დიდმა ბრიტანეთმა გლობალური ანტიკორუფციული სანქციების რეგულაციების 2021 წლის წესდების საფუძველზე სანქცირებულთა სია განაახლა. დღეს, 2 აპრილს გამოქვეყნებულ სიაში ორი ქართველი – ლევან მურუსიძე და მიხეილ ჩინჩალაძე – მოხვდა.
ლევან მურუსიძე თბილისის სააპელაციო სასამართლოს მოსამართლე და საქართველოს იუსტიციის უმაღლესი საბჭოს წევრია. რაც შეეხება მიხეილ ჩინჩალაძეს, ის თბილისის სააპელაციო სასამართლოს თავმჯდომარე და, ასევე, საქართველოს იუსტიციის უმაღლესი საბჭოს წევრია.
როგორც დიდი ბრიტანეთის მთავრობის ოფიციალურ დოკუმენტშია აღნიშნული, არსებობს საფუძვლიანი ეჭვი, რომ ლევან მურუსიძე და მიხეილ ჩინჩალაძე სერიოზულ კორუფციაში მონაწილეობდნენ ან მონაწილეობენ. კერძოდ, სანქციების მიზეზად დასახელებულია, რომ მურუსიძემ და ჩინჩალაძემ თანამდებობები გამოიყენეს სასამართლო გადაწყვეტილებებსა და მოსამართლეების დანიშვნაზე ზეგავლენის მოსახდენად, რაც „ქართული ოცნების“ სასარგებლოდ ხდებოდა.
გარდა ამისა, დოკუმენტში აღნიშნულია, რომ მათ ფინანსური სარგებელი მიიღეს საჯარო ფუნქციების არასათანადოდ შესრულების სანაცვლოდ, რაც უზრუნველყოფდა, რომ სასამართლო სისტემის საკვანძო პოზიციებზე დანიშნულნი ყოფილიყვნენ ხელისუფლების მიმართ ლოიალური პირები. ამასთან, მათ მიიღეს უვადო მოსამართლეობის სტატუსი იმ პირობით, რომ კვლავ მოახდენდნენ გავლენას სასამართლოს გადაწყვეტილებებსა და მოსამართლეების დანიშვნებზე, მმართველი პარტიის ინტერესების შესაბამისად.
სანქცირებულ მოსამართლეებს დიდი ბრიტანეთის ტერიტორიაზე არსებული ყველა სახის ქონება, ასევე საბანკო ანგარიშები გაეყინებათ.
