სამრეწველო პროდუქციის მწარმოებელთა ფასების ინდექსი უჩვენებს, თუ რამდენად ძვირდება/იაფდება სამრეწველო პროდუქციის წარმოება საქართველოში. აღნიშნული ინდექსი 2015 წლის დეკემბერში წინა თვესთან (ნოემბერთან) შედარებით 0.9%-ით შემცირდა, ხოლო 2014 წლის დეკემბერთან შედარებით 4.7%-ით არის გაზრდილი. 2005 წელთან შედარებით კი დღეს პროდუქციის წარმოება 77%-ით მეტ დანახარჯს მოითხოვს.
ბოლო ერთი წლის განმავლობაში მნიშვნელოვნად გაძვირდა საკვები პროდუქტების (სასმელების ჩათვლით) და თამბაქოს წარმოება – 7.6%-ით, ცელულოზა-ქაღალდის მრეწველობა და საგამომცემლო საქმიანობა 18%-ით, რეზინისა და პლასტმასის ნაწარმის წარმოება 21%-ით და ხე-ტყის დამუშავება და ხის ნაწარმის წარმოება 23%-ით, ელექტროენერგიის, აირისა და წყლის წარმოება და განაწილება 15%-ით.
