო სამართლებრივი პროცედურების შედეგად სკოლის დამფუძნებლის და დირექტორის, ქალბატონი ნათია ჯანაშიას თანამდებობიდან გადაყენებას. სწორედ ქალბატონმა ნათიამ შექმნა ჩვენი სკოლა, რომელიც ერთ–ერთი საუკეთესოა არა მხოლოდ საქართველოში, არამედ მთელ რეგიონში. ამდენად, ინვესტორს, რომელმაც სკოლის წინაშე ნაკისრი ვალდებულებებიც კი არ შეუსრულებია, არანაირი უფლება, არც მორალური და არც სამართლებრივი, არ ჰქონდა, თანამდებობიდან გადაეყენებინა და პრაქტიკულად წაერთმია სკოლა ნათია ჯანაშიასთვის.
გარდა იმისა, რომ ყოვლად ამორალურია, რასაც ინვესტორი კომპანია საქართველოს განათლების ჯგუფი და მისი მშობელი საქართველოს კაპიტალი სჩადიან სკოლისა და ნათია ჯანაშიას მიმართ, სერიოზულ საფრთხეს წარმოადგენს ის გარემოება, რომ ასეთ პირობებში ჩვენი აკადემია ვეღარ შეინარჩუნებს ბრიტანეთის საერთაშორისო სააკრედიტაციო ორგანიზაციის (COBIS) აკრედიტაციას, რაც უზარმაზარი რეპუტაციული დარტყმა იქნება როგორც ბრიტანულ–ქართული აკადემიისთვის, ისე თითოეული მოსწავლისთვის, რომელთა სასკოლო ატესტატი ვეღარ იქნება მათთვის ერთგვარი საშვი მსოფლიოს საუკეთესო უნივერსიტეტებში.
ინვესტორ კომპანიას და მის დირექტორს ირაკლი გილაურს ბრიტანულ–ქართული აკადემია, როგორც ჩანს, რიგით ბიზნესად მიაჩნიათ და არა სკოლად, სადაც მოსწავლეებმა განვითარებული სამყაროს სტანდარტების შესაბამისი განათლება უნდა მიიღონ.
ირაკლი გილაურმა და მისმა გუნდმა, პრაქტიკულად, ბრიტანულ–ქართული აკადემიის ოკუპაცია განახორციელეს, რაც ყოვლად დაუშვებელია ჩვენი სასკოლო საზოგადოებისთვის. მოვუწოდებთ გილაურს, შეწყვიტოს სკოლის და უშუალოდ ნათია ჯანაშიას წინააღმდეგ წამოწყებული ყოვლად უკანონო და ამორალური კამპანია და სკოლის ოკუპაცია.
აქვე მოვუწოდებთ მედიასაშუალებებს, ჟურნალისტებს, მედიამენეჯერებს, ნუ დააფარებენ ხელს ირაკლი გილაურის და მისი კომპანიის უკანონო ქმედებებს და ობიექტურად გააშუქონ ბრიტანულ–ქართული აკადემიის ირგვლივ განვითარებული მოვლენები, რადგან ამ სკოლისთვის ზიანის მიყენება მნიშვნელოვანი დარტყმა იქნება ზოგადად საქართველოს ზოგადსაგანმანათლებლო სისტემაზე”.
განცხადებაში ასევე აღნიშნულია, რომ სამშაბათს, 4 მარტს, დილის 8 საათზე ბრიტანულ-ქართული აკადემიის შენობასთან კურსდამთავრებულები და სასკოლო საზოგადოების საზოგადოების წევრები საპროტესტო აქციას გამართავენ.
კონტექსტი
2025 წლის 12 თებერვალს ბრიტანულ-ქართული აკადემიის 70%-ის მფლობელმა საქართველოს განათლების ჯგუფმა საჯარო რეესტრს დირექტორის ცვლილების განცხადებით მიმართა.
ინვესტორის წარმომადგენლების მიერ წარდგენილი განცხადება მარეგისტრირებელმა ორგანომ თავდაპირველად შეაჩერა, თუმცა საბოლოოდ 21 თებერვალს გადაწყვეტილება შეცვალა. სკოლის დამფუძნებლის ნათია ჯანაშიას წარმომადგენლის განცხადებით, ამ გადაწყვეტილებასთან შეგუებას არ აპირებენ და დავა გრძელდება.
გაიგეთ მეტი:
