ბედნიერი თანამშრომელი უდრის ბედნიერ მომხმარებელს და წარმატებულ კომპანიას. მსოფლიოს წამყვანი კომპანიები ამ ფორმულით ხელმძღვანელობენ და სწორედ ეს ფორმულაა მთავარი მამოძრავებელი ძალა თიბისისთვისაც, რომელსაც კორპორაციული კულტურის ჩამოყალიბების მრავალწლიანი გამოცდილება აქვს. განვითარების მრავალმხრივი შესაძლებლობები და ნაკლები იერარქია უფროსსა და თანამშრომლებს შორის – ეს არის ის გარემო, რაც თიბისიში მისულ ადამიანს დახვდება. რას აკეთებს თიბისი თანამშრომელთა მოტივაციის გაზრდისთვის და როგორია კორპორაციული კულტურა ორგანიზაციაში, ამ საკითხებზე თიბისის ადამიანური კაპიტალის განყოფილების უფროსი გვანცა მურღვლიანი საუბრობს.
თიბისი ერთ-ერთ საუკეთესო დამსაქმებელადაა მიჩნეული საქართველოში, რა განაპირობებს ამას?
თიბისი საქართველოში ყველაზე დიდი ფინანსური ინსტიტუტია, რომელიც ყოველთვის გამოირჩეოდა განვითარებისკენ სწრაფვით და განსაკუთრებული კორპორაციული კულტურით. თიბისი არ არის მხოლოდ ბანკი, მას ბევრი შვილობილი კომპანია ჰყავს, ის ქმნის მრავალფეროვან ეკოსისტემას, რომელიც არ არის დაკავშირებული მხოლოდ საფინანსო საქმიანობასთან. ადამიანს, რომელიც ამ ჯგუფში იწყებს მუშაობას, აქვს დიდი შესაძლებლობა, რომ მუდმივად განვითარდეს სხვადასხვა მიმართულებით.
თანამშრომლებისთვის გარემოს ძალიან დიდი მნიშვნელობა აქვს, ვინაიდან ისინი დღის დიდ ნაწილს სწორედ სამსახურში ატარებენ.
როგორ გარემოს ქმნის კომპანია თანამშრომლებისთვის?
დავიწყოთ იმით, რომ ჩვენ, პირველ რიგში, ვცდილობთ შევქმნათ გარემო, სადაც ჩვენი თანამშრომლები სისტემატიურად ისწავლიან რაიმე ახალს. გვაქვს განათლების პლატფორმა, რომელიც ადამიანს სხვადასხვა ცოდნის შეძენის შესაძლებლობას აძლევს – ეს ცოდნა შეიძლება იყოს პროფესიული განათლებისგან სრულიად განსხვავებული და თანამშრომელს თვალსაწიერის გამრავალფეროვნებაში დაეხმაროს.
აქვე უნდა აღვნიშნო, რომ თიბისი პირველი ბანკი იყო საქართველოში, რომელმაც 2019 წელს ეჯაილ-ტრანსფორმაცია დაიწყო. ეს არის ძალიან დიდი ორგანიზაციული ტრანსფორმაცია, რომელიც ტრადიციული იერარქიული სტრუქტურისგან იმით განსხვავდება, რომ აქ სტრუქტურა არის ჰორიზონტალური და მთავარი პრინციპი გუნდურობაა. თითოეულ გუნდს ჰყავს კაპიტანი, რომელიც კოლეგებთან ერთად ისახავს და აღწევს მიზნებს. ასეთი ტიპის სტრუქტურა განსაკუთრებით მიმზიდველია მილენიალებისთვის და თაობა Z-სთვის. რატომ? იმიტომ, რომ მათ არა აქვთ ბიუროკრატიული ბარიერები, ისინი თავისუფლად კონცენტრირდებიან მიზნებზე.
ჩვენ ამის გამო ოფისები ღია სივრცედ გარდავქმენით. გუნდები სხედან ერთი მაგიდის გარშემო, დირექტორები აღარ არიან კაბინეტებში, შესაბამისად, ბარიერები მათთან ურთიერთობაში არ იქმნება.
რას ნიშნავს კორპორაციული კულტურა თიბისისთვის?
თიბისისთვის და ალბათ ყველა ორგანიზაციისთვის, კორპორაციული კულტურა არის მთავარი მამოძრავებელი შიდაწვის ძრავა. შესაძლოა, ორგანიზაციას საინტერესო სტრატეგია ჰქონდეს, მაგრამ, თუ კორპორაციული კულტურა ამას ხელს არ უწყობს, ეს სტრატეგიაც შეიძლება “შეიჭამოს”, ანუ პიტერ დრაკერის თქმით: Culture eats strategy for breakfast, რაც იმას ნიშნავს, რომ “ნებისმიერი სტრატეგია შეიძლება შეაფერხოს არასწორმა კორპორაციულმა კულტურამ”. ჩვენ დიდი მიზნები გვაქვს, რომელთა შესრულებაც კორპორაციული კულტურის გარეშე, ფაქტობრივად, შეუძლებელია. ეჯაილ- ტრანსფორმაცია ამის კარგი მაგალითი იყო – ჩვენ ტრადიციული მენეჯმენტი და იერარქია თანამედროვე ლიდერებით და ჰორიზონტალური მოწყობით ჩავანაცვლეთ.
რას აკეთებთ ადამიანური კაპიტალის მისაზიდად, შესანარჩუნებლად და გასავითარებლად?
ჩვენ ყოველთვის ვეძებთ ახალ ტალანტებს და, რაც მთავარია, ვმუშაობთ მათ შენარჩუნებაზე. ვთანამშრომლობთ უნივერსიტეტებთან და ტოპ- სტუდენტებს სტაჟირების პროგრამებს ვთავაზობთ. ეს კი ახალი თაობის ადამიანური კაპიტალის მოზიდვის საუკეთესო წყაროა. პირველ ეტაპზე იწყება მათი სწავლება- განვითარება და შემდეგ – სამუშაო რეჟიმში მათი ჩართულობა. სტაჟირებიდან აყვანილი სტუდენტები დღეს ჩვენი ერთ-ერთი ყველაზე წარმატებული თანამშრომლები არიან. გვაქვს “თიბისი IT აკადემია”, რომელიც ტექნიკური შესაძლებლობების მქონე სტუდენტებს აძლევს საშუალებას, სრულიად უფასოდ ინტენსიური კურსები გაიარონ. პირველი კურსი გვქონდა “ფრონტ ენდ დეველოპმენტის”, სადაც 800-მდე აპლიკაცია მივიღეთ, ამ კურსზე 40-მდე სტუდენტი ჩაირიცხა და მხოლოდ 25-მა შეძლო მისი დასრულება. 25-ივე დღეს ჩვენი თანამშრომელია და ძალიან ვამაყობთ იმით, რომ საოცარი შესაძლებლობების მქონე ადამიანები ჩვენი გუნდის წევრები არიან.
ახლა დავიწყეთ “ბექ ენდ დეველოპმენტის” კურსი და მისი დასრულებისთანავე კურსდამთავრებულებს დასაქმებას შევთავაზებთ. ასევე გვინდა, რომ მხოლოდ ჩვენზე არ ვიზრუნოთ და დასაქმების ბაზარსაც მივცეთ საშუალება, ეს მაღალკვალიფიციური ადამიანები სხვადასხვა კომპანიის სამუშაო ძალად იქცნენ. დიდ ორგანიზაციებს ეს პასუხისმგელობაც გვაქვს, რომ მხოლოდ ჩვენს თავზე არ ვიფიქროთ. კომპანიაში მთელი წლის აქტივობებს წინასწარ ვგეგმავთ, რათა ამ ადამიანებს მოტივაცია გავუზარდოთ, მათი პროდუქტიულობა ავამაღლოთ, ბედნიერების შეგრძნება მივანიჭოთ და მათი მიზნების მიღწევაში დავეხმაროთ. აქვე აღვნიშნავ, რომ განსაკუთრებულად ვაფასებთ მოტივირებულ, პროაქტიურ და, რაც მთავარია, გამბედავ ადამიანებს, ვინაიდან ჩვენი ერთ- ერთი ფასეულობა არის გამბედაობა, გამბედაობა იმისა, რომ არ გეშინოდეს სიახლეების, არ გეშინოდეს ახალი იდეების და არ გეშინოდეს ამ იდეის გახმოვანებისა და შემდეგ მისი რეალიზებისა.
როგორ იკვლევთ, რამდენად ბედნიერია თანამშრომელი?
ამისთვის ორგანიზაციას აქვს სპეციალურად შედგენილი კვლევა, და წლიდან წლამდე ვუყურებთ ამ საზომს. შედეგები საკმაოდ კარგია. არის რაღაც უბნები, სადაც გასაუმჯობესებელი გვაქვს ვითარება, მაგრამ ეს, პირიქით, კარგია, რომ დავინახოთ, სად შეგვიძლია, უკეთ დავეხმაროთ თანამშრომლებს და უკეთ გავიგონოთ მათი ხმა.
აქვე ბედნიერი თანამშრომლის მნიშვნელობაზეც გკითხავთ. რა კავშირია თანამშრომლის ბედნიერებასა და კომპანიის წარმატებას შორის?
ჩვენ, და არა მხოლოდ ჩვენ, ვფიქრობთ, რომ ბედნიერი თანამშრომელი უდრის ბედნიერ მომხმარებელს. ეს ლოგიკურია. თუ ადამიანი თვითრეალიზებულია, მისი ხმა კომპანიას ესმის და საკუთარ თავს დიდი პროცესის ნაწილად აღიქვამს, ის აუცილებლად შექმნის საუკეთესო მომსახურების მაგალითს. ამიტომაც ვცდილობთ, რომ თანამშრომლები მაქსიმალურად იყვნენ ჩართულები კომპანიისთვის მნიშვნელოვან პროცესებში. თანამედროვე ტენდენციებიც ასეთია: სერვისების მიწოდებაში ის კომპანიები იმარჯვებენ, რომელთა თანამშრომლებიც თავს რეალიზებულად და ბედნიერად გრძნობენ.
თიბისის მისია ადამიანებისთვის ცხოვრების გამარტივებაა. ბედნიერი თანამშრომლები კი ყოველთვის არიან მოტივირებულები, რომ მომხმარებელს დაეხმარონ და ცხოვრება გაუმარტივონ.
ძირითადად რა მოთხოვნები აქვთ თიბისიში დასაქმებულებს ?
დასაქმებულებს ძირითადად სურთ განვითარება. მუდმივად არის მოთხოვნა, რომ მეტი შესაძლებლობები მივცეთ, რათა უფრო წარმატებულები გახდნენ. ჩვენ გვყავს პროფესიონალი თანამშრომლები, რომელთაც განათლება მიღებული აქვთ ტოპ- უნივერსიტეტებში და ახლა აქვთ შესაძლებლობა, კოლეგებს თავიანთი ცოდნა გაუზიარონ. ესეც კორპორაციული კულტურის ნაწილია.
თქვენი დაკვირვებით, როგორია ტენდენციები დასაქმების სექტორში?
დიდი ორგანიზაციებისთვის სამუშაო ძალის მოზიდვა სულ უფრო დიდი გამოწვევა ხდება. ეს პრობლემა ალბათ კიდევ უფრო გაიზრდება იმიტომ, რომ ქვეყანა ვითარდება, სხვადასხვა მოთამაშე შემოდის ბაზარზე. ტენდენცია არის შემდეგი: უფრო და უფრო პოპულარული ხდება სტარტაპის ტიპის პატარა ორგანიზაციები, სადაც ადამიანს შეუძლია იმუშაოს არა მხოლოდ ერთი სპეციალობით, არამედ ერთდროულად აკეთოს სხვადასხვა ტიპის საქმე, რაც მის შესაძლებლობებს ზრდის და ბევრად უფრო მიმზიდველია. რაც უფრო მეტი სტარტაპ-კომპანია გაჩნდება საქართველოში, დიდ ორგანიზაციებს მით უფრო მეტი დაბრკოლება შეგვექმნება საუკეთესო თანამშრომლების მოზიდვის მხრივ. ამიტომაც დღეს უკვე ვფიქრობთ ამაზე და ვპოზიციონირდებით ბაზარზე ისე, რომ არ ვიყოთ დიდი, მოსაწყენი ორგანიზაცია, არამედ კომპანიის შიგნით პატარა გუნდებით წარმატების შედეგად მივაღწიოთ დიდ მიზნებს.
