შეიძლება ვივარაუდოთ, რომ დისტანციურ სამსახურზე საუბრისას, ადამიანებს ხშირად ბალისა და ტაილანდის მსგავსი ტროპიკული და ბიუჯეტური ქვეყნები ახსენდებათ, მაგრამ, როგორც კიბერუსაფრთხოების ამერიკული კომპანიის, NordLayer-ის უახლესი კვლევიდან ირკვევა, დისტანციური სამსახურისთვის ათი საუკეთესო ქვეყნიდან რვა – ევროპაში მდებარეობს.
დისტანციური სამსახურისთვის საუკეთესო ქვეყნების რეიტინგში გერმანია ლიდერობს, რომელსაც დანია და ამერიკის შეერთებული შტატები მოჰყვება. საუკეთესო ქვეყანათა ათეულის დანარჩენი ქვეყნები ევროპიდანაა, მაგრამ სინგაპურის სახით ერთი გამონაკლისიც მოიძებნა – მცირე ზომის აზიური ქვეყანა რეიტინგის მე-9 ადგილს დასჯერდა.
„ტრენდი ნათელია – კოვიდ-19-ის პირველად გავრცელების შემდეგ, დისტანციური და ჰიბრიდული სამსახური გარდაუვალ მოვლენად იქცა იმ კომპანიებშიც კი, რომლებიც ამ დრომდე ფიზიკურ ურთიერთობებს ამჯობინებდნენ“, – ამბობს NordLayer-ის ტექნოლოგიური დირექტორი, ჯუტა გურინავიკიუტე Bloomberg-თან საუბრისას.
ცნობისთვის გეტყვით, რომ რეიტინგი, რომელშიც 66 ქვეყანა მოხვდა, ოთხ ძირითად კრიტერიუმს ეფუძნება, ესენია – კიბერუსაფრთხოება, ეკონომიკური და სოციალური გარემო, მათ შორის ჯანდაცვისა და ინგლისური ენის ცოდნის დონე, ციფრული და ფიზიკური ინფრასტრუქტურა და პანდემიური პოლიტიკა. ამ კრიტერიუმების მიხედვით, დისტანციური მუშაობისთვის ყველაზე ცუდი ქვეყანა – ალჟირია.
საინტერესოა, რომ კიბერუსაფრთხოების კომპონენტში შედარებით მცირე ზომის ევროპული ქვეყნები – ლიეტუვა, ესტონეთი და სლოვაკეთი ლიდერობენ. ციფრული ინფრასტრუქტურის კუთხით კი, ვითარება შემდეგნაირია: ყველაზე სწრაფი ინტერნეტი მე-11 ადგილას გასულ სამხრეთ კორეაშია, ხოლო ყველაზე ბიუჯეტური – 37-ე ადგილას გასულ ისრაელში. ეკონომიკური და სოციალური გარემოს მიმართულებით კანადა, გაერთიანებული სამეფო და პორტუგალია ლიდერობენ, ხოლო პანდემიური პოლიტიკით – აშშ, ტაილანდი და ავსტრალია.
დისტანციური სამსახურისთვის საუკეთესო ქვეყნების NordLayer-ის მიერ შედგენილი რეიტინგის პირველ ათეულს Forbes Georgia უცვლელად გთავაზობთ:
- გერმანია (0.824 ქულა)
- დანია (0.816 ქულა)
- ამერიკის შეერთებული შტატები (0.809 ქულა)
- ესპანეთი (0.796 ქულა)
- ლიეტუვა (0.794 ქულა)
- ნიდერლანდები (0.791 ქულა)
- შვედეთი (0.788 ქულა)
- ესტონეთი (0.784 ქულა)
- სინგაპური (0.782 ქულა)
- საფრანგეთი (0.778 ქულა)
