რუსეთის მოქალაქეების მონაცემების ქვეყნის ფარგლებში შენახვაზე უარის თქმის გამო ამერიკული ტექ-გიგანტები – Apple-ი და Zoom Video Communications-ი დაჯარიმდნენ. მოსკოვის ტაგანსკის საოლქო სასამართლოს დადგენილებით, Apple-ს 2 მილიონი რუბლის ($34 000) გადახდა დაეკისრა. Zoom-ი და ინტერნეტის სიჩქარის მზომი ხელსაწყოს მფლობელი კომპანია Ookla კი 1-1 მილიონი რუბლით ($17 000) დაჯარიმდნენ.
საინტერესოა, რომ მოსკოვის ტაგანსკის საოლქო სასამართლომ მონაცემების შენახვასთან დაკავშირებული სხვა დარღვევისათვის Alphabet-ის Google-ი 60 000 რუბლით დააჯარიმა. Apple-ს, Zoom-ს, Ookla-სა და Google-ს აღნიშნულთან დაკავშირებით კომენტარი ჯერჯერობით არ გაუკეთებიათ.
შეგახსენებთ, რომ 24 თებერვალს რუსეთის უკრაინაში შეჭრის შემდეგ მოსკოვმა დიდი ტექ-კომპანიების წინააღმდეგ ბრძოლა დაიწყო. კონტენტის, ცენზურის, მონაცემების შენახვის წესისა თუ ადგილობრივ წარმომადგენლობასთან დაკავშირებით მოსკოვმა გიგანტ ტექნოლოგიურ კორპორაციებთან არაერთი მწვავე დავა წამოიწყო. აღნიშნულის მიზეზი, სავარაუდოდ, დასავლური კომპანიების რუსეთის ბაზრიდან გასვლის გადაწყვეტილებაა.
