Amazon-მა 2024 წელს გაყიდვებიდან $638 მილიარდი მიიღო, რაც 2023 წელთან შედარებით 11%-ით გაზრდილი მაჩვენებელია. ზრდის ტენდენციის გაგრძელების შემთხვევაში, ის შესაძლოა მალე ამერიკის ყველაზე შემოსავლიანი კომპანია გახდეს. Amazon-ის შემოსავლების ზრდაში უდიდესი წვლილი მის დივერსიფიცირებულ ბიზნესმოდელს მიუძღვის.
Amazon-ის შემოსავლები ბიზნესსეგმენტის მიხედვით
Amazon-მა ონლაინ მარკეტპლეისის გაყიდვებიდან 247 მილიარდი დოლარის შემოსავალი მიიღო, მესამე მხარის გამყიდველების მომსახურებიდან კი 156.1 მილიარდი დოლარის. ეს უკანასკნელი მოიცავს მოვაჭრეებს, რომლებიც Amazon-ის პლატფორმას იყენებენ.
აქვე აღსანიშნავია, რომ გასულ წელს Amazon-მა მომხმარებლებს 2 მილიარდზე მეტი „ყოველდღიური აუცილებელი ნივთი“ მიაწოდა. შედარებისთვის, Walmart-მა 2024 წელს 681 მილიარდი დოლარის შემოსავალი მიიღო და ხუთი მილიარდი ნივთის მიწოდების (იმავე დღეს მიწოდებით) შესახებ განაცხადა.
არსებული მონაცემებით, Walmart-ი ამერიკის ყველაზე შემოსავლიანი კომპანიაა, თუმცა არ არის გამორიცხული, რომ მალე მას Amazon-მა გადაასწროს. Walmart-ის ბოლო წლიურ ანგარიშში აღნიშნულია, რომ კომპანიის გაყიდვები 5.1%-ით გაიზარდა, რაც Amazon-ის ზრდის მაჩვენებლის დაახლოებით ნახევარია.
საინტერესოა, რომ Amazon-ის შემოსავლებში მესამე ადგილი ღრუბლოვანი სერვისების განყოფილებას, AWS-ს ეკავა. მთლიანობაში, AWS-ი კომპანიის საოპერაციო შემოსავლის ნახევარზე მეტს აგენერირებს, გლობალურ ბაზარზე დომინანტური როლის წყალობით. 2024 წლის მეოთხე კვარტლის მონაცემებით, AWS-ი ღრუბლოვანი სერვისების გლობალური ბაზრის 30%-ს ფლობდა, მას მოჰყვება Microsoft-ი 21%-იანი წილით და Google-ი 12%-იანი წილით.
Amazon-ის შემოსავლების დაყოფა სხვადასხვა ბიზნესსეგმენტის მიხედვით:
| კატეგორია | შემოსავლები (ფისკალური წელი დასრულდა 2024 წლის 31 დეკემბერს) |
წილი შემოსავალში |
|---|---|---|
| ონლაინ მაღაზიები | $247.0 მილიარდი | 38.7% |
| ფიზიკური მაღაზიები | $21.2 მილიარდი | 3.3% |
| მესამე მხარის გამყიდველის მომსახურება | $156.1 მილიარდი | 24.5% |
| სარეკლამო მომსახურება | $56.2 მილიარდი | 8.8% |
| სააბონენტო სერვისები | $44.4 მილიარდი | 7.0% |
| AWS | $107.6 მილიარდი | 16.9% |
| სხვა | $5.4 მილიარდი | 0.9% |
| წლიური შემოსავალი | $638 მილიარდი | 100% |
