ამერიკის შეერთებული შტატების სურსათისა და მედიკამენტების ხარისხის კონტროლის სააგენტომ (FDA), ერთი ან მეტი სახეობის საკვებზე ალერგიული რეაქციების სიმძიმის შესასუსტებლად, Xolair-ის გამოყენებისთვის ნებართვა გასცა. Xolair-ი სააგენტოს მიერ დამტკიცებული პირველი მედიკამენტი გახდა, რომელიც სხვადასხვა სახის საკვებზე ალერგიული რეაქციების სამკურნალოდაა შექმნილი.
საინიექციო პრეპარატი Novartis Pharmaceuticals-ისა და Genentech-ის მიერაა შემუშავებული. მედიკამენტი ერთი წლისა და უფროსი ასაკის პაციენტებში გამოიყენება, რომლებიც იმუნოგლობულინის E (IgE) შუამავლობითი გავლენით გამოწვეული საკვები ალერგიით არიან დაავადებულნი. მსგავს პაციენტებს ერთ ან მეტ საკვებზე აქვთ ალერგიული რეაქცია. Associated Press-ის ინფორმაციით, პაციენტებს მედიკამენტის მიღება ყოველ ორ-ოთხ კვირაში ერთხელ შეუძლიათ – სხვადასხვა ფაქტორიდან გამომდინარე – რაც მათ დიდი რაოდენობის ალერგენით გამოწვეული მძიმე რეაქციებისგან იცავთ.
მიუხედავად მედიკამენტის განმეორებითი გამოყენების სარგებლისა, FDA-ის რჩევით, ჯობს პაციენტებმა კვლავ თავი შეიკავონ მათთვის ალერგიული საკვების მიღებისგან. გარდა ამისა, სააგენტოს ცნობით, პრეპარატი არ არის დამტკიცებული ანაფილაქსიის მსგავსი რეაქციების გადაუდებელი მკურნალობის დროს გამოსაყენებლად.
Xolair-ის ყველაზე გავრცელებულ თანამდევ მოვლენებს შორისაა ცხელება და ინიექციის ადგილზე რეაქცია. სააგენტომ მედიკამენტი მესამე ფაზის OUtMATCH-ის კვლევებიდან მიღებულ უსაფრთხოებისა და ეფექტიანობის მონაცემებზე დაყრდნობით დაამტკიცა. მედიკამენტი გამოიცადა 1-დან 55 წლამდე ასაკის 168 პაციენტში, რომელთაც არაქისსა და, სულ მცირე, ორ სხვა საკვებზე, მათ შორის რძეზე, ხორბალსა და კეშიუზე ჰქონდათ ალერგია.
სააგენტოს ცნობით, თავდაპირველად Xolair-ი აშშ-ის სურსათისა და მედიკამენტების ხარისხის კონტროლის სააგენტომ 2003 წელს, 12 წელზე უფროსი ასაკის პაციენტებში, ზომიერი და მუდმივი ალერგიული ასთმის სამკურნალოდ დაამტკიცა. Genentech-ის მონაცემებით, Xolair-ს პირველადი დამტკიცების დღიდან აშშ-ში 700,000-ზე მეტი პაციენტი იყენებდა.
