უძრავი ქონების შერჩევა და შეძენა საკმაოდ დიდ დაკვირვებას მოითხოვს, შემდგომი გართულებების თავიდან არიდების მიზნით უმნიშვნელოვანესია სამართლებრივი ასპექტების დეტალურად გაცნობა. იურისტები გვირჩევენ, რომ ხელშეკრულების გაფორმებამდე გავერკვეთ როგორც შესაძენი ქონების, ისე დეველოპერული კომპანიის სამართლებრივ მდგომარეობაში. ასევე ქონების შეძენამდე მნიშვნელოვანია გამყიდველ იურიდიულ თუ ფიზიკურ პირს მოვთხოვოთ საჯარო რეესტრიდან ამონაწერის განახლება.
რატომ გვჭირდება მშენებარე ბინის წინასწარი რეგისტრაცია და როგორ უნდა მოვიქცეთ, თუკი კომპანია სახლს დათქმულ ვადებში არ გვაბარებს?
ბექა თეზელაშვილთ პროფესიით იურისტია და 10 წელზე მეტია, უძრავი ქონების სფეროში საქმიანობს. სწორედ ის გვესაუბრა ამ და სხვა საინტერესო თემაზე, რომელიც უნდა ვიცოდეთ სანამ უძრავ ქონებას შევიძენთ:
„უძრავი ქონების შეძენა ადამიანებისთვის ძალიან მნიშვნელოვანი გადაწყვეტილებაა, შესაძლოა მის მთელ ნაშრომს დებდეს ამ ერთ უძრავ ქონებაში და ძალიან დიდ საბანკო ვალდებულებასაც იღებდეს, გამომდინარე აქედან, საკმაოდ დიდი დაკვირვება სჭირდება ნასყიდობის ხელშეკრულების პირობებს. კარგად უნდა გავეცნოთ ხელშეკრულებას, სანამ ხელს მოვაწერთ. აუცილებლად უნდა გავეცნოთ დეველოპერული კომპანიის და შესაძენი ქონების სამართლებრივ მდგომარეობას. სამეწარმეო რეესტრში უნდა გადამოწმდეს, ხომ არ აქვს კომპანიას რაიმე სახის აკრძალვა ან ყადაღა, რაც შემდეგ ხელს შეუშლის ქონების გადაფორმებას.
სწორედ აქ ჩნდება ჩვენი, როგორც იურისტების ჩართულობის აუცილებლობა, რათა პროფესიონალის მიერ მოხდეს ყველა ამ საკითხის შეფასება და ხელშეკრულების დეტალურად გაცნობა.
თუმცა უნდა აღვნიშნო, რომ დღეს ჩვენს ქვეყანაში საკმაოდ გამართულად მუშაობს საჯარო სერვისები, ყველა ეს ინფორმაცია, რაც მაღლა ვახსენე, არის საჯარო და ხელმისაწვდომია სამეწარმეო და საჯარო რეესტრში.
არის რამდენიმე მთავარი საკითხი, რომელიც აუცილებლად უნდა გაითვალისწინოს ბინის შეძენით დაინტერესებულმა მომხმარებელმა:
როდესაც უძრავი ქონების ნასყიდობა ფორმდება, ის აუცილებლად უნდა დარეგისტრირდეს საჯარო რეესტრში, იქნება ეს წინარე ნასყიდობა თუ ძირითადი ნასყიდობა, აუცილებლად უნდა მოახდინონ მისი რეგისტრაცია, რათა თავი ავარიდოთ საფრთხეებს.
მნიშვნელოვანია, მომხმარებელმა დაადგინოს, აქვს თუ არა კომპანიას განშლა რეგისტრირებული.
ძალიან ხშირია როდესაც ხელშეკრულებები არის ცალმხრივად შედგენილი და ძირითადად გაწერილია დეველოპერული კომპანიის უფლებები და ნაკლებად ამახვილებს ყურადღებას მყიდველის უფლებებზე. როგორც წესი, მყიდველის მხარეს ძირითად ვალდებულებები რჩება.
ძალიან მნიშვნელოვანია, ყურადღება მიექცეს ვადებს, რადგან ძირითადი დავები სწორედ პროექტის ჩაბარების ვადებს უკავშირდება.
ვადების პრობლემა უდგას როგორც მსხვილ და წარმატებულ კომპანიებს, ასევე პატარა კომპანიებსაც. ხელშეკრულებაში უნდა მიექცეს ყურადღება, რა პირობებია ვადების გადაცილების შემთხვევაში, როდის და როგორ ხდება ანაზღაურება, რა საჯარომო სანქციებია და ა.შ აქ საუბარია გონივრულ ვადებზე. როდესაც სამშენებლო ნებართვა გამოდის და იქ მითითებულია ვადა, მას კიდევ უნდა ჰქონდეს დამატებული მინიმუმ 6 თვე, რომ დეველოპერმა სრულად ჩაიბაროს პროექტი და ექსპლუატაციაში მიიღოს.
საბედნიეროდ, საგრძნობლად გაიზარდა იურისტის მომსახურების კულტურა და ადამიანები, სანამ უძრავ ქონებას შეიძენენ, უკვე აქტიურად იყენებენ იურისტის მომსახურებას, რათა დეტალურად და პროფესიულად გაეცნონ ხელშეკრულებას და ეს ძალიან კარგია ორივე მხარისთვის, როგორც მყიდველისთვის ისე დეველოპერისთვის.
მყიდველისთვის, რადგან არ შევიდნენ შეცდომაში და დეველოპერისთვის, რადგან თავიდან აირიდონ შემდგომი დავები და გართულებები.
საფუძვლიანად გავეცნოთ ხელშეკრულებას დავსვათ კითხვები და მივიღოთ პასუხები“. S
