სტუდენტებისთვის და ახალი კურსდამთავრებულებისთვის ლიდერატორის პროგრამა გრძელდება. ეს არის შესაძლებლობა ახალგაზრდებისთვის, უნივერსიტეტში სწავლის პარალელურად, სასურველი მიმართულებით დააგროვონ სამუშაო გამოცდილება, შეარჩიონ მომავალი პროფესია და ამასთან, შეინარჩუნონ მაღალი აკადემიური მოსწრება.
ლიდერატორის პროგრამაში მონაწილეობის მისაღებად მსურველებს განაცხადის შევსება 10 თებერვლამდე, პორტალზე შეუძლიათ.
ლიდერატორი ახალგაზრდებს აძლევს შესაძლებლობას, 12 პროგრამის ფარგლებში, რომელიც 30-მდე მიმართულებას აერთიანებს, დააგროვონ როგორც თეორიული ცოდნა, ასევე პრაქტიკული გამოცდილება. ამასთან, ლიდერატორებს აქვთ შესაძლებლობა, როტაციული პრინციპით, 1 წლის განმავლობაში საკუთარი თავი სხვადასხვა დეპარტამენტში, სხვადასხვა პოზიციაზე გამოცადონ.
საქართველოს ბანკის ინიციატივით, ლიდერატორის პროგრამა 2017 წლიდან ყოველწლიურად ხორციელდება. მასში მონაწილეობა მიიღო უკვე 445-მა სტუდენტმა, მათმა 78%-მა კი კარიერა საქართველოს ბანკში განაგრძო.
„საქართველოს ბანკის ლიდერატორის პროგრამა არის შესაძლებლობა სტუდენტებისთვის და ახალი კურსდამთავრებულებისთვის, გაეცნონ მათთვის საინტერესო დეპარტამენტების საქმიანობის სპეციფიკას, აქციონ უნივერსიტეტში მიღებული თეორიული ცოდნა პრაქტიკულ გამოცდილებად, შეიძინონ პროფესიული უნარები და დარგის სპეციალისტებთან ერთად იმუშაონ სხვადასხვა საინტერესო პროექტზე. ეს დაეხმარება მათ, სწორად განსაზღვრონ საკუთარი კარიერული ინტერესები და აირჩიონ მომავალი პროფესია. რაც მთავარია, სამუშაო გრაფიკი სრულად არის მორგებული მათ სასწავლო ცხრილს და სტუდენტებს აძლევს შესაძლებლობას, შეინარჩუნონ მაღალი აკადემიური მოსწრება“, – აღნიშნავს ელენე ოქრომჭედლიშვილი, ადამიანური კაპიტალის, თანამშრომელთა კმაყოფილების, ბიზნეს პროცესების ეფექტურობისა და ლინის ტრანსფორმაციის მიმართულების ხელმძღვანელი.
პროგრამაში მონაწილეობისთვის საჭირო პროცედურებისა და მოთხოვნების შესახებ დეტალური ინფორმაციის მისაღებად შეგიძლიათ ეწვიოთ ვებგვერდს: leaderator.bog.ge
