ევროკავშირის და გაეროს ინდუსტრიული განვითარების ორგანიზაციის (UNIDO) ხელშეწყობით, UNIDO-მ, „საქართველოში კერძო სექტორის კონკურენტუნარიანობისთვის ევროკავშირის ინოვაციური პროექტის“ ფარგლებში, საქართველოს ბიოფარმაცევტულ კლასტერთან მჭიდრო თანამშრომლობით, საერთაშორისო კონფერენცია: “ბიოფარმა 2023 საქართველო” ჩაატარა. კონფერენცია გაიმართა შერატონ გრანდ თბილისი მეტეხი პალასში, სადაც გაერთიანდნენ ბიოფარმაცევტული და ბიოტექნოლოგიის სფეროში მოღვაწე როგორც ადგილობრივი, ისე საერთაშორისო წარმომადგენლები.
კონფერენცია გახსნეს და მოწვეულ სტუმრებს მისასალმებელი სიტყვით მიმართეს შემდეგმა წარმომადგენლებმა: რატი ღოლიჯაშვილი, საქართველოს ბიოფარმაცევტული კლასტერის გამგეობის თავმჯდომარე; მინდი ბოჟკოვა, საქართველოში ევროკავშირის წარმომადგენლობის ატაშე; გიორგი ანდღულაძე, UNIDO-ს პროექტების ეროვნული კოორდინატორი; ავთანდილ კასრაძე, საქართველოს ინოვაციებისა და ტექნოლოგიების სააგენტო; და ლევან გოგიბერიძე, საქართველოს ფარმაცევტთა ასოციაციის პრეზიდენტი.
კონფერენცია, რომელიც მიეძღვნა “ბიოფარმაცევტიკასა და ფარმაცევტული სექტორის ბიოტექნოლოგიები”-ს თემას, მიზნად ისახავდა საქართველოს პოზიციონირებას, როგორც საკვანძო საერთაშორისო ჰაბის, რომელიც ხელს უწყობს მეცნიერებს, ინოვატორებს, კვლევით ორგანიზაციებს, პოლიტიკურ ლიდერებს, მარეგულირებელი ორგანოების წარმომადგენლებსა და გადაწყვეტილების მიმღებებს შორის თანამშრომლობას.
კლასტერისა და მისი წევრების გარდა, კონფერენციას ესწრებოდნენ ევროკავშირის დელეგაციის საქართველოს წარმომადგენლობა, UNIDO, საგანმანათლებლო და კვლევითი ინსტიტუტები, ფარმაცევტული საქმიანობის რეგულირების სააგენტო, საქართველოს მთავრობის მაღალი-რანგის წარმომადგენლები, სხვა შესაბამისი უწყებები და ჯანდაცვისა და ბიოტექნოლოგიის სფეროს ექსპერტები. „ბიოფარმა 2023 საქართველო“ ეძღვნება ბიოფარმას ინდუსტრიაში მიღწევების, ტექნოლოგიების, ინოვაციებისა და რეგულაციების შესწავლას. კონფერენციამ გააერთიანა მონაწილეები მსოფლიოს მასშტაბით, რათა მონაწილეობა მიეღოთ ამ პროცესში, გაეზიარებინათ შეხედულებები და განეხილათ ფარმაცევტული მეცნიერებებისა და ბიოტექნოლოგიების სფეროში უახლესი მოვლენები. ის მიზნად ისახავდა ბიოფარმაცევტულ ინდუსტრიაში ცოდნის გაზიარების, თანამშრომლობის და პარტნიორობის ხელშეწყობას, ისევე როგორც ცნობიერების ამაღლებას ჯანდაცვის ისეთი გამოწვევების შესახებ, როგორიცაა ანტიმიკრობული რეზისტენტობა და მცენარეული მედიკამენტების წარმოებასთან დაკავშირებული სირთულეები. დისკუსიების დროს ძირითადი ფოკუსირება მოხდა სამ საკითხზე: ევროკავშირისა და UNIDO-ს დახმარება საქართველოს ბიოფარმაცევტული კლასტერისთვის, ბიოფარმაცევტიკა და ანტი-მიკრობული რეზისტენტობა, და ბუნებრივი მედიკამენტების წარმოება. ევროკავშირისა და UNIDO-ს მხარდაჭერა განხილული იქნა სათანადო საწარმოო პრაქტიკასთან (GMP) თავსებადობის ჭრილში, რაც კლასტერის ევროპულ სტანდარტებთან დაახლოვებას ისახავს მიზნად. მონაწილეები შეთანხმდნენ, უახლოეს მომავალშიც განაგრძონ თანამშრომლობისა და ტექნოლოგიების გაზიარების პროცესის ხელშეწყობა, რაც მიზნად ისახავს უფრო მეტ გახსნილობასა და ინტეგრაციას ბიოფარმაცევტიკის ღირებულებათა ჯაჭვში.
საქართველოს ბიოფარმაცევტული კლასტერი (GBC) აერთიანებს ფარმაცევტული პროდუქტების მწარმოებლებს საქართველოში, რომლებიც, ძირითადად ბაქტერიოფაგების, მცენარეული მედიკამენტების და ჯენერიკების მწარმოებლებს წარმოადგენენ. გარდა ამისა, ინსტიტუტები და ორგანიზაციები საკვანძო, დამაკავშირებელ და დამხმარე სექტორებში, როგორიცაა ლუგარის სახელობის საზოგადოებრივი ჯანდაცვის კვლევითი ცენტრი და სამედიცინო და ფარმაცევტული საქმიანობის რეგულირების სააგენტო, მნიშვნელოვან როლს ასრულებენ ფარმაცევტული კომპანიების ფუნქციონირებისა და განვითარებისათვის ხელსაყრელი გარემოს შექმნაში. დამატებითი ინფორმაცია კლასტერის შესახებ ხელმისაწვდომია ვებსაიტზე: საქართველოს ბიოფარმაცევტული კლასტერი
როგორც ბაქტერიოფაგების, ასევე მცენარეული მედიცინის წარმოებას საქართველოში, დიდი ისტორია აქვს, რომელიც საბჭოთა დროიდან იწყება, და ექსტენსიურ კვლევასა და განვითარებას ეფუძნება (R&D) ინოვაციური ბიოფარმაცევტული გადაწყვეტილებების ძიების გზაზე. აღნიშნული ისტორიული კონტექსტი, დღევადელ მწარმოებლებს, საშუალებას აძლევს გამოიყენონ არსებული გამოცდილება, რათა შექმნან დამაჯერებელი ნარატივი იმ შესაძლებლობების შესახებ, რომელიც დაფუძნებულია ათწლეულების მანძილზე სამეცნიერო კვლევებისა და ინოვაციების შედეგად მიღებულ შედეგებზე. სამომავლო ინოვაციების, მოდერნიზაციისა და პროგრესის დასაჩქარებლად, დადგა დრო, განხილულ იქნას საქართველოს ბიოფარმაცევტულ სექტორში ბოლო დროს განვითარებული მოვლენები. სამომავლო პროგრესზე საუბარი საჭირო გახდა განსაკუთრებით მას შემდეგ, რაც ევროკავშირმა და UNIDO-მ კარგი წარმოების პრაქტიკის საერთაშორისო სტანდარტის (GMP) დანერგვისთვის საფუძველის შექმნაში სათანადო წვლილი შეიტანეს, რის შემდეგაც კლასტერი ევროპულ სტანდარტებს დაუახლოვდა.
“ბიოფარმა 2023 სრულად ფოკუსირებულია ბიოფარმაცევტული სექტორის, რევოლუციური ფაგების ტექნოლოგიისა და მცენარეული სამკურნალო საშუალებების ინდუსტრიების კიდევ უფრო განვითარებაზე. დღეს გვაქვს უნიკალური შესაძლებლობა კიდევ ერთხელ ხაზი გავუსვათ და მოვნიშნოთ საქართველო, მსოფლიოს ბიოტექნოლოგიურ და ბიოფარმაცევტულ რუქაზე, გვაქვს შესაძლებლობა საფუძველი ჩაეყაროს თანამშრომლობაზე დაფუძნებულ ახალ იდეებს, ინოვაციურ ტექნოლოგიებსა და პროდუქტებს რომელთაც სიცოცხლის გადარჩენა და ცხოვრების ხარისხის გაუმჯობესების პოტენციალი გააჩნიათ, საქართველოსა და მსოფლიოს მასშტაბით.” ამის შესახებ განაცხადა საქართველოს ბიოფარმაცევტული კლასტერის გამგეობის თავმჯდომარემ რატი ღოლიჯაშვილმა.
“ევროკავშირი ამაყობს, რომ მხარს უჭერს ინოვაციებს და მეწარმეობას საქართველოში. საქართველოს ბიოფარმაცევტული კლასტერი არის მხარდაჭერის ერთ-ერთი მაგალითი, რომელსაც ევროკავშირი ახორციელებს ქართული ბიზნესისთვის ENPARD და EU4Business პროგრამების ფარგლებში. კლასტერის ინოვაციური ძალისხმევა გზას უხსნის ფარმაცევტული პროდუქტების წარმოებას სათანადო წარმოების პრაქტიკის (GMP) სტანდარტის შესაბამისად, რაც კლასტერს აახლოვებს ევროპულ ხარისხთან. ვიმედოვნებთ, რომ ბიოფარმაცევტული კლასტერის წარმატება იქნება შთაგონება სხვა კომპანიებისთვის, რათა განვითარდეს ცოდნასთან დაკავშირებული და მაღალი ღირებულების მქონე წარმოება საქართველოში ევროკავშირის სტანდარტების შესაბამისად”, განაცხადა საქართველოში ევროკავშირის წარმომადგენლობის ატაშემ, კერძო სექტორის განვითარებისა და ხელშეწყობის პროგრამის მენეჯერმა, მინდი ბოჟკოვამ.
„ღონისძიება არის პირველი მცდელობა საქართველო წარმოჩენილ იქნას, როგორც საერთაშორისო სივრცე, სადაც ინოვატორებს, სფეროს ექსპერტებს და მოაზროვნე ადამიანებს შეუძლიათ დაუკავშირდნენ ერთმანეთს, გაცვალონ იდეები და გააზიარონ ცოდნა. ევროკავშირისა და UNIDO-ს მხარდაჭერით, ქართველი მწარმოებლები უკვე მზად არიან იმისათვის, რომ გამოიჩინონ ინიციატივა და გაუძღვენ მსოფლიოს მასშტაბით კლასტერში ჩართულ დაინტერესებულ მხარეებს შორის უფრო ღრმა ინტეგრაციისა და უკეთესი კოორდინაციისკენ მიმართულ პროცესებს”, განაცხადა გიორგი ანდღულაძემ, UNIDO-ს პროექტების ეროვნულმა კოორდინატორმა.
კლასტერის ხელშეწყობა პროექტის „საქართველოში კერძო სექტორის კონკურენტუნარიანობისთვის ევროკავშირის ინოვაციური პროექტის“ ფარგლებში ხორციელდება, რომელსაც ევროკავშირი 6 მილიონი ევროთი აფინანსებს. პროექტს ახორციელებს გაეროს ოთხი სააგენტო: გაეროს განვითარების პროგრამა (UNDP), გაეროს სურსათისა და სოფლის მეურნეობის ორგანიზაცია (FAO), გაეროს ინდუსტრიული განვითარების ორგანიზაცია (UNIDO) და მიგრაციის საერთაშორისო ორგანიზაცია (IOM). S
