მსოფლიოს მილიარდერებს Forbes 1987 წლიდან ამოწმებს. პირველ წელს ჩვენ ვიპოვეთ 140 მათგანი. ორი ათწლეული დასჭირდა, რომ ეს რიცხვი 1000-ს გასცდენოდა. 2017 წელს მათი რაოდენობა 2000 გახდა. დღეს, რვა წლის შემდეგ, მორიგი ნიშნული გადაილახა: 3000-ზე მეტი მილიარდერით. უფრო ზუსტად რომ ვთქვათ, წლევანდელ რეიტინგს შეადგენს რეკორდული 3028 მეწარმე, ინვესტორი და მემკვიდრე, ერთი წლის წინანდელთან შედარებით 247-ით მეტი.
ისინი არა მარტო უფრო მეტი, არამედ უფრო მდიდრებიც არიან, ვიდრე ოდესმე, და მზარდ გლობალურ ბაზრებზე საშუალოდ $5.3 მილიარდით საქმიანობენ, რაც გასულ წელთან შედარებით $200 მილიონით მეტია. მთლიანობაში, მათი ღირებულება $16.1 ტრილიონია – თითქმის $2 ტრილიონის მატება 2024 წელთან შედარებით. ათნიშნა სიმდიდრე იქმნება ყველაფერში, შემწვარი ქათმით დაწყებული, ღრუბლოვანი გამოთვლებისა და კრიპტოვალუტის ჩათვლით.
მთლიანობაში, წელს რეიტინგებს 288 ახალი სახე შეუერთდა. კიდევ 93 დაბრუნდა წარსულში გავარდნის შემდეგ, 32 გარდაიცვალა და დანარჩენი 107 უბრალოდ აღარაა საკმარისად მდიდარი. აშშ-ს ჰყავს რეკორდული 902 მილიარდერი, შემდეგ მოდის ჩინეთი (516, ჰონგ-კონგის ჩათვლით) და ინდოეთი (205). ჩვენ გამოვიყენეთ აქციების ფასები და 7 მარტის გაცვლითი კურსი.
$100-მილიარდიანთა კლუბი
ათნიშნა სიმდიდრის მქონე ადამიანების ულტრაელიტური ეშელონი რვა წლის წინ არც არსებობდა. დღეს ამ შეფასებას 15 ადამიანი იღებს, შარშან კი ეს რიცხვი 14 იყო. სამი მათგანის ღირებულება $200 მილიარდზე მეტია. მთლიანობაში, ეს 15 „სენტიმილიარდერი“ $2.4 ტრილიონი ღირს – უფრო მეტი, ვიდრე პლანეტის 1500 „ყველაზე ღარიბი“ მილიარდერის ერთად აღებული სიმდიდრე.
1. ილონ მასკი
$342 მლრდ • Tesla, SpaceX • აშშ
გასულ მაისს მასკმა LVMH-ის ბერნარ არნოსგან მსოფლიოს უმდიდრესი ადამიანის ტიტული დაიბრუნა, როდესაც კერძო ინვესტორებმა მასკის ხელოვნური ინტელექტის სტარტაპი, xAI, $24 მილიარდად შეაფასეს. შემდეგ, დეკემბერში, ის გახდა ისტორიაში პირველი ადამიანი $400 მილიარდით, მას შემდეგ რაც xAI-ის შეფასება გაორმაგდა $50 მილიარდამდე, ხოლო მისმა რაკეტების მწარმოებელმა SpaceX-მა $350 მილიარდის ნიშნულს მიაღწია (ივნისში $210 მილიარდიდან). იმავე თვეში მისი ელექტრომობილების კომპანიის, Tesla-ს აქციებმა ასევე მიაღწია ყველა დროის მაქსიმუმს, მაგრამ აქციები თითქმის 40%-ით დაეცა ინაუგურაციის დღიდან, როდესაც მასკმა დაიკავა პრეზიდენტ ტრამპის ახალი მთავრობის ეფექტიანობის დეპარტამენტის (DOGE) ხელმძღვანელის პოსტი. მიუხედავად ამისა, მისი ქონება $147 მილიარდით მეტია ერთი წლის წინანდელთან შედარებით.
2. მარკ ცუკერბერგი
$216 მლრდ • Facebook • აშშ
Meta-ს ყოფილმა პროგრესულმა აღმასრულებელმა დირექტორმა ბევრი გააკვირვა MAGA-ს საჯარო მხარდაჭერით, მათ შორის, იანვრის დასაწყისში Meta-ს ბორდში ტრამპის მომხრე მეწარმის, Ultimate Fighting Championship-ის აღმასრულებელი დირექტორ დანა უაიტის დანიშვნითაც, და რამდენიმე რესპუბლიკელ მილიარდერთან ერთად პრეზიდენტის ინაუგურაციის თანამასპინძლობით. სოციალური მედიის გიგანტის აქციები თითქმის 25%-ით გაიზარდა გასულ წელს Meta-ს ინვესტიციების ოპტიმისტური პროგნოზების ფონზე, რაც საკმარისია იმისათვის, რომ ცუკი პირველად გახდეს პლანეტის მეორე უმდიდრესი ადამიანი.
3. ჯეფ ბეზოსი
$215 მლრდ • Amazon • აშშ
Amazon-ის დამფუძნებელი და თავმჯდომარე $21 მილიარდით უფრო მდიდარია, ვიდრე გასულ წელს. ბეზოსმა, რომელმაც ბოლო 12 თვის განმავლობაში ამაზონის $5 მილიარდის აქციები გაყიდა, განაგრძო ფულადი სახსრების გადატანა სტარტაპებში, მათ შორის ხელოვნური ინტელექტის რობოტების რამდენიმე ფირმაში. მისმა კოსმოსურმა კომპანიამ, Blue Origin-მა თებერვალში გამოაცხადა, რომ ათავისუფლებს სამუშაო ძალის 10%-ს, რაკეტის, New Glenn-ის წარმატებული გაშვებიდან ერთი თვის შემდეგ. ამავდროულად, ბეზოსის ბოლოდროინდელმა ნაბიჯებმა მის სხვა გატაცებაში, Washington Post-ში, მათ შორის იმის გამოცხადებამ, რომ Opinion გვერდებმა მხარი უნდა დაუჭირონ “პირად თავისუფლებებსა და თავისუფალ ბაზრებს“, ისტებლიშმენტის შეშფოთება გამოიწვია.
4. ლარი ელისონი
$192 მლრდ • Oracle • აშშ
ელისონი არ იყო ტრამპის ინაუგურაციაზე დამსწრე ტექნომაგნატებს შორის, მაგრამ მეორე დღეს ის თეთრ სახლში გვერდს უმშვენებდა პრეზიდენტს, როდესაც ტრამპმა გამოაცხადა $500 მილიარდის ინიციატივა ხელოვნური ინტელექტის ინფრასტრუქტურის, მათ შორის მონაცემთა ცენტრების ასაშენებლად, რაც ნაწილობრივ ელისონის ფირმა Oracle-ის მხარდაჭერით ხორციელდება. ელისონის ქონება 2024 წლიდან $51 მილიარდით გაიზარდა Oracle-ის აქციების ფასის 40%-იანი ზრდის გამო.
5. ბერნარ არნო
$178 მლრდ • LVMH • საფრანგეთი
ერთი წლის წინ პლანეტის უმდიდრესი ადამიანმა, არნომ, დაინახა, რომ მისი ქონება $55 მილიარდით შემცირდა იმ ფონზე, რასაც ფუფუნების საქონლის გიგანტი „რთულ ეკონომიკურ და გეოპოლიტიკურ გარემოს“ უწოდებს. 76 წლის ხუთი შვილის მამა (ყოველი მათგანი LVMH-ის აღმასრულებელია) როგორც ჩანს, ჯერ კიდევ ერთობა იმით, რომ ყველა ცდილობს მისი მემკვიდრის ამოცნობას: ვაჟი ანტუანი იყო ჯგუფის სპონსორობის ცენტრში გასულ ზაფხულს პარიზის ოლიმპიადისთვის; ვაჟი ფრედერიკი ცოტა ხნის წინ დაინიშნა Loro Piana-ს მოდის ბრენდის ხელმძღვანელად; ხოლო ქალიშვილი დელფინა და ვაჟი ალექსანდრე მამასთან ერთად ტრამპის ინაუგურაციას ესწრებოდნენ.
6. უორენ ბაფეტი
$154 მლრდ • Berkshire Hathaway • აშშ
94 წლის ინვესტორმა დააგროვა $334 მილიარდის ნაღდი ფული Berkshire Hathaway-ის ანგარიშების მიხედვით, და არ ჩქარობს მის დახარჯვას. ბაფეტის წმინდა გაყიდვებმა 2024 წელს $134 მილიარდი შეადგინა და 2022 წელს მზღვეველ Alleghany Corp-ის $11.5-მილიარდიანი შესყიდვის შემდეგ არ გაუკეთებია თვალში საცემი შესყიდვა. „ხშირად, არაფერი ჩანს მიმზიდველად“, დაწერა მან თებერვალში აქციონერებისთვის გაგზავნილ თავის ყოველწლიურ წერილში.
7. ლარი პეიჯი
$144 მლრდ • Google • აშშ
8. სერგეი ბრინი
$138 მილიარდი • Google • აშშ
Alphabet-ის თანადამფუძნებლები და საბჭოს წევრები წელს უფრო მდიდრები არიან Alphabet-ის აქციების თითქმის 30%-იანი ნახტომის გამო, მიუხედავად იუსტიციის დეპარტამენტის მოთხოვნისა Google-ის დაშლის შესახებ. ბრინი დაბრუნდა ოფისში, მუშაობდა Alphabet-ის Gemini AI-მოდელების ჯგუფზე და, გავრცელებული ინფორმაციით, იმავეს თანამშრომლებისგანაც იმავეს ითხოვდა. თებერვალში მან დაწერა მემორანდუმი, რომელიც თანამშრომლებს ოფისში დასწრებისკენ მოუწოდებდა. ამავდროულად, პეიჯი მუშაობს ახალ კომპანიაზე, რომელიც მიზნად ისახავს ხელოვნური ინტელექტის გამოყენებას წარმოებაში.
9. ამანსიო ორტეგა
$124 მლრდ • Zara • ესპანეთი
ესპანეთის უმდიდრესმა ადამიანმა ბოლო ერთი წლის განმავლობაში $1 მილიარდზე მეტი ინვესტიცია განახორციელა ლოგისტიკურ და საოფისე საკუთრებაში ევროპის მასშტაბით. მას ამის საშუალება აქვს: მისი წილი მოდის საცალო ვაჭრობის გიგანტ Inditex-ში, რომელიც 1985 წელს დააარსა და რომელიც ცნობილია თავისი ბრენდით Zara-თი, ბოლო 12 თვის განმავლობაში აქციების 27%-იანი ზრდის გამო, რეკორდული $100 მილიარდი ღირს. ამასთან ერთად ორტეგა, რომელმაც 14 წლის წინ დატოვა თავმჯდომარის პოსტი, კიდევ $3.4 მილიარდს მოელის (გადასახადებამდე), მარტში გამოცხადებული მსუყე დივიდენდის წყალობით.
10. სტივ ბალმერი
$118 მლრდ • Microsoft • აშშ.
ბალმერმა Microsoft-ის აღმასრულებელი დირექტორის თანამდებობა 11 წლის წინ დატოვა, მაგრამ მაინც ხეირობს აქციებით, რომლებიც მისი პორტფელის დაახლოებით 80%-ს შეადგენს. ეს ძალიან კარგი ინვესტიცია იყო: MSFT-ის აქციების უკუგება თითქმის 1200%-ია მას შემდეგ, რაც მან დატოვა მთავარი თანამდებობა, S&P 500-ის გაოთხმაგებით. ბალმერი ასევე ძალიან ემოციურადაა ჩართული L.A. Clippers-ში, კალათბურთის გუნდში, რომელიც მან 2014 წელს $2 მილიარდად იყიდა. გუნდი, რომელიც ახლახან გადავიდა $2 მილიარდად აშენებულ ცინცხალ სტადიონზე, NBA-ის მეხუთე ყველაზე ღირებული ფრენჩაიზია, $5.5 მილიარდის ღირებულებით.
