მინორიტარი აქციონერების უფლებების დასაცავად კანონში ცვლილებები შედის. “ფასიანი ქაღალდების ბაზრის შესახებ” კანონში ცვლილებებით, რომლის ინიციატორიც მთავრობაა, ანგარიშვალდებულ საწარმოში აუდიტის საბჭო იქმნება, რომლის წევრები სამეთვალყურეო საბჭოს წევრები და დამოუკიდებელი დირექტორი იქნებიან. კანონპროექტის მიღება მაისის ბოლომდეა დაგეგმილი.
კერძოდ, საერთაშორისოდ დამკვიდრებული პრაქტიკაა, რომ აუდიტის კომიტეტი უნდა შედგებოდეს მხოლოდ სამეთვალყურეო საბჭოს წევრებისგან და მას უნდა ხელმძღვანელობდეს დამოუკიდებელი პირი. ასევე, ინტერესთა კონფლიქტის შემცველ ისეთ გარიგებას, რომლის ღირებულებაც შეადგენს ანგარიშვალდებული საწარმოს აქტივების ღირებულების 10%-ს (ან 10%-ზე მეტს ანდა მისი წესდებით გათვალისწინებულ უფრო მცირე ოდენობას), უნდა ამტკიცებდეს გარე აუდიტორი. კანონპროექტის მიღების მიზეზია, ასევე, ნებისმიერი აქციონერისთვის შესაძლებლობის მიცემა, მიიღოს ინფორმაცია დირექტორთა შემოსავლების შესახებ.
დღეს მოქმედი რედაქციით, აქციების 5%-ის ან 5%-ზე მეტის მფლობელ აქციონერს ან აქციონერთა ჯგუფს უფლება აქვს, მიიღოს ინფორმაცია ანგარიშვალდებული საწარმოს დირექტორების ან დირექტორთა საბჭოს წევრების და სამეთვალყურეო საბჭოს წევრების მიერ საწარმოდან მიღებული ხელფასის და სხვა სახის შემოსავლების შესახებ. კანონპროექტით კი ეს ინფორმაცია ხელმისაწვდომი ხდება ნებისმიერი აქციონერისთვის.
თბილისის საფონდო ბირჟის სამეთვალყურეო საბჭოს თავმჯომარე გიორგი ფარესიშვილი განმარტავს, რომ კანონის მიღების მიზანი ერთის მხრივ მინორიტარი აქციონერების უფლებების დაცვის გაუმჯობესება, მეორეს მხრივ კი კომპანიებში კორპორატიული მმართველობის სტანდარტების გაძლიერებაა. “კანონი არსებულ მდგომარეობას აუმჯობესებს. იდეალური არაფერია, ყოველთვის შესაძლოა უკეთესიც იყოს. თუმცა, იმასთან შედარებით რაც არსებულია,უკეთესი კანონმდებლობა ნამდვილად იქნება”.
მინორიტარი აქციონერების უფლებები დაცვის და კორპორატიული მართვის სტანდარტების გაუმჯობესების გარდა, კანონის მიღების ერთ-ერთ მიზანს საქართველოს Doing Business-ის რეიტინგში დაწინაურებაც წარმოადგენს. “ბევრ სხვა კრიტერიუმებთან ერთად აღნიშნულ რეიტინგში მინორიტარი აქციონერების უფლებების დაცვაც ფასდება”, – ამბობს გიორგი ფარესიშვილი.
