პეკინის საბაჟოების გენერალური ადმინისტრაციის მონაცემებით, ივნისში ჩინეთიდან ამერიკის შეერთებულ შტატებში იშვიათი მიწა-ელემენტების ექსპორტის მოცულობა 353 ტონამდე გაიზარდა. ეს მაისთან შედარებით 660%-ით მეტია. მონაცემებზე დაყრდნობით, გასულ თვეში ჩინეთიდან ძვირფასი ლითონების ექსპორტის მთლიანი მოცულობა 3,188 ტონამდე გაიზარდა, რაც მაისის 1,238 ტონასთან შედარებით დაახლოებით 160%-ით მეტია.
მიუხედავად ამისა, ივნისის მონაცემი მაინც 38%-ით ნაკლებია 2024 წლის ანალოგიურ თვესთან შედარებით. 2025 წლის პირველ ნახევარშიც, წინა წელთან შედარებით, იშვიათი მიწა-მაგნიტების ექსპორტი 22,319 ტონამდე შემცირდა. ამ შემთხვევაში 18.9%-იანი კლება აღინიშნა.
ივნისში ჩინეთიდან აშშ-ში ექსპორტის ზრდა პეკინსა და ვაშინგტონს შორის გასულ თვეში მიღწეულ სავაჭრო შეთანხმებას უკავშირდება. შეგახსენებთ, სავაჭრო შეთანხმებით ჩინეთმა აიღო ვალდებულება, შეერთებულ შტატებს მეტი იშვიათი მიწა-ელემენტები მიაწოდოს.
ცნობისთვის, ეს მინერალები გამოიყენება მაღალტექნოლოგიური პროდუქტების ფართო სპექტრში, როგორიცაა სმარტფონები, რეაქტიული ძრავები, ელექტრომობილები და ქარის ტურბინები.
აშშ-ის მიერ დაწესებული მაღალი ტარიფების საპასუხოდ, ჩინეთის მთავრობამ წელს შვიდ იშვიათ მიწა-ელემენტსა და მაგნიტზე ექსპორტის შეზღუდვები დააწესა. ეს ნაბიჯი გლობალური მიწოდების ჯაჭვს საფრთხის ქვეშ აყენებდა, რადგან იშვიათი მიწა-ელემენტების საწარმოების 70%-ზე მეტი ჩინეთშია განთავსებული. მათი 90%-ზე მეტის გადამუშავებას ასევე ჩინეთი უზრუნველყოფს.
მას შემდეგ, რაც ვაშინგტონსა და პეკინს შორის სავაჭრო დაძაბულობა შემცირდა და ჩინეთმა აშშ-ისთვის იშვიათი მიწა-ელემენტების მიწოდება განაახლა, შეერთებულმა შტატებმა, საპასუხოდ, აზიურ ქვეყანაში ტექნოლოგიური პროდუქტების ექსპორტზე შეზღუდვები შეამსუბუქა.
ამერიკულმა ტექნოლოგიურმა გიგანტმა, Nvidia-მ, გასულ კვირას განაცხადა, რომ ის კვლავ დაიწყებდა თავისი H20 AI-ჩიპიების ჩინეთში გაყიდვას მას შემდეგ, რაც ტრამპის ადმინისტრაციამ ექსპორტის კონტროლი შეამსუბუქა.
