გასული კვირა სპორტის სფეროში მნიშვნელოვანი სიახლეებით იყო გამორჩეული: მსოფლიო სპორტის ვარსკვლავებმა უკრაინის დასახმარებლად აუქციონზე ნივთები გამოიტანეს; ლიონელ მესიმ ფან-ტოკენის პლატფორმა Socios.com-თან $20-მილიონიანი კონტრაქტი გააფორმა; გამოცემა L’Equipe-მა საფრანგეთის უმაღლესი საფეხბურთო ლიგის, ლიგა 1-ის ყველაზე მაღალშემოსავლიანი ფეხბურთელების რეიტინგი გამოაქვეყნა, რომელშიც ტოპ-14 პოზიციას საფეხბურთო კლუბ „პარი სენ-ჟერმენის“ მოთამაშეები იკავებენ.
ბოლო დღეებში მნიშვნელოვანი მოვლენები მოხდა ჩოგბურთში. იაპონელი ჩოგბურთელი, ნაომი ოსაკა კრიპტოვალუტის ბირჟა FTX-ის მეწილე გახდა, 19 წლის ემა რადუკანუმ კი Porsche-სთან კონტრაქტი გააფორმა. ჩოგბურთის სამყაროსთვის შოკის მომგვრელი აღმოჩნდა ქალთა შორის მსოფლიოს პირველი ჩოგანის, 25 წლის ეშლი ბარტის გადაწყვეტილება კარიერის დასრულებასთან დაკავშირებით. მოცემულ ბლოგში გასული კვირის ამ და სხვა მნიშვნელოვან სპორტულ სიახლეებს მიმოვიხილავთ, რომლებიც, ძირითადად, ბიზნესსა და ფინანსებს ეხება.
მსოფლიო სპორტის ვარსკვლავებმა უკრაინის დასახმარებლად აუქციონზე ნივთები გამოიტანეს
სპორტის სხვადასხვა სახეობის წარმომადგენელმა ცნობილმა ვარსკვლავებმა ომის შედეგად დაზარალებული უკრაინისა და უკრაინელების დასახმარებლად აუქციონზე ნივთები გამოიტანეს. აუქციონის სერია, სახელწოდებით World Sports For Ukraine, სპორტული გამოცემა Tribuna-ს, ორგანიზაცია Ukraine Alive 2022-ისა და ბელარუსის სპორტული სოლიდარობის ფონდის ინიციატივას წარმოადგენს. ნივთების შეძენა Ebay-ზეა შესაძლებელი.
უკრაინის დასახმარებლად პოლონეთის ეროვნული ნაკრებისა და მიუნხენის „ბაიერნის“ თავდამსხმელმა, რობერტ ლევანდოვსკიმ აუქციონზე მაისური გამოიტანა, რომელიც მას რამდენიმე დღის წინ შოტლანდიასთან გამართულ საქველმოქმედო ამხანაგურ მატჩში ეცვა. მაისურზე ლევანდოვსკის ხელმოწერაა, ასევე ფეხბურთელის მიერ გაკეთებული წარწერა – “Stop War”.
უკრაინის ეროვნული ნაკრების კაპიტანმა და ინგლისურ კლუბ „ვესტ ჰემ იუნაიტედის“ ფეხბურთელმა, ანდრეი იარმოლენკომ საკუთარი ქვეყნისა და ხალხის დასახმარებლად აუქციონზე ხელმოწერილი სპორტული ფეხსაცმლის წყვილი გამოიტანა. ფეხსაცმელზე ასევე გაკეთებულია წარწერა “Stop War”.
აუქციონზე იყიდება უკრაინის ეროვნული ნაკრების ყოფილი ფეხბურთელის, სერგეი რებროვის მაისურიც. მასზე სპორტსმენის ხელმოწერა და წარწერა “Stop War” არის გაკეთებული. აღსანიშნავია, რომ სერგეის ეს მაისური ინგლისის თასის ფინალში, 2002 წლის 24 თებერვალს ეცვა – უკრაინაში რუსეთის შეჭრამდე ზუსტად 20 წლით ადრე. უკრაინელი ფეხბურთელი იმ დროს „ტოტენჰემის“ რიგებში ირიცხებოდა.
სამშობლოს დასახმარებლად აუქციონზე უნიკალური ნივთი კიდევ რამდენიმე უკრაინელმა სპორტსმენმა გაიტანა. მათ შორის იტალიურ საფეხბურთო კლუბ „სპეციაში“ მოთამაშე ვიქტორ კოვალენკომ, რომელიც ასევე უკრაინის ეროვნული ნაკრების წევრია. აუქციონზე ფეხბურთელის მიერ ხელმოწერილი მაისური იყიდება, რომელიც მას Serie A-ს ერთ-ერთ თამაშში ეცვა. აღსანიშნავია, რომ კოვალენკოს მშობლიური ქალაქი ხერსონია, რომელიც ოკუპანტების ერთ-ერთ მთავარ სამიზნეს წარმოადგენს.
აუქციონზე ასევე წარმოდგენილია MMA-ში მსოფლიოს მრავალგზის ჩემპიონის, უკრაინელი ლენა ოვჩინიკოვას მაისური უნიკალური პრინტით.
ლიონელ მესიმ Socios.com-თან $20-მილიონიანი კონტრაქტი გააფორმა
არგენტინის ეროვნული საფეხბურთო ნაკრების კაპიტანმა და ფრანგულ კლუბ „პარი სენ-ჟერმენის“ თავდამსხმელმა, ლიონელ მესიმ ფან-ტოკენის პლატფორმა Socios.com-თან $20-მილიონიანი კონტრაქტი გააფორმა. ამის შესახებ ინფორმაცია Reuters-მა გაავრცელა. ახალ ხელშეკრულებასთან დაკავშირებით მესის ოფიციალურ ვებგვერდზეც დაიწერა.
გავრცელებული ინფორმაციის თანახმად, კონტრაქტის ხანგრძლივობა სამ წელს შეადგენს. Socios.com-ის ბრენდის გლობალური ელჩის პირველი კამპანიის სლოგანია – „იყავი მეტი“. როგორც ცნობილია, არგენტინელი ვარსკვლავი საკუთარ გულშემატკივრებში პლატფორმის პოპულარობის გაზრდაზე იზრუნებს. მხარეებს შორის გაფორმებული ხელშეკრულების მიხედვით, მესი ასევე ჩართული იქნება Socios.com-ის სარეკლამო კამპანიაში FIFA World Cup Qatar 2022-ისთვის. ტურნირი კატარში 21 ნოემბრიდან 18 დეკემბრამდე გაიმართება.
„მეამაყება, რომ ვუერთდები Socios.com-ის მისიას, რათა ერთად შევქმნათ უფრო მეტად ურთიერთდაკავშირებული და მოგებიანი მომავალი გულშემატკივართათვის მთელ მსოფლიოში“, – განაცხადა ლიონელ მესიმ ახალ კონტრაქტთან დაკავშირებით.
ცნობისთვის, ფან-ტოკენი კრიპტოვალუტის ტიპია, რომელიც, უმეტეს შემთხვევაში, სხვადასხვა სპორტულ გუნდთან ასოცირებულ ციფრულ აქტივებს აერთიანებს.
ნაომი ოსაკა კრიპტოვალუტის ბირჟა FTX-ის მეწილე გახდა
იაპონელმა ჩოგბურთელმა, ნაომი ოსაკამ ბაჰამის კუნძულებზე დაფუძნებულ კრიპტოვალუტის ბირჟა FTX-თან პარტნიორობის შესახებ ხელშეკრულება გააფორმა. „დიდი სლემის“ 4-გზის გამარჯვებული პლატფორმაზე ქალების გააქტიურებას შეუწყობს ხელს, ასევე მისი კონტენტის შექმნაში მთავარ როლს შეასრულებს.
ხელშეკრულების თანახმად, ოსაკა FTX-ის მეწილე გახდა, გარდა ამისა, როგორც ცნობილია, ჩოგბურთელი კომპენსაციას კრიპტოვალუტაში მიიღებს. იაპონელი სპორტსმენის სათამაშო სამოსზე ამიერიდან FTX-ის ლოგო იქნება გამოსახული.
ცნობისთვის, კომპანია ასევე პარტნიორობს NBA-ში, Golden State Warriors-ის რიგებში მოთამაშე კალათბურთელ სტეფან კარისთან, ამერიკელ ფეხბურთელ ტომ ბრეიდისთან, რომელიც კლუბ Tampa Bay Buccaneers-ში ირიცხება და ბეისბოლის მოთამაშე სოჰეი ოტანისთან, რომელიც Los Angeles Angels-ის ღირსებას იცავს.
FTX-ი, რომელიც კრიპტოსავაჭრო პლატფორმა FTX.com-ის ოპერატორია, გასული წლის განმავლობაში კაპიტალს საკმაოდ სწრაფი ტემპით აგროვებდა. აღსანიშნავია, რომ SoftBank-ის ფონდმა, Vision Fund 2-მა იანვარში კომპანიაში $400-მილიონიანი ინვესტიცია ჩადო. ეს არის ძირითადი დაფინანსება, რამაც FTX-ის ღირებულება 32 მილიარდ აშშ დოლარამდე აიყვანა.
QatarEnergy FIFA-ს ოფიციალური პარტნიორი გახდა
კატარში დაფუძნებული კომპანია QatarEnergy, რომელიც თხევადი ბუნებრივი აირის (LNG) ერთ-ერთი უმსხვილესი ექსპორტიორია მსოფლიოში, FIFA-ს ოფიციალური პარტნიორი გახდა. როგორც ცნობილია, მხარეები FIFA World Cup 2022-ის ფარგლებში ითანამშრომლებენ. აღსანიშნავია, რომ წელს მსოფლიო ჩემპიონატს სწორედ კატარი უმასპინძლებს. ტურნირი 21 ნოემბრიდან 18 დეკემბრამდე გაიმართება.
„QatarEnergy მოხარულია, კიდევ ერთხელ ითანამშრომლოს FIFA-სთან, ამჯერად FIFA World Cup-ის მხარდასაჭერად, რომელიც პირველად ჩატარდება კატარსა და ახლო აღმოსავლეთში. ეს პარტნიორობა ასახავს ჩვენს მუდმივ მხარდაჭერას სხვადასხვა სპორტული აქტივობის მიმართ, განსაკუთრებით კი ფეხბურთის, როგორც სპორტული სამყაროს მთავარი მიმზიდველობის“, – განაცხადა ენერგეტიკის საკითხებში სახელმწიფო მინისტრმა და QatarEnergy-ის პრეზიდენტმა და აღმასრულებელმა დირექტორმა, საად შერიდა ალ-ქააბიმ.
1974 წელს დაარსებული QatarEnergy ენერგოკომპანიაა, რომელიც სუფთა ენერგორესურსების განვითარებაზეა პასუხისმგებელი. აღსანიშნავია, რომ 2018 წლის მონაცემებით, კომპანიის წლიურმა შემოსავალმა – 30 მილიარდი აშშ დოლარი, წმინდა მოგებამ კი 12.4 მილიარდი აშშ დოლარი შეადგინა.
ემა რადუკანუმ Porsche-სთან კონტრაქტი გააფორმა
ბრიტანელმა ჩოგბურთელმა, ემა რადუკანუმ, რომელმაც გასულ წელს ერთეულთა თანრიგში ამერიკის ღია პირველობა მოიგო, Porsche-სთან კონტრაქტი გააფორმა. მედიაში უკვე გავრცელდა ფოტოები, რომლებზეც სპორტსმენი გერმანული ავტომწარმოებლის ძვირად ღირებულ მანქანებთან ერთად არის აღბეჭდილი. კონტრაქტის ღირებულების შესახებ დეტალები ჯერჯერობით უცნობია.
„ჩემთვის „პორშეს“ ბრენდის ელჩობა ძალიან ბევრს ნიშნავს. Porsche არის ერთ-ერთი ბრენდი, რომელიც ბავშვობიდან მიყვარს. ჩემი ფავორიტი მოდელი 911-ია. ვფიქრობ, „პორშესთან“ ეს პარტნიორობა დაუჯერებელია და ნამდვილად აღელვებული ვარ იმის მოლოდინით, თუ რა საინტერესო რაღაცების გაკეთება შეგვიძლია ერთად“, – განაცხადა ემა რადუკანუმ.
ემა რადუკანუმ განსაკუთრებული პოპულარობა „დიდი სლემის“ მოგების შემდეგ მოიპოვა. მის ფოტოებს არაერთი ჟურნალის გარეკანი დაეთმო და ახალგაზრდა სპორტსმენს სპონსორობა სხვადასხვა ცნობილმა ბრენდმა შესთავაზა. „პორშემდე“ ერთ-ერთი ბოლო კომპანია, რომელთანაც რადუკანუმ ხელშეკრულება გააფორმა, ტელესაკომუნიკაციო ფირმა Vodafone-ია. მხარეებმა $4-მილიონიან კონტრაქტს ხელი გასულ თვეში მოაწერეს. ემა რადუკანუს პარტნიორები ასევე არიან Dior-ი, Tiffany & Co., Evian-ი, British Airways-ი, Nike-ი და Wilson-ი.
ცნობისთვის, ბრიტანელ სპორტსმენს, რომელმაც ჩოგბურთის თამაში პროფესიონალურ დონეზე 16 წლის ასაკიდან დაიწყო, კარიერის განმავლობაში თითქმის 3 მილიონი აშშ დოლარის ოდენობის თანხა აქვს გამომუშავებული.
PSG-ის მოთამაშეები ლიგა 1-ის ყველაზე მაღალშემოსავლიანი ფეხბურთელების სიის ტოპ-14 პოზიციას იკავებენ
გამოცემა L’Equipe-მა საფრანგეთის უმაღლესი საფეხბურთო ლიგის, ლიგა 1-ის ყველაზე მაღალშემოსავლიანი ფეხბურთელების ჩამონათვალი გამოაქვეყნა. აღსანიშნავია, რომ რეიტინგში ტოპ-14 პოზიციას საფეხბურთო კლუბ „პარი სენ-ჟერმენის“ მოთამაშეები იკავებენ.
ბრაზილიელი ვარსკვლავი, ნეიმარი, რომელიც PSG-ში ესპანური გრანდიდან, Barcelona-დან 2017 წლის აგვისტოში 222 მილიონი ევროს სანაცვლოდ გადაბარგდა, კვლავ დივიზიონის ყველაზე მაღალი ანაზღაურების მქონე ფეხბურთელია. ის თვეში 4 მილიონ ევროზე მეტს იღებს, რაც წელიწადში ჯამში 49 მილიონ ევროს შეადგენს.
ჩამონათვალში მეორე პოზიციაზეა 34 წლის არგენტინელი, ლიონელ მესი, რომელიც „პარი სენ-ჟერმენს“, „ბარსელონასთან“ ემოციური განშორების შემდეგ, გასულ ზაფხულს შეუერთდა. ერთ დროს მსოფლიოს ყველაზე მაღალშემოსავლიანი ფეხბურთელი ამჟამად წელიწადში 40 მილიონ ევროს გამოიმუშავებს.
კილიან მბაპე, რომელიც მიმდინარე სეზონში PSG-ის უდავოდ საუკეთესო მოთამაშეა, რეიტინგში მხოლოდ მე-3 ადგილს სჯერდება. 23 წლის ფეხბურთელი, რომელსაც ფრანგულ კლუბთან კონტრაქტი რამდენიმე თვეში ეწურება, წელიწადში თითქმის 26.7 მილიონ ევროს იღებს. მოსალოდნელია, რომ კონტრაქტის ვადის ამოწურვის შემდეგ მბაპე „პარი სენ-ჟერმენს“ დატოვებს. ის, თავისუფალი აგენტის სტატუსით, დიდი ალბათობით, მადრიდის „რეალს“ შეუერთდება.
რეიტინგის ტოპ-5-ეულში მოხვდნენ PSG-ის 27 წლის ბრაზილიელი მცველი მარკინოსი და მისი თანაგუნდელი, 29 წლის იტალიელი ნახევარმცველი მარკო ვერატი. ორივე ფეხბურთელის ყოველწლიური ხელფასი 14.4 მილიონ ევროს შეადგენს. რაც შეეხება რეიტინგის პირველ ათეულს, იქ ასევე მოხვდნენ მაროკოელი აშრაფ ჰაკიმი, კოსტარიკელი კეილორ ნავასი, არგენტინელი ანხელ დი მარია, ნიდერლანდელი ჯორჯინიო ვეინალდუმი და იტალიელი ჯანლუიჯი დონარუმა.
L’Equipe-ის მიერ გამოქვეყნებული ლიგა 1-ის ყველაზე მაღალშემოსავლიანი ფეხბურთელების სრული რეიტინგი, რომელიც 30 მოთამაშეს აერთიანებს, წლიური ხელფასების მიხედვით შემდეგნაირად გამოიყურება:
- ნეიმარი (PSG) – 49 მილიონი ევრო
- მესი (PSG) – 40 მილიონი ევრო
- მბაპე (PSG) –7 მილიონი ევრო
- მარკინოსი (PSG) –4 მილიონი ევრო
- მარკო ვერატი (PSG) –4 მილიონი ევრო
- აშრაფ ჰაკიმი – (PSG) – 12 მილიონი ევრო
- კეილორ ნავასი (PSG) – 12 მილიონი ევრო
- ანხელ დი მარია (PSG) –4 მილიონი ევრო
- ჯორჯინიო ვეინალდუმი (PSG) –9 მილიონი ევრო
- ჯანლუიჯი დონარუმა (PSG) –9 მილიონი ევრო
- მაურო იკარდი (PSG) –6 მილიონი ევრო
- სერხიო რამოსი (PSG) –5 მილიონი ევრო
- ლეანდრო პარედესი (PSG) – 9 მილიონი ევრო
- ხუან ბერნატი (PSG) –8 მილიონი ევრო
- ვისამ ბენ იედერი (Monaco) –8 მილიონი ევრო
- ანდერ ერერა (PSG) 7.8 მილიონი ევრო
- პრესნელ კიმპემბე (PSG) –7 მილიონი ევრო
- სესკ ფაბრეგასი (Monaco) –2 მილიონი ევრო
- ჯულიან დრაქსლერი (PSG) –7 მილიონი ევრო
- ლაივინ კურზავა (PSG) – 6 მილიონი ევრო
- იდრისა გეიე (PSG) – 6 მილიონი ევრო
- აბდუ დიალო (PSG) –4 მილიონი ევრო
- თილო კერერი (PSG) –9 მილიონი ევრო
- ბაკამბუ (Marseille) –8 მილიონი ევრო
- არკადიუშ მილიკი (Marseille) –8 მილიონი ევრო
- ალექსანდერ ნიუბელი (Monaco) –8 მილიონი ევრო
- ტანგი ნდომბელე (Lyon) –2 მილიონი ევრო
- ჟერომ ბოატენგი (Lyon) –2 მილიონი ევრო
- დიმიტრი პაიე (Marseille) –2 მილიონი ევრო
- რენატუ სანჩესი (Lille) – 4 მილიონი ევრო
25 წლის ასაკში, ქალთა შორის მსოფლიოს პირველმა ჩოგანმა, ეშლი ბარტიმ კარიერა დაასრულა
ავსტრალიელმა ჩოგბურთელმა და ქალთა შორის მსოფლიოს პირველმა ჩოგანმა, ეშლი ბარტიმ 25 წლის ასაკში კარიერის დასრულების გადაწყვეტილება მიიღო. ეშლი ბარტის განცხადება შოკის მომგვრელი აღმოჩნდა ჩოგბურთის სამყაროსთვის, განსაკუთრებით – ავსტრალიის ღია პირველობაზე მესამე „დიდი სლემის“ მოგების შემდგომ.
Instagram-ის საკუთარ გვერდზე გამოქვეყნებულ ვიდეოში ბარტიმ განაცხადა, რომ გამოფიტულია და აღარა აქვს „ის ფიზიკური ძალა და ემოციური სურვილი“, რაც ჩოგბურთის უმაღლეს დონეზე სათამაშოდ აუცილებელია. მსოფლიოს პირველმა ჩოგანმა 2014 წელს ჩოგბურთიდან წასვლის შესახებ გაკეთებული განცხადებაც გაიხსენა და აღნიშნა, რომ ეს სიტუაცია წინა შემთხვევისგან მნიშვნელოვნად განსხვავდება. 2014 წელს ჩოგბურთიდან წასვლის მიზეზად ბარტიმ გადაღლა და მოგზაურობით გამოწვეული სტრესი დაასახელა.
კარიერის დასრულებაზე ფიქრი ავსტრალიელმა ჩოგბურთელმა ჯერ კიდევ შარშან, უიმბლდონის მოგების შემდგომ დაიწყო. თუმცა მაშინ გადაწყვეტილების მიღება, როგორც თავად ამბობს, „დაუკმაყოფილებლობის გრძნობამ“ გადაავადებინა. მაგრამ ერთი წლის შემდგომ, როგორც ჩანს, 25 წლის სპორტსმენისთვის „საოცარი მოგზაურობის“ დასრულების საუკეთესო შემთხვევად ავსტრალიის ღია პირველობაზე გამარჯვება იქცა.
ბარტი 121 კვირის განმავლობაში წამყვან ჩოგბურთელ ქალებს შორის პირველობას არ თმობდა. 25 წლის ავსტრალიელ ჩოგბურთელს სამი “დიდი სლემის” ტიტული აქვს მოგებული: 2019 წელს საფრანგეთის ღია პირველობა, 2021 წელს უიმბლდონი და 2022 წელს ავსტრალიის ღია პირველობა.
ცნობისთვის, ეშლი ბარტის მიერ კორტებზე გამომუშავებული თანხა საერთო ჯამში 23.8 მილიონ აშშ დოლარს შეადგენს.
