21 მაისს Forbes.ge-ზე გამოქვეყნდა მასალა სათაურით – “ტელევიზიების შემოსავლები შემცირებდა”. მასალის გავრცელებიდან რამდენიმე დღეში გამოცემას კომუნიკაციების მარეგულირებელი კომისია დაუკავშირდა. მარეგულირებლის პრესსამსახურმა წერილობით გვაცნობა, რომ მასალა მცდარი იყო და კომისიის მოთხოვნა იყო, რომ ის შეცვლილიყო.
ერთ–ერთი საკითხი, რომელსაც კომისია მცდარს უწოდებდა შეეხებოდა ტელევიზიების სარეკლამო შემოსავლებს. სტატიაში, რომელიც Forbes.ge-ზე განთავსდა აღნიშნული იყო, რომ დათვლაში შედიოდა რეკლამიდან და სპონსორობიდან მიღებული შემოსავლები. რეკლამიდან და სპონსორობიდან ტელევიზიებმა 2018 წელს 67.2 მლნ ლარის შემოსავალი მიიღეს, 2017 წელს 69.1 მლნ ლარი, ხოლო 2016 წელს კი 83.2 მლნ ლარი. კომისიის მოთხოვნა იყო, რომ სტატიაში დაგვეთვალა არა მხოლოდ რეკლამიდან და სპონსორობიდან მიღებული შემოსავლები, არამედ მასთან ერთად განცხადებებიდან, ტელეშოფინგიდან და პროდუქტის განთავსებიდან მიღებული შემოსავალიც. ამ შემთხვევაში მონაცემები შემდეგია: 2018 წელი – 75.2 მლნ ლარი; 2017 წელი – 75.4 მლნ ლარი, 2016 წელი – 87.9 მლნ ლარი.
შემცირდა, თუ არა, სატელივიზიო სარეკლამო ბაზარი 2018 წელს? საკითხზე ვრცელი განმარტება კომუნიკაციების კომისიის ხელმძღვანელმა გადაცემაში “Forbes-ის კვირა გიორგი ისაკაძესთან ერთად” გააკეთა:
“კომისიის თუ პირადად ჩემს მიმართ საჯარო კრიტიკას მძიმედ არ ვიღებ. ერთი შესწორება მსურს – სიცრუე ახსენეთ “ფორბსთან” დაკავშირებით, – ეს ასე იყო აღქმული და ასე არ იყო ნამდვილად და განმარტება მსურს გავაკეთო. რა თქმა უნდა, კომისია არ გულისხმობს და თავშიც არ მოსვლია, რომ Forbes-ს რაიმე გამიზნულად გაეკეთებინოს, ან რაღაც მანიპულაციები სპეციალურად გაეკეთებინოს… რა თქმა უნდა, თუ ჩვენ არ შევთანხმდით რომ ერთნაირად ვითვლით და ერთნაირ პარამეტრებს ვიყენებთ, შეიძლება სხვადასხვანაირად დავთვალოთ და ეს არ არის გამიზნული მანიპულირება. ეს შეიძლება შეცდომა იყოს, მაგრამ თუ ჩვენ გავერკვევით და შევჯერდებით მოდელზე, როგორ გავაკეთეოთ ანალიტიკა, სხვა საკითხია… მსურს დავაზოსუტო, რომ მსგავსი არ ყოფილა”, – ამბობს ბექაური.
კომუნიკაციების ეროვნული კომისიის თავმჯდომარე განმარტავს, რომ სარეკლამო ბაზრიდან მაუწყებლებში შესული თანხა და მთლიანი სატელევიზიო სარეკლამო თანხა განსხვავებულია. კერძოდ, ერთია ის თანხა, რომელიც რეკლამიდან მაუწყებლებში მიდის, ხოლო მეორე – მთლიანი სატელევიზიო სარეკლამო ბაზარი, ანუ თანხა, რომელსაც დამკვეთი რეკლამისთვის გამოყოფს.
“როდესაც ვლაპარაკობთ სარეკლამო ბაზარზე, შეთანხმებული უნდა ვიყოთ სინამდვილეში რაზე ვლაპარაკობთ, რომ იცოდეს მაყურებელმა და ყველამ რას ვითვლით და როგორ. ტელევიზიებში შემოსული სარეკლამო შემოსავლები, რომელიც კომისიის ანალიტიკურ პორტალზე ქვეყნდება ყოველ კვარტალურად, არის ის შემოსავლები, რომელიც სარეკლამო ბაზრიდან მიიღეს ტელევიზიებმა, მაგრამ ამას მთლიანობაში ჩვენ ვერ დავარქმევთ სატელევიზიო სარეკლამო ბაზარს, რადგან მთლიანი სარეკლამო ბაზარი არის ის თანხა, რასაც რეკლამის მიმცემები ხარჯავენ სატელევიზიო რეკლამისთვის და ამ დარგში დასაქმებულმა ანალიტიკოსებმაც, მედიის წარმომადგენლებმაც ძალიან კარგად იციან, რომ როდესაც კონკრეტულმა კომპანიამ სატელევიზიო რეკლამისთვის ფული გასცა, სანამ ტელევიზიამდე მივიდა ეს თანხა, მან რამდენიმე ეტაპი გაიარა “, – განაცხადა კომუნიკაციების ეროვნული კომისიის თავმჯდომარემ.
