კიბერუსაფრთხოების სპეციალისტებზე გლობალური მოთხოვნის ზრდის გამო, ბრიტანული უნივერსიტეტი საქართველოში გახდა საერთაშორისო საინფორმაციო სისტემების უსაფრთხოების სერტიფიკაციის კონსორციუმის (ISC2) საერთაშორისო აკადემიური პარტნიორი. პარტნიორობის მიზანია შეამციროს დეფიციტი კიბერუსაფრთხოების კადრების მხრივ.
2022 წელს, საერთაშორისო კიბერუსაფრთხოების სფეროში 3.4 მილიონი სპეციალისტის დეფიციტი დაფიქსირდა, ხოლო 2024 წლისთვის ეს რიცხვი კიდევ გაიზარდა და ახლა მოთხოვნა 4.8 მილიონი პროფესიონალით აღემატება მიწოდებას. მიუხედავად იმისა, რომ კიბერუსაფრთხოების სფეროში 5.5 მილიონი სპეციალისტი უკვე მუშაობს, ორგანიზაციებს და კომპანიებს დამატებით 4.8 მილიონი ექსპერტის დაქირავება სჭირდებათ მზარდი კიბერ უსაფრთხოების საჭიროებების დასაკმაყოფილებლად.
ამ დისბალანსმა გამოიწვია ანაზღაურებების ზრდა, სადაც კიბერუსაფრთხოების პროფესიონალები, მათი გამოცდილებისა და როლის სირთულიდან გამომდინარე, $50,000-დან $250,000-მდე ხელფასს იღებენ. ბრიტანული უნივერსიტეტის სტრატეგიული პარტნიორობა ISC2-თან მიზნად ისახავს ამ დეფიციტის შემცირებას, კიბერუსაფრთხოების აუცილებელი უნარების სწავლებისა და მოთხოვნადი სერტიფიკატების შეთავაზების გზით.
ამ თანამშრომლობის ფარგლებში, ბრიტანული უნივერსიტეტი საქართველოში ISC2-ის სერტიფიცირების ტრენინგებს შესთავაზებს ისეთ პროგრამებზე, როგორიცაა Certified Information Systems Security Professional (CISSP), Systems Security Certified Practitioner (SSCP), Certified Secure Software Lifecycle Professional (CSSLP), Certified in Governance, Risk and Compliance (CGRC) და Certified Cloud Security Professional (CCSP). ეს კურსები მიზნად ისახავს პროფესიონალებს კიბერუსაფრთხოების სფეროში კარიერულ წინსვლაში დაეხმაროს და აღჭურვოს ცოდნითა და ექსპერტიზით, რათა წარმატებით ჩააბარონ აღნიშნული სასერტიფიკატო გამოცდები.
„მოხარული ვართ, რომ ვთანამშრომლობთ ISC2-თან, რათა სტუდენტებსა და პროფესიონალებს შევთავაზოთ ინდუსტრიის მიერ აღიარებული კიბერუსაფრთხოების სერტიფიკატები,“ – აღნიშნა ლევან გურგენიძემ, ბრიტანული უნივერსიტეტის სოციალურ მეცნიერებათა ფაკულტეტის დეკანმა. „ეს თანამშრომლობა ადამიანებს საშუალებას მისცემს გააუმჯობესონ თავიანთი უნარები ამ სწრაფად მზარდ სფეროში და შედეგად, მეტი ეფექტიანი კიბერუსაფრთხოების გადაწყვეტილებები შეიქმნას.“
მსოფლიოში მრავალი ინდუსტრია განიცდის კიბერშეტევების ზრდას, და აუცილებელია კვალიფიციური პროფესიონალების მომზადება, რათა მათ შეძლონ ამ შეტევებისგან დაცვა. ISC2-ის გლობალური აკადემიური პარტნიორობების ხელმძღვანელმა, ალექს მორტიმერმა აღნიშნა: „ჩვენი თანამშრომლობა ბრიტანულ უნივერსიტეტთან მნიშვნელოვან როლს შეასრულებს იმ უნარების გაძლიერებაში, რაც აუცილებელია კიბერუსაფრთხოების კომპლექსური გარემოს მართვისთვის. მოხარულნი ვართ, რომ ვთანამშრომლობთ ბრიტანულ უნივერსიტეტთან.“
ISC2-ის სერტიფიკატები, როგორიცაა CISSP, გლობალურად აღიარებულია, როგორც კიბერუსაფრთხოების სფეროს ერთ-ერთი ყველაზე პრესტიჟული მიღწევა, და ეს პარტნიორობა წარმოადგენს მნიშვნელოვან ნაბიჯს კიბერუსაფრთხოების უნარებით აღჭურვილი სპეციალისტების ჩამოყალიბებისკენ საქართველოში და მის ფარგლებს გარეთ. S
