ტანკები წლების განმავლობაში სამხედრო ძალის სიმბოლოდ იყო მიჩნეული. თუმცა ბოლო პერიოდში მათი როლი მწვავე განხილვის საგნად იქცა, განსაკუთრებით მას შემდეგ, რაც უკრაინამ უპილოტო საფრენი აპარატების გამოყენებით ასობით რუსული ტანკის განადგურება შეძლო. აშშ-ის ევროპული სარდლობის შეფასებით, რუსეთმა 2024 წელს უკრაინაში დაახლოებით 3000 ტანკი დაკარგა.
ამის მიუხედავად, ეს საბრძოლო მანქანები არაერთი ქვეყნისთვის დღესაც სამხედრო შესაძლებლობების ცენტრალურ ნაწილს წარმოადგენს. სწორედ ამიტომ, სტატიაში წარმოგიდგენთ ქვეყნების რეიტინგს მათ განკარგულებაში არსებული საბრძოლო ტანკების რაოდენობის მიხედვით. რეიტინი Visual Capitalist-მა Global Firepower-ის მონაცემების საფუძველზე შეადგინა. მონაცემები მიმდინარე მდგომარეობას ასახავს და მოიცავს დაახლოებით შეფასებებს იმ შემთხვევებში, როდესაც ოფიციალური მაჩვენებლები მიუწვდომელი იყო. აქვე საყურადღებოა, რომ რეიტინგში ჯავშანტრანსპორტიორები და ქვეითთა საბრძოლო მანქანები გათვალისწინებული არ არის.
ბოლო ათწლეულების განმავლობაში ჩინეთმა თავისი სამხედრო შესაძლებლობები მკვეთრად გააფართოვა. მაშინ, როდესაც ცივი ომის შემდეგ ნატოს წევრმა ქვეყნებმა თავდაცვის ხარჯები შეამცირეს, ჩინეთმა თავისი სამხედრო ბიუჯეტი 566%-ით გაზარდა და მსოფლიოში სამხედრო დანახარჯების კუთხით მეორე ადგილზე გადავიდა – მას მხოლოდ ამერიკის შეერთებული შტატები უსწრებს.
ამ ინვესტიციამ ხელი შეუწყო ტანკების ფლოტის მნიშვნელოვან ზრდასაც. 2023 წლიდან ჩინეთმა გადაუსწრო როგორც რუსეთსა და ჩრდილოეთ კორეას, ასევე აშშ-საც, და დღეს მას მსოფლიოში საბრძოლო ტანკების უდიდესი ფლოტი აქვს – 6,800 ტანკით.
ჩინეთს მეორე და მესამე პოზიციებზე რუსეთი და შეერთებული შტატები მოსდევს, შესაბამისად, 5,750 და 4,640 ტანკით. ჩრდილოეთ კორეა 4,344 ტანკით მეოთხე ადგილზეა და ოდნავ უსწრებს ინდოეთს, რომელიც 4,201 ტანკს ფლობს.
ტოპ-20 ქვეყანა საბრძოლო ტანკების რაოდენობის მიხედვით (2025 წელი):
| რანგი | ქვეყანა | ტანკების რაოდენობა |
|---|---|---|
| 1 | ჩინეთი | 6,800 |
| 2 | რუსეთი | 5,750 |
| 3 | აშშ | 4,640 |
| 4 | ჩრდილოეთ კორეა | 4,344 |
| 5 | ინდოეთი | 4,201 |
| 6 | ეგვიპტე | 3,620 |
| 7 | პაკისტანი | 2,627 |
| 8 | თურქეთი | 2,238 |
| 9 | სამხრეთ კორეა | 2,236 |
| 10 | ირანი | 1,713 |
| 11 | ალჟირი | 1,485 |
| 12 | იორდანია | 1,458 |
| 13 | ვიეტნამი | 1,374 |
| 14 | საბერძნეთი | 1,344 |
| 15 | ისრაელი | 1,300 |
| 16 | უკრაინა | 1,114 |
| 17 | ერაყი | 1,025 |
| 18 | მაროკო | 903 |
| 19 | ტაივანი | 888 |
| 20 | საუდის არაბეთი | 840 |
