საუდის არაბეთმა სახელმწიფო მხარდაჭერით შექმნილი ხელოვნური ინტელექტის კომპანია Humain-ი წარადგინა. Humain-ი სამეფოს AI-ჰაბად გადაქცევის ფართომასშტაბიანი პროექტის ნაწილია. პროექტს საუდის არაბეთის მემკვიდრე პრინცი მოჰამედ ბინ სალმანი უხელმძღვანელებს და მისი სუვერენული ფონდის, საჯარო საინვესტიციო ფონდის (PIF) მიერ დაფინანსდება.
გავრცელებული ინფორმაციით, Humain-ს Aramco Digital-ისა და Rakuten-ის ყოფილი აღმასრულებელი დირექტორი ტარეკ ამინი ჩაუდგება სათავეში. ამინმა სახელმწიფო ნავთობკომპანიის ტექნოლოგიური განყოფილების CEO-ს პოსტი დეკემბერში დატოვა. დეკემბერშივე ამინი პრინც მოჰამედ ბინ სალმანის ინიციატივას LinkedIn-ის პოსტის საშუალებით გამოეხმაურა: „ეს ინიციატივა, AI-ის მიმართულებით საუდის არაბეთის ეროვნულ სტრატეგიას გზას გაუხსნის და ჩემთვის პატივია, რომ ამ მისიის ხელმძღვანელობის შესაძლებლობა მაქვს“.
საუდის არაბეთის სუვერენული ფონდის განცხადებით, Humain-ი ხელოვნური ინტელექტის საკუთარ ტექნოლოგიას შექმნის,სამეფოს ეკონომიკაში ხელოვნური ინტელექტის ინსტრუმენტების გამოყენებას წაახალისებს და მონაცემთა ცენტრების ახალ პროექტებს მოიზიდავს. წყაროთა ცნობით, Humain-ში ქვეყნის რამდენიმე სხვა მსხვილი კომპანიის, მათ შორის Aramco Digital-ის, Saudi Data & AI Authority-ისა (SDAIA) და Tonomus-ის თანამშრომლები დასაქმდებიან.
ცნობისთვის, Humain-ი 13 მაისს, საუდის არაბეთში აშშ-ის პრეზიდენტ დონალდ ტრამპის პირველ ოფიციალურ ვიზიტამდე ერთი დღით ადრე გაიხსნა. პრეზიდენტ ტრამპის ვიზიტი აშშ-ის კომპანიებს საუდის არაბეთში, არაბთა გაერთიანებულ საამიროებსა და კატარში ინვესტიციების მოზიდვაში დაეხმარება. მანამდე, მარტში, ტრამპმა პირობა დადო, რომ ამ ქვეყნებს იმ დათქმით ეწვეოდა, რომ ამერიკულ ბიზნესებს ეს ტრილიონობით დოლარის ინვესტიციას მოუტანდა.
