აშშ-ის პრეზიდენტმა, დონალდ ტრამპმა კრიპტოინდუსტრიის აღმასრულებელ დირექტორებთან შეხვედრამდე ერთი დღით ადრე, ბიტკოინის სტრატეგიული რეზერვის შექმნის აღმასრულებელ ბრძანებას ხელი მოაწერა.
დონალდ ტრამპის მიერ დანიშნული თეთრი სახლის ხელოვნური ინტელექტისა და კრიპტოპროგრამების ხელმძღვანელის, მილიარდერ დევიდ ზაკსის განცხადებით, პირველ ეტაპზე აშშ-ის ბიტკოინის სტრატეგიული რეზერვის კაპიტალი ის ბიტკოინი იქნება, რომელსაც ფედერალური მთავრობა კრიმინალებისთვის ან სამოქალაქო დავებისას ჩამორთმევის შედეგად ფლობს.
თეთრ სახლში გამართულ კრიპტოსამიტზე, დიდი ალბათობით, დონალდ ტრამპი კრიპტოვალუტების სტრატეგიული რეზერვის ჩამოყალიბების მიზნებისა და გეგმების შესახებ უფრო ვრცლად ისაუბრებს.
როგორც ცნობილია, კრიპტოაქტივების სტრატეგიულ რეზერვში ბიტკოინის გარდა კიდევ ოთხი მსხვილი კრიპტოვალუტა იქნება წარმოდგენილი. ტრამპის მიერ გავრცელებული ინფორმაციით, აღნიშნული კრიპტოვალუტებია: Ethereum-ი, XRP-ი, Solana და Cardano (ADA).
ჯერჯერობით სტრატეგიული რეზერვის ფუნქციონირების შესახებ დამატებითი დეტალები ცნობილი არაა. ფინანსური ანალიტიკოსებისთვის უცნობია ისიც, თუ რა სტრატეგია ექნება რეზერვს აქტივებით მაქსიმალური შემოსავლის მისაღებად ან რა სარგებელს მიიღებენ ამ პროექტით ამერიკელი გადასახადის გადამხდელები.
„სტრატეგიულ რეზერვში არსებულ ბიტკოინს აშშ არ გაყიდის. ის [ბიტკოინი] შეინახება როგორც ღირებულების წყარო. სტრატეგიული რეზერვი კრიპტოვალუტის, ანუ როგორც ცნობილია „ციფრული ოქროს“ Fort Knox-ი იქნება“, – განაცხადა დევიდ ზაკსმა. ცნობისათვის Fort Knox-ი ამერიკაში მდებარე ოქროს რეზერვების დიდი ნაწილის საცავია.
დევიდ ზაკსის ცნობით, აშშ-ის ფედერალური მთავრობა ამჟამად 200,000 ბიტკოინს ფლობს. თუმცა რა მონაცემებზე დაყრდნობითაა მიღებული ეს რიცხვი – უცნობია.
