საქართველოს ბანკი, როგორც განათლების შესაძლებლობების შექმნაზე ორიენტირებული ინსტიტუტი, წიგნიერების გამავრცელებელი საზოგადოების მხარდამჭერია. ინიციატივა ლიტერატურის პოპულარიზაციისა და საზღვარგარეთ მცხოვრები თანამოქალაქეების მხარდაჭერის მიზნით, სხვადასხვა ქვეყანაში ქართული წიგნის კუთხეების შექმნას ისახავს მიზნად. საქართველოს ბანკი პროექტის მთავარი სპონსორია.
პარტნიორობის ფარგლებში, საქართველოს ბანკის ფინანსური მხარდაჭერითა და ბიბლუსის ჩართულობით, საზღვარგარეთ ახალი ბიბლიოთეკები მოეწყობა, არსებულებს კი დაემატება მრავალფეროვანი ლიტერატურა, რაც ხელს შეუწყობს ქართველი ემიგრანტებისთვის ლიტერატურაზე ხელმისაწვდომობის ზრდას.
„საქართველოს ბანკი, როგორც განათლების მხარდამჭერი ორგანიზაცია, მიზნად ისახავს, ხელი შეუწყოს ქართული ლიტერატურის პოპულარიზაციას როგორც ქვეყნის შიგნით, ასევე მის გარეთ. მოხარული ვართ, რომ, ამჯერად, შესაძლებლობა გვაქვს, წიგნიერების გამავრცელებელ საზოგადოებასთან და ბიბლუსთან ერთად, ჩვენი წვლილი შევიტანოთ საზღვარგარეთ მცხოვრები ქართველებისთვის ბიბლიოთეკების მოწყობაში. პროექტის მიზანია, დავეხმაროთ ემიგრანტებს, მათ შორის ახალ თაობას, განათლების მიღებასა და საქართველოსთან კავშირების შენარჩუნებაში, რაც თანხვედრაშია საქართველოს ბანკის კორპორაციული სოციალური პასუხისმგებლობის მიმართულების ერთ-ერთ მთავარ ღირებულებასთან – ხელი შევუწყოთ განათლებაზე ხელმისაწვდომობის ზრდას. აღსანიშნავია, რომ თანამშრომლობის ფარგლებში, პირველი ბიბლიოთეკა ესპანეთში მოეწყობა, მომავალში კი ეტაპობრივად სხვა ქვეყნებსაც მოვიცავთ“, – აღნიშნავს ანა ლომთაძე, საქართველოს ბანკის კორპორაციული სოციალური პასუხისმგებლობის (CSR) გუნდის ხელმძღვანელი.
ინფორმაციისთვის, ორგანიზაცია „წიგნიერების გამავრცელებელი საზოგადოება“, 2024 წლის იანვარში „ბიბლუსმა“ და გიორგი კეკელიძემ ერთობლივად დააფუძნეს. აღნიშნული ინიციატივა მიზნად ისახავს ქართულ სოფლებში სკოლებისა და ბიბლიოთეკების წიგნებითა და კომპიუტერებით მომარაგებას, ასევე, საზღვარგარეთ ქართული წიგნის კუთხეების შექმნას.
ახალგაზრდების მხარდაჭერის მიზნით, საქართველოს ბანკის CSR მიმართულებისთვის უკვე 5 წელზე მეტია განათლება პრიორიტეტია. სწორედ ამიტომ, ბანკი 40-ზე მეტ საგანმანათლებლო პროექტს ახორციელებს და უჭერს მხარს, რითაც 500 000-ზე მეტი მოსწავლისთვის, სტუდენტისა და ახალგაზრდა პროფესიონალისთვის ქმნის განათლების შესაძლებლობას. ბანკის CSR მიმართულების პორტფელი მოიცავს ისეთ საგანმანათლებლო პროექტებს, როგორებიც არის: საქართველოს ბანკის სტიპენდიები; გიორგი ჩახავას სახელობის სტიპენდია; დიდ ბრიტანეთში, აშშ-სა და გერმანიაში სწავლის სრული დაფინანსება; იდეათეკები – საქართველოს ბანკის ბიბლიოთეკების პროექტი; საქართველოს ბანკისა და კომაროვის ერთობლივი პროექტი – STEM სკოლა; საქართველოს ბანკის ოლიმპიადები მოსწავლეებისთვის: STEM ოლიმპიადა, ეკონომიკის ოლიმპიადა, Kings-ის ფინანსური განათლების ოლიმპიადა, ევერესტი. ამასთან, საჯარო მეტყველების კონკურსი, და სხვა.
საქართველოს ბანკის მიერ განხორციელებული საგანმანათლებლო პროექტების შესახებ დეტალური ინფორმაციის მისაღებად ეწვიეთ ვებგვერდს ganatleba.bog.ge
