კომპანია Exhaura Limited-მა და დუბლინის ტრინიტის კოლეჯის მეცნიერებმა გლაუკომის მქონე პაციენტების სამკურნალოდ გენური თერაპია შეიმუშავეს. ცნობისთვის, აღნიშნული დაავადება, რომელმაც შესაძლოა მხედველობის თანდათან დაკარგვა და სიბრმავე გამოიწვიოს, მსოფლიოში დაახლოებით 80 მილიონ ადამიანს აწუხებს.
ბოლო რამდენიმე წლის განმავლობაში, გენური თერაპიის მიმართულებით წარმოებულმა კვლევებმა დადებითი შედეგი გამოიღო და მარეგულირებელი ორგანოების მიერ მასზე დაფუძნებული არაერთი მედიკამენტი დამტკიცდა. თუმცა, დამტკიცებული წამლები ძირითადად მიმართულია იშვიათი დაავადებების წინააღმდეგ. ტრინიტის კოლეჯის მკვლევრები ბოლო წლები მუშაობდნენ გენურ თერაპიაზე, რომელიც შეიძლება გამოყენებულ იქნას უფრო მეტად გავრცელებულ დაავადებასთან, კერძოდ გლაუკომასთან საბრძოლველად.
გლაუკომის დროს მხედველობის დაკარგვის მიზეზი მხედველობის ნერვის დაზიანებაა. ეს უკანასკნელი სინათლის სიგნალებს თვალიდან ტვინში გზავნის. გლაუკომის დროს თვალის შიგნით არასასურველი ცილების დაგროვება გამტარი არხების ბლოკირებას იწვევს. ეს თვალის შიგნით სითხის დაგროვებას განაპირობებს და ზეწოლის შედეგად მხედველობის ნერვი ზიანდება.
ამჟამად გლაუკომის მქონე პაციენტებში დაავადების პროგრესირების თავიდან ასაცილებლად თვალის წვეთები გამოიყენება. თუმცა, ზოგჯერ პაციენტებს მკურნალობის მიმართ რეზისტენტობა უვითარდებათ.
მკვლევრებმა თერაპიის შემუშავების პროცესში თვალის უჯრედების დასაინფიცირებლად ვირუსი გამოიყენეს. ვირუსი გენეტიკურად მოდიფიცირებული იყო და შეიცავდა გენს ფერმენტის სინთეზისთვის, რომელსაც მეტალოპროტეინაზა-3, ან MMP-3 ეწოდება. ფერმენტი თვალის შიგნით წნევის შემცირებას უზრუნველყოფს.
ექსპერიმენტების დროს მიღებულ მონაცემებზე დაყრდნობით კვლევის ავტორები ვარაუდობენ, რომ გენურ თერაპიაზე დაფუძნებული მეთოდებით გლაუკომის ადვილად მკურნალობაა შესაძლებელი. ამის დასადასტურებლად კი მომავალში კლინიკური კვლევების ჩატარება იქნება საჭირო. აღნიშნული კვლევის შედეგები ჟურნალ Science Advances-ში გამოქვეყნდა.
