Tesla-ს ერთ-ერთმა ყველაზე ცნობილმა ანალიტიკოსმა ავტომწარმოებლის დირექტორთა საბჭოსთვის კომპანიის აღმასრულებელი დირექტორის, ილონ მასკის ერთგვარი შეკავების გეგმა წარმოადგინა. მიზანი Tesla-ზე მილიარდერის ქმედებების გავლენის შემცირებაა, მათ შორის პრეზიდენტ დონალდ ტრამპთან მასკის დაპირისპირების აღმოფხვრის გზით.
Wedbush-ის ანალიტიკოსი დენ აივზი სამშაბათს დილით კლიენტებისთვის გაგზავნილ წერილში წერს, რომ Tesla-ს დირექტორთა საბჭომ „ახლავე უნდა იმოქმედოს და მასკისთვის თავისი პოლიტიკური ამბიციებისა და ქმედებების გარშემო ძირითადი წესები დაადგინოს“.
აივზმა, რომელიც Tesla-ს აქციების მიმართვ ანალიტიკოსებს შორის გამორჩეულად ოპტიმისტურად არის განწყობილი, საბჭოსთვის სამმხრივი რეკომენდაცია წარადგინა:
- კომპენსაციის ახალი პაკეტის დამტკიცება, რომელიც მასკის ხმის მიცემის უფლებას კომპანიაში დაახლოებით 25%-მდე გაზრდის;
- ზუსტად განსაზღვრა, თუ რამდენი დრო უნდა გაატაროს მასკმა კომპანიაში – ეს წლების განმავლობაში ინვესტორების მთავარი მოთხოვნაა, რადგან მილიარდერი დროის მნიშვნელოვან ნაწილს მემარჯვენე პოლიტიკას, სოციალურ ქსელებსა და პირად კომპანიებს უთმობს;
- დაბოლოს, ყველაზე მნიშვნელოვანი – სპეციალური საზედამხედველო კომიტეტის შექმნა, რომელიც მასკის პოლიტიკურ ქმედებებზე იქნება ფოკუსირებული. კომიტეტს შეეძლება, დაარღვიოს ან შეწყვიტოს მილიარდერის კომპენსაცია იმ შემთხვევაში, თუ ის დადგენილ წესებს გადაუხვევს.
ცნობისთვის, Tesla-ს აქციების ფასი დღეს, სავაჭრო ბირჟის გახსნამდე, 1%-ით გაიზარდა, თუმცა აღსანიშნავია, რომ მასკის მიერ გასულ თვეში ტრამპის საჯარო კრიტიკის წამოწყების შემდეგ 10%-ზე მეტით არის გაუფასურებული. გუშინ აქციების ფასი მნიშვნელოვნად დაეცა, რაც მასკის მიერ ახალი პოლიტიკური პარტიის დაარსებაზე ინვესტორების რეაგირების შედეგია. ამან მსოფლიოს უმდიდრესი ადამიანის ქონების 12 მილიარდი დოლარით შემცირება გამოიწვია.
