ბიტკოინს არა მხოლოდ კერძო ინვესტორები და კომპანიები, არამედ მთავრობებიც ფლობენ, თუმცა მათ ხელში მილიარდობით დოლარის ღირებულების კრიტოვალუტა სხვადასხვა მიზნითა თუ მიზეზით აღმოჩნდა.
BitcoinTreasuries.net-დან მოპოვებულ მონაცემებზე დაყრდნობით, Visual Capitalist-მა იმ მთავრობების სია შემოგვთავაზა, რომლებიც ყველაზე მეტ ბიტკოინს ფლობენ. სტატიაში მოყვანილი მონაცემები 2025 წლის 31 ივლისის მდგომარეობას ასახავს. ღირებულებები დაფუძნებულია BTC-ის ფასზე, რომელიც დაანგარიშების პერიოდში 118,454 აშშ დოლარს შეადგენდა. აქვე გასათვალისწინებელია, რომ ზოგიერთი ქვეყანა თავის რეზერვებზე ინფორმაციას საჯაროდ არ აქვეყნებს.
ყველაზე მეტ ბიტკოინს ამერიკის შეერთებული შტატები და ჩინეთი ფლობს. აღსანიშნავია, რომ აშშ-ის შემთხვევაში ამ მარაგის დიდი ნაწილი სამართალდამცავი ორგანოების მიერ ჩამორთმეულ თანხებზე მოდის, მათ შორის Silk Road-დან და სხვა ე.წ. ბნელი საბაზრო ქსელებიდან. მთლიანობაში, 31 ივლისის მდგომარეობით, შეერთებული შტატები 198,022 ბიტკოინს ფლობს, რომელთა ღირებულება იმ პერიოდისთვის $23 მილიარდს აჭარბებდა.
Investopedia-ს თანახმად, FBI-მ 2013 წელს Silk Road-დან 144,000-ზე მეტი BTC ამიღო. მის დამფუძნებელს, როს ულბრიხტს, სამუდამო პატიმრობა მიესაჯა, მაგრამ ის პრეზიდენტმა ტრამპმა 2025 წლის იანვარში შეიწყალა.
ჩინეთი აშშ-ს ჩამორჩება და 190,000 ბიტკოინს ფლობს, რომელთა ღირებულება დაახლოებით 22.5 მილიარდი დოლარია. საცალო კრიპტოვალუტით ვაჭრობის აკრძალვის მიუხედავად, ჩინეთმა, მაინინგისა და თაღლითობის შემთხვევებისას ჩამორთმეული ბიტკოინების წყალობით, საკმაოდ დიდი რეზერვები შეინარჩუნა.
| ქვეყანა | ბიტკოინების რაოდენობა | ღირებულება (აშშ დოლარი) | წილი საერთო მარაგში |
|---|---|---|---|
| აშშ | 198,022 | $23,456,497,988 | 0.943% |
| ჩინეთი | 190,000 | $22,506,260,000 | 0.905% |
| გაერთიანებული სამეფო | 61,245 | $7,254,715,230 | 0.292% |
| უკრაინა | 46,351 | $5,490,461,354 | 0.221% |
| ჩრდილოეთი კორეა | 13,562 | $1,606,473,148 | 0.065% |
| ბუტანი | 11,286 | $1,336,871,844 | 0.050% |
| ელ-სალვადორი | 6,257 | $741,166,678 | 0.030% |
| ვენესუელა | 240 | $28,428,960 | 0.001% |
| ფინეთი | 90 | $10,660,860 | 0.000% |
